Falaknuma Express stopped at Miryalaguda Railway Station : నల్గొండ జిల్లాలోని మిర్యాలగూడ రైల్వేస్టేషన్లో సాంకేతిక కారణాలతో సింహపురి ఫలక్నుమా ఎక్స్ప్రెస్ రైలు పట్టాలపైనే నిలిచిపోయింది. హౌరా నుంచి సికింద్రాబాద్ వెళుతున్న ఫలక్నుమా ఎక్స్ప్రెస్ ట్రైన్ వెనుక భాగంలో వీల్ ఒకచోట రెండు ఇంచుల మందం అరిగిపోవడం లేదా సొట్ట పోవడం వల్ల హిల్ బ్రేక్ లాక్ కావడంతో ప్రయాణించేటప్పుడు విపరీతంగా శబ్దం రావడాన్ని రైల్వే అధికారులు గుర్తించారు. వెంటనే ట్రైన్ను మిర్యాలగూడ రైల్వే స్టేషన్లో అక్కడికక్కడే నిలిపివేశారు.
దీంతో ఆ మార్గం గుండా రాకపోకలు సాగించే రైళ్లకు అంతరాయం కలిగింది. సుమారు రెండు గంటల పాటు రైలు నిలిచిపోవడంతో ప్రయాణికులు తీవ్ర అసౌకర్యానికి గురయ్యారు. ఎట్టకేలకు రైల్వే అధికారులు, సాంకేతిక సిబ్బంది శ్రమించి త్వరితగతిన మరమ్మతులు చేయడంతో రైల్వే ఉన్నతాధికారుల ఆదేశాలతో ఫలక్నుమా ఎక్స్ప్రెస్ 2 గంటల ఆలస్యంగా సికింద్రాబాద్ బయలుదేరింది.
