Justin Trudeau Government : కెనడా ప్రధానమంత్రి జస్టిన్ ట్రూడోకు ఎదురుదెబ్బ తగిలింది. లిబరల్ పార్టీకి మద్దతును ఉపసంహరించుకుంటున్నట్లు కీలక మిత్రపక్షమైన న్యూ డెమోక్రటిక్ పార్టీ నేత జగ్మీత్ సింగ్ తెలిపారు. ఈ మేరకు గురువారం మధ్యాహ్నం జగ్మీత్ సింగ్ సోషల్ మీడియాలో ఓ వీడియో పోస్ట్ చేశారు. ఈ నేపథ్యంలో ముందస్తు ఎన్నికలకు ప్రతిపక్ష పార్టీలు పిలుపునిచ్చాయి.
జస్టిన్ ట్రూడో కార్పొరేట్ శక్తులకు అనుకూలంగా మారారని జగ్మీత్ విమర్శించారు. కార్పొరేట్ అనుకుల విధానాలు ప్రజలను నిరాశపరిచాయని ఆరోపించారు. ఈ విషయాన్ని ట్రూడో పదే పదే రుజువు చేశారని అన్నారు. ''ట్రూడో ప్రజలను నిరాశపరిచారు. కెనడియన్ల ఆయనకు మరో అవకాశం ఇవ్వరు. సంపన్నులకు, సీఈఓలకు దోచిపెట్టడానికి, కార్మికులు, రిటైర్డ్ ఉద్యోగులు, యువకులు, రోగుల కుటుంబాల నుంచి ఎక్కువగా దోచుకుంటున్నారు'' అని జగ్మీత్ సింగ్ ఆరోపణలు గుప్పించారు.
