Biden Calls Netanyahu : ఇజ్రాయెల్ భద్రతకు అమెరికా అన్ని విధాలుగా సహకరిస్తుందని అమెరికా అధ్యక్షుడు జో బైడెన్ పేర్కొన్నారు. ఇజ్రాయెల్ ప్రధాని బెంజమిన్ నెతన్యాహుతో ఫోన్లో మాట్లాడిన బైడెన్, ఇరాన్ నుంచి వచ్చే అన్ని రకాల బెదిరింపులకు, వ్యతిరేకంగా ఇజ్రాయెల్ భద్రతకు అమెరికా సహకరిస్తుందని పునరుద్ఘాటించారు. బైడెన్తో పాటు ఉపాధ్యక్షురాలు కమలా హారిస్ కూడా నెతన్యాహూతో ఫోన్లో మాట్లాడారని శ్వేత సౌధం వెల్లడించింది.
'ఇరాన్ నుంచి, హమాస్, హిజ్బుల్లా, హౌతీ లాంటి ఉగ్రవాద గ్రూపుల నుంచి వచ్చే అన్ని రకాల బెదిరింపులకు వ్యతిరేకంగా ఇజ్రాయెల్ భద్రతకు తాము సహకరిస్తామని జోబైడెన్ స్పష్టం చేశారు. అలాగే ఇరాన్ బాలిస్టిక్ క్షిపణులు, డ్రోన్లతో చేస్తున్న దాడులకు ప్రతిగా, యూఎస్ మిలటరీ సహకారాన్ని ఇజ్రాయెల్కు ఇచ్చేందుకు సముఖం వ్యక్తం చేశారు. ప్రాంతీయ ఉద్రిక్తతల తగ్గించడానికి అమెరికా కట్టుబడి ఉందని బైడెన్ స్పష్టం చేశారు' అని వైట్హౌస్ తెలిపింది.
