BS Yediyurappa POCSO Case : పోక్సో కేసులో కర్ణాటక మాజీ ముఖ్యమంత్రి, బీజేపీ సీనియర్ నేత బీఎస్ యడియూరప్పకు హైకోర్టులో ఊరట లభించింది. ఈ కేసులో ఆయన్ను అరెస్ట్ చేయవద్దని న్యాయస్థానం పోలీసులను ఆదేశించింది. ఈ కేసు దర్యాప్తుకు సహకరించాలని ఆయన్ను కోరాలని చెప్పింది. జూన్ 17న సీఐడీ ఎదుట విచారణకు హాజరుకావాలని యడియూరప్పకు సూచించింది. అంతకుముందు గురువారం బెంగళూరు కోర్టు ఆయనపై నాన్ బెయిలబుల్ అరెస్ట్ వారెంట్ జారీ చేసింది.
తన 17 ఏళ్ల కుమార్తెపై యడియూరప్ప లైంగిక వేధింపులకు పాల్పడ్డారని ఓ మహిళ ఫిర్యాదు చేసింది. ఈ ఫిర్యాదు ఆధారంగా సదాశివనగర్ పోలీస్ స్టేషన్లో యడియూరప్పపై పోక్సోతో పాటు పలు సెక్షన్ల కింద కేసు నమోదైంది. అనంతరం కొద్ది గంటల వ్యవధిలో మార్చి 14న ఈ కేసును సీఐడీకి అప్పగిస్తూ కర్ణాటక ప్రభుత్వం ఆదేశాలు జారీ చేసింది.
