పశువుల పాకలో చిరుత డెలివరీ - స్థానికుల రక్షణలో 3 పసికూనలు!

Cheetah Gave Birth To Three Cubs In Cattle Shed In Maharashtra : ఓ చిరుత జనావాసాల్లోకి వచ్చి మూడు పిల్లలకు జన్మనిచ్చిన ఘటన మహారాష్ట్రలోని చంద్రపూర్‌ జిల్లా నాగభీడ్‌ తాలూకా బాలాపూర్‌(ఖుర్దు)లో జరిగింది. వారం రోజులుగా ఓ చిరుత ఈ ప్రాంతంలో సంచరిస్తూ ఆరుగురు వ్యక్తులపై దాడిచేయగా, ఒకరు మృతిచెందారు. అంతేకాదు ఆ చిరుత పలు జంతువులపైనా దాడిచేసి హతమార్చింది. బాలాపూర్‌ గ్రామ పొలిమేరలో రైతు డిమ్‌దేవ్‌ సలోటేకు చెందిన పశువుల పాక ఉంది. సోమవారం ఉదయం ఈ పాకలోంచి చిరుత బయటకు రావడాన్ని స్థానికులు చూశారు. తరువాత వారు అక్కడకు వెళ్లి చూడగా మూడు చిరుత కూనలు కనిపించాయి. వాటిని జాగ్రత్త చూసుకున్న స్థానికులు, వెంటనే ఈ విషయాన్ని అటవీ అధికారులకు తెలియజేశామని తెలిపారు.