వైఎస్సార్సీపీ కొత్త పల్లవి - హైదరాబాద్ ఉమ్మడి రాజధానిగా కొనసాగించాలి: వైవీ సుబ్బారెడ్డి

YV Subba Reddy Sensational Comments on AP Capital: విశాఖను ఎగ్జిక్యూటివ్ కాపిటల్​గా చేయడానికి న్యాయపరమైన చిక్కులు ఉన్నాయని ఉమ్మడి విశాఖ వైఎస్సార్సీపీ సమన్వయ కర్త వైవీ సుబ్బారెడ్డి అన్నారు. అందువల్లనే అవి తీరేవరకు హైదరాబాద్​ను ఉమ్మడి రాజధానిగా కొనసాగించాలని కేంద్రాన్నిఅడుగుతామంటూ వైఎస్సార్సీపీ కొత్త పల్లవి అందుకున్నారు. రాజ్యసభ అభ్యర్ధిగా నామినేషన్ తర్వాత విశాఖ వచ్చిన  వైవీ సుబ్బారెడ్డి మీడియాతో మాట్లాడుతూ ఈ విషయాన్ని ప్రస్తావించారు. ఎన్నికల తర్వాత కేంద్రంతో చర్చించి హైదరాబాద్​ను ఉమ్మడి రాజధానిగా ఉండేలా కొరుతామని వివరించారు. గత ప్రభుత్వం రాజధాని కట్టలేకపోయిందని విమర్శించారు. అది సాధ్యం కాదు కనకే తాము విశాఖ కార్యనిర్వాహక రాజధాని అంటూ ప్రతిపాదించామని సుబ్బారెడ్డి పేర్కొన్నారు.

 వైఎస్సార్సీపీ మేనిఫెస్టో అంశంపై కసరత్తు చెస్తున్నట్లు తెలిపారు. ఈ నెలాఖరులోగా వైఎస్సార్సీపీ మేనిఫెస్టో ప్రకటిస్తామని తెలిపారు. అభ్యర్థుల కసరత్తు ఓ కొలిక్కి వచ్చిందని త్వరలోనే మిగతా అభ్యర్థులను ప్రకటిస్తామని సుబ్బారెడ్డి తెలిపారు. ఇప్పుడు అమలవుతున్న సంక్షేమ పథకాలను ముందుకు తీసుకు వెళ్లాలంటే మళ్లీ వైఎస్సార్సీపీ ప్రభుత్వం రావాల్సి ఉందని తెలిపారు.