మహిళపై గుర్తు తెలియని వ్యక్తి కత్తితో దాడి - అనంతరం ఆత్మహత్య

Unknown Person Attack on Woman : ఎన్టీఆర్ జిల్లాలో దారుణ ఘటన చోటు చేసుకుంది. వివాహితపై దాడి చేసిన గుర్తు తెలియని వ్యక్తి, అనంతరం తాను ఆత్మహత్యకు పాల్పడ్డాడు. సమాచారం అందుకున్న పోలీసులు విచారణ చేపట్టారు. పూర్తి వివరాల్లోకి వెళితే 

విజయవాడలోని సత్యనారాయణపురంలోని లక్ష్మీ నగర్​లో ఓ గృహంలో వివాహిత మాధురి (39)గా జీవనం సాగిస్తోంది. రాత్రి ఒంటరిగా ఉన్న మహిళపై ఓ గుర్తు తెలియని వ్యక్తి కత్తితో విచక్షణ రహితంగా దాడి చేశాడు. ఈ ఘటనలో మహిళ తీవ్రంగా గాయపడింది. దాడి అనంతరం అదే గదిలో నిందితుడు ఉరి వేసుకుని ఆత్మహత్యకు పాల్పడ్డాడు. మహిళ మాత్రం రక్తపు మడగులో అచేతనంగా పడి ఉంది. తీవ్ర గాయాల పాలైన వివాహితను స్థానిక ప్రజలు గుర్తించారు. ఈ విషయాన్ని సత్యనారాయణపురం పోలీసులకు సమాచారం అందించారు. సంఘటనా స్థలానికి చేరుకున్న పోలీసులు కేసు నమోదు చేశారు. అనంతరం ఆమెను అంబులెన్సులో స్థానిక ఆసుపత్రికి తరలించారు. వైద్యులు బాధితురాలికి చికిత్స అందిస్తున్నారు. ఈ కేసుపై దర్యాప్తు చేపడుతున్నట్లు పోలీసులు తెలిపారు. గుర్తు తెలియని వ్యక్తి మాధురిపై దాడి చేయడానికి గల కారణాలు ఇంకా తెలియరాలేదు.