రాష్ట్రంలో సీనియర్‌ ఐఏఎస్‌లు బదిలీలు - ప్రభుత్వం ఉత్తర్వులు జారీ

Senior IAS Transfers in Andhra Pradesh : రాష్ట్రంలో కొందరు సీనియర్ ఐఏఎస్ అధికారులను బదిలీ చేస్తూ ప్రభుత్వం ఉత్తర్వులు జారీ చేసింది. ఈ మేరకు ప్రభుత్వ ప్రధాన కార్యదర్శి కేఎస్ జవహర్ రెడ్డి (KS Jawahar Reddy) ఉత్తర్వులు ఇచ్చారు. పంచాయితీరాజ్, గ్రామీణాభివృద్ధి శాఖలోని ప్రత్యేక ప్రధాన కార్యదర్శిగా ఉన్న బుడితి రాజశేఖర్​ను, ఆ శాఖ కమిషనర్ ఎ. సూర్యకుమారిని ప్రభుత్వం ఒకేసారి బదిలీ చేసింది. బుడితి రాజశేఖర్ ను సాధారణ పరిపాలన శాఖలో రిపోర్టు చేయాల్సిందిగా ప్రభుత్వం ఆదేశించింది. మరోవైపు సూర్యకుమారిని మత్స్యశాఖ కమిషనర్​గా బదిలీ చేస్తూ జవహర్ రెడ్డి ఆదేశాలు జారీ చేశారు. మత్స్యశాఖ కమిషనర్​గా ఉన్న కె. కన్నబాబును పంచాయితీరాజ్ గ్రామీణాభివృద్ధి శాఖ కమిషనర్​గా నియమించారు. పర్యాటకాభివృద్ధి కార్పోరేషన్ ఎండీ, ఏపీ టూరిజం సీఈఓగానూ కన్నబాబుకు అదనపు బాధ్యతలు అప్పగిస్తూ ఆదేశాలు జారీ అయ్యాయి. 

జలవనరుల శాఖ ముఖ్య కార్యదర్శి శశిభూషణ్ కుమార్​కు పంచాయితీరాజ్ శాఖ ముఖ్య కార్యదర్శిగా అదనపు బాధ్యతలు అప్పగించారు. మరోవైపు ఐఏఎస్ అధికారి ఏఎండి ఇంతియాజ్ స్వచ్ఛంద ఉద్యోగ విరమణతో ఖాళీ అయిన మైనారిటీ సంక్షేమ శాఖ అదనపు బాధ్యతల్ని సాంఘిక సంక్షేమ శాఖ కార్యదర్శి కె. హర్షవర్ధన్​కు అప్పగించారు. సెర్ప్ సీఈఓగా ఏపీ వైద్యసేవలు, మౌలిక సదుపాయాల వీసీఎండీ మురళీధర్ రెడ్డికి అదనపు బాధ్యతలు ఇచ్చారు. అదనపు సీసీఎల్ఏ, సీసీఎల్ఏ కార్యదర్శిగా హౌసింగ్ కార్పోరేషన్ ఎండీ వెంకటరమణా రెడ్డికి అదనపు బాధ్యతలు అప్పగిస్తూ సీఎస్ ఉత్తర్వులు ఇచ్చారు.