విద్యుత్ ఛార్జీలు పెంచిన ఘనత జగన్​దే: మాజీ మంత్రి పల్లె రఘునాథ్ రెడ్డి

Palle Raghunatha Reddy Demand Continues Electricity Supply: అధికారంలోకి వస్తే విద్యుత్ ఛార్జీలు (Electricity Charges) పెంచమని చెప్పిన జగన్మోహన్ రెడ్డి నాలుగున్నర సంవత్సరాల్లో తొమ్మిది సార్లు పెంచి ప్రజలను మోసం చేశారని టీడీపీ ఇన్​ఛార్జ్ మాజీ మంత్రి పల్లె రఘునాథ్ రెడ్డి మండిపడ్డారు. నిరంతరాయంగా పగటి పూట రైతులకు 9 గంటలు నాణ్యమైన విద్యుత్ సరఫరా చేయాలని డిమాండ్ చేశారు.

 శ్రీ సత్యసాయి జిల్లా పుట్టపర్తి నియోజకవర్గం రైతులకు నాణ్యమైన విద్యుత్ సరఫరా చేయాలని డిమాండ్ చేస్తూ నియోజకవర్గ ఇన్​ఛార్జ్ పల్లె రఘునాథ్ రెడ్డి అధ్వర్యంలో తెలుగదేశం పార్టీ శ్రేణులు, పలువురు రైతులు ఓబులదేవరచెరువు విద్యుత్ సబ్​స్టేషన్​ను (electricity substation) ముట్టడించారు. తొమ్మిదిసార్లు విద్యుత్ ఛార్జీలు పెంచిన ఘనత జగన్​కే దక్కుతుందని పల్లె రఘునాథ్ రెడ్డి విమర్శించారు. 9 గంటలు నాణ్యమైన విద్యుత్ సరఫరా చేసేలా ప్రభుత్వం చర్యలు చేపట్టకుంటే ఆందోళన ఉద్ధృతం చేస్తామని హెచ్చరించారు. విద్యుత్ సరఫరా, రైతుల సమస్యల గురించి పట్టించుకోకుండా ముఖ్యమంత్రి తాడపల్లి క్యాంప్ కార్యాలయంలో కూర్చుంటున్నారని రఘునాథ్ రెడ్డి మండిపడ్డారు.