టెక్స్‌టైల్ రంగంలో నూతన పరిశ్రమలు, పెట్టుబడులను ఆకర్షించేలా నూతన విధానం: మంత్రి సవిత - Minister Savitha Review on Textile

Minister Savita Review on Textile Department with Officials: రాష్ట్రంలో త్వరలో టెక్స్​టైల్ అపారెల్ గార్మెంట్స్ పాలసీని అమల్లోకి తీసుకువస్తామని చేనేత, జౌళిశాఖ మంత్రి ఎస్ సవిత స్పష్టం చేశారు. టెక్స్​టైల్ రంగంలో నూతన పరిశ్రమల్ని, పెట్టుబడుల్ని ఆకర్షించేలా నూతన విధానం ఉంటుందని ఆమె వెల్లడించారు. సచివాలయంలో సంబంధిత శాఖ అధికారులతో మంత్రి సవిత సమీక్ష నిర్వహించారు. టెక్స్​టైల్ పాలసీలో భాగంగా నూతన పరిశ్రమలకు త్వరితగతిన అనుమతులు జారీ చేస్తామని మంత్రి తెలిపారు. ప్రస్తుతం రాష్ట్రంలో 9 టెక్స్​టైల్, అపారెల్ పార్కులు ఉన్నాయని తెలిపారు. ప్రభుత్వ ప్రైవేటు రంగంలోని ఈ ఆపారెల్ పార్కుల్ని మరింతగా అభివృద్ధి చేస్తామని మంత్రి స్పష్టం చేశారు. రాష్ట్రంలో 146 మెగా టెక్స్​టైల్ పరిశ్రమలు, 18,500 యూనిట్లు పనిచేస్తున్నాయని అన్నారు. రాష్ట్రంలో ఆగ్రో టెక్స్​టైల్, జియో టెక్స్​టైల్, మొబైల్ టెక్స్​టైల్ యూనిట్ల ఏర్పాటుకు విస్తృత అవకాశాలు ఉన్నాయని ఈ రంగాల్లోని పెట్టుబడులను ఆకర్షించేలా కార్యాచరణ ఉంటుందని మంత్రి సవిత తెలిపారు.