రాయితీ వరి విత్తనాలను పంపిణీ చేసిన ఎంపీ, ఎమ్మెల్యేలు - Subsidized Seeds Distribution

Distribution Subsidized Seeds to Farmers in Vizianagaram District : రైతులకు ఇబ్బందులు కలిగించకుండా సకాలంలో ఎరువులు, విత్తనాలను అందించాలని విజయనగరం ఎమ్మెల్యే పూసపాటి అదితి విజయలక్ష్మి వ్యవసాయ అధికారులకు సూచించారు. విజయనగరం జిల్లా జొన్నవలసలో రైతులకు రాయితీలో వరి విత్తనాలను పంపిణీ చేశారు. ఈ కార్యక్రమంలో ఎమ్మెల్యే విజయలక్ష్మీతో పాటు విజయనగరం ఎంపీ కలిశెట్టి అప్పలనాయుడు పాల్గొన్నారు. వైఎస్సార్సీపీ ప్రభుత్వంలో కర్షకులకు సకాలంలో ఎరువులు, విత్తనాలు అందలేదన్నారు. అలాంటి పరిస్థితులు మళ్లీ రాకుండా చూడాల్సిన బాధ్యత అధికారులదేనని గుర్తుచేశారు.

గత ప్రభుత్వ హయాంలో రైతులకు సకాలంలో ఎరువులు, విత్తనాలు అందక తీవ్ర ఇబ్బందులు ఎదుర్కొన్నారనీ ఎంపీ కలిశెట్టి అప్పలనాయుడు వ్యాఖ్యానించారు. అటువంటి పరిస్థితులు రైతులకు రానివ్వకుండా ప్రజాప్రతినిధులు, వ్యవసాయ అధికారులు సమష్టిగా కృషి చేయలని పిలుపునిచ్చారు. ఆయా ప్రాంతాలు బట్టి రైతులు ఏ పంటను పండిస్తారో దాని బట్టి విత్తనాలను ముందుగా సిద్ధం చేయలని అదితి విజయలక్ష్మి అధికారులకు సూచించారు. పదవి చేపట్టగానే జొన్నవలసలో విత్తనాలు పంపిణీ చేయడం ఆనందంగా ఉందని పేర్కొన్నారు.