అర్చకుల మధ్య ఘర్షణ - అసభ్య పదజాలంతో దూషించుకుంటూ దాడులు

Clash Between Priests in Tirupatamma Temple: ఎన్టీఆర్ జిల్లాలోని పెనుగంచిప్రోలు తిరుపతమ్మ ఆలయం (Penuganchiprolu Tirupatamma Temple)లో అర్చకుల మధ్య ఘర్షణ చోటు చేసుకుంది. మంగళవారంతో అమ్మవారి పెద్ద తిరునాళ్లు (Thirupatamma Ammavari Pedda Thirunallu) ముగిసిన సందర్భంగా ఈ రోజు ఉదయం ఆలయంలో పూర్ణాహుతి జరిగింది. అనంతరం మండల దీక్షలు ముగించుకున్న దీక్ష స్వాములు అమ్మవారిని దర్శించుకున్నారు. ఈ క్రమంలో పలువురు దీక్ష స్వాములు కానుకల రూపంలో అక్కడే ఉన్న కొందరి అర్చకులకు నగదు ఇచ్చారు. 

పెద్ద మొత్తంలో భక్తుల నుంచి అర్చకులు డబ్బులు వసూలు చేశారు. ఈ నగదును పంచుకునే క్రమంలో వారి మధ్య వివాదం రేగింది. అర్చకుల మధ్య వాగ్వాదం ఘర్షణకు దారి తీసింది. ఆలయంలో భక్తుల సమక్షంలో అర్చకులు ఒకరిపై మరొకరు అసభ్య పదజాలంతో దూషించుకుంటూ దాడులకు తెగబడ్డారు. దీంతో క్యూ లైన్​లో ఉన్న భక్తులు చొరవ తీసుకుని వారిని విడిపించారు. ఆలయంలో అర్చకులు కొట్టుకోవటం ఏంటని చీవాట్లు పెట్టారు. జరిగిన ఘటనతో ఆలయ అధికారులు అక్కడికి చేరుకుని అర్చకులను సముదాయించారు. అనంతరం ఘటనపై ఆలయ ఇన్​స్పెక్టర్​ (Temple Inspector) ఏఈవో (AEO)కు ఫిర్యాదు చేశారు.