వైవీ యూనివర్సిటీ ఇంఛార్జి వీసీని తొలగించాలని విద్యార్థి సంఘాల ఆందోళన - AISF Demands YVU Incharge Transfer

AISF Demands Transfer of YV University Incharge Vice-Chancellor : యోగి వేమన యూనివర్సిటీ ఇంఛార్జి ఉపకులపతి కృష్ణా రెడ్డిని తక్షణం బదిలీ చేయాలని ఏఐఎస్​ఎఫ్​ డిమాండ్ చేసింది. వైఎస్సార్ జిల్లా గంగనపల్లె వద్ద ఉన్న విశ్వవిద్యాలయ పరిపాలన భవనాన్ని ఏఐఎస్​ఎఫ్​ నాయకులు ముట్టడించారు. వైఎస్సార్సీపీ హయాంలో అనేక అవినీతి, లైంగిక వేధింపులకు పాల్పడ్డారని ఆరోపించారు. అలాంటి కృష్ణా రెడ్డిని తిరిగి యూనివర్సిటీ వీసీగా నియమించడం సరి కాదన్నారు. ఇంఛార్జి వీసీ కృష్ణారెడ్డికి వ్యతిరేకంగా ఏఐఎస్​ఎఫ్​ నాయకులు నినాదాలు చేశారు. 

గత ప్రభుత్వం కృష్ణా రెడ్డి తప్పులను కప్పి పుచ్చిందని వారు ఆరోపించారు. అలాంటి వీసీ ఉంటే మహిళా విద్యార్థులకు రక్షణ ఉండదని విమర్శించారు. గతంలో ప్రిన్సిపాల్​గా పని చేసినప్పుడు ఆయన లైంగిక వేధింపులకు పాల్పడ్డారనే విషయాన్ని సమాచార హక్కు చట్టం ద్వారా వెల్లడైనట్లు తెలిపారు. తక్షణం కృష్ణారెడ్డిని బదిలీ చేయాలని ఏఐఎస్​ఎఫ్​ నాయకులు డిమాండ్​ చేశారు. లేదంటే ఉద్యమాలు ఉద్ధృతం చేస్తామని వారు హెచ్చరించారు. ఏఐఎస్​ఎఫ్​ నేతలతోపాటు విద్యార్థులు సైతం ర్యాలీగా తరలివచ్చి వర్సిటీ ఎదుట పెద్ద ఎత్తున నినాదాలు చేశారు.