Whatsapp Video Status Length : అప్డేట్ల పరంగా ప్రముఖ మెసేజింగ్ ప్లాట్ఫామ్ వాట్సాప్ ఎప్పుడూ ముందుంటుంది. ఇప్పటికే ఎన్నో కీలక మార్పులను తన అప్లికేషన్లో తీసుకువచ్చిన మెటా, తాజాగా మరో సరికొత్త అప్డేట్ను తెచ్చేందుకు సిద్ధమయింది. అదే మన వాట్సాప్ ఖాతాలో నిమిషం నిడివిగల వీడియో స్టేటస్ను పోస్ట్ చేయడం.
అయితే ప్రస్తుతానికి కేవలం గరిష్ఠంగా 30 సెకన్ల వరకు ఉన్న వీడియోను మాత్రమే వాట్సాప్లో పోస్ట్ చేసే అవకాశం ఉంది. అంతకంటే పెద్ద వీడియోలను అప్‌లోడ్‌ చేయాలంటే మరో స్టేటస్ అప్డేట్ తప్పదు. అలా వీడియో నిడివి పెరుగుతున్న కొద్దీ స్టేటస్ అప్డేట్ల సంఖ్య పెరుగుతూ పోతుంది. ఇక వాట్సాప్ తీసుకురానున్న ఈ నయా అప్డేట్తో ఈ ఇబ్బంది తప్పనుంది. రానున్న రోజుల్లో ఇక 60 సెకన్ల లిమిట్గల వీడియోలను మన వాట్సాప్ అకౌంట్లో స్టేటస్గా పోస్ట్ చేసుకోవచ్చు.
ప్రస్తుతానికి వీరికి మాత్రమే
ఈ 1 మినిట్ నిడివిగల స్టేటస్ అప్డేట్ను వాట్సాప్ ఇప్పటికే ప్రయోగాత్మకంగా పరీక్షిస్తున్నట్లు సమాచారం. ప్రస్తుతానికి కొంతమంది బీటా యూజర్లకు మాత్రమే ఈ ఫీచర్ను అందుబాటులోకి తీసుకొచ్చినట్లు WABETA వెల్లడించింది. బీటా వెర్షన్‌ 2.24.7.3 డౌన్‌లోడ్‌ చేసుకున్నవారికి ఈ ఫీచర్ దశలవారీగా అందుబాటులోకి వస్తోందని తెలిపింది. అంటే మిగిలిన యూజర్లందరికీ ఇది అందుబాటులోకి రానుంది.
వాట్సాప్ పేమెంట్స్లో కీలక మార్పు
Whatsapp UPI Payments Feature : మరోవైపు వాట్సాప్ పేమెంట్స్‌కు సంబంధించి కూడా మెటా ఇటీవలే కొత్త అప్డేట్ను తీసుకువచ్చింది. తన యూజర్లు కోసం పేమెంట్స్ ఫీచర్ను మరింత సులభతరం చేసింది. చాట్‌ లిస్ట్‌లోనే క్యూఆర్‌ కోడ్ స్కానర్‌ కనిపించే విధంగా మార్పులు తీసుకువచ్చింది. వాస్తవానికి వాట్సాప్ దేశంలో తన యూపీఐ పేమెంట్స్ సేవలను ప్రారంభించి చాలా రోజులే అయ్యింది. కానీ దీనికి ఆశించిన స్థాయిలో మాత్రం ఆదరణ లభించటంలేదు.
ప్రస్తుతం వాట్సప్‌లో చెల్లింపులు చేయాలంటే త్రీ డాట్స్‌ మెనూలో పేమెంట్స్‌లోకి వెళ్లాల్సి వస్తోంది. ఇకపై ఆ అవసరం లేకుండా మనం ఎంచుకున్న కాంటాక్ట్‌ చాట్‌లోనే పై భాగంలో క్యూఆర్‌ కోడ్ సింబల్‌ ఉంటుంది. దానిపై క్లిక్‌ చేసి పేమెంట్స్ చేయవచ్చు. ఇది కూడా ప్రస్తుతం బీటా యూజర్లకు మాత్రమే అందుబాటులో ఉంది.
వాట్సాప్ 'సెర్చ్ బై డేట్' ఫీచర్ - ఎలా వాడాలంటే?
ఇకపై వాట్సాప్ పేమెంట్స్ మరింత ఈజీ - చాట్‌ లిస్ట్‌లోనే QR కోడ్!
