మస్క్‌కు బిగ్‌షాక్‌- 'ఎక్స్​'ను వీడి 'బ్లూ స్కై'లోకి యూజర్స్- కారణం ఇదే!

అనతి కాలంలోనే ప్రాచుర్యం పొందిన 'బ్లూ స్కై'- వినియోగదారులు ఎక్స్​ను ఎందుకు వీడుతున్నారు?

Why Users Leaving Elon Musks X: అమెరికా అధ్యక్ష ఎన్నికల్లో డొనాల్డ్ ట్రంప్ విజయం తర్వాత ఎలాన్​ మస్క్​ షేర్లు రాణించడం అందరికీ తెలిసిందే. ఇంతవరకూ బాగానే ఉంది. అయితే ఎలాన్​ మస్క్​ను ఒక విషయం మాత్రం కలవరపాటుకు గురిచేస్తోంది. ఇందుకు కారణం మస్క్ సోషల్ మీడియా ప్లాట్​ ఫారమ్ 'ఎక్స్​'ను అమెరికన్లు పెద్ద సంఖ్యలో విడిచిపెట్టి పోవటం.

ఇలా ఎక్స్​ను వీడి వెళ్లిన వారంతా 'బ్లూ స్కై' అనే కొత్త సామాజిక మాధ్యమాన్ని ఆశ్రయిస్తున్నారు. దీంతో ఈ సోషల్ మీడియా ప్లాట్​ఫారమ్ అనతి కాలంలోనే ఇది 10 మిలియన్ల సబ్‌స్క్రైబర్లను సొంతం చేసుకుంది. భారీ వృద్ధితో అమెరికాలో యాపిల్‌ స్టోర్‌, గూగుల్‌ ప్లే స్టోర్‌లో టాప్‌ ఛార్ట్‌లో నిలిచింది. అయితే అమెరికన్లు ఇలా భారీ సంఖ్యలో 'ఎక్స్'​ను ఎందుకు వీడుతున్నారు? దీనికి కారణం ఏంటంటే?

కారణం ఇదే!: అమెరికా అధ్యక్ష ఎన్నికల్లో రిపబ్లికన్ అభ్యర్థి డొనాల్డ్ ట్రంప్​ విజయంలో ఎలాన్​ మస్క్​ కీలక పాత్ర పోషించారు. ట్రంప్ ప్రచారానికి భారీ మొత్తంలో నిధులు సమకూర్చడంతో పాటు బలమైన మద్దతు అందించారు. ఇది కొంతమంది అమెరికన్లకు రుచించలేదు. దీంతో కొన్ని వర్గాలు అసంతృప్తిని వ్యక్తం చేశాయి. ఆ తర్వాత ట్రంప్​ కూడా ఎలాన్​ మస్క్​కు కీలక బాధ్యతలు అప్పగించడంతో ఆ వ్యతిరేకత తీవ్రరూపం దాల్చినట్లయింది.

ఇక ఎక్స్​ రైట్​-వింగ్​ భావజాలానికి మాత్రమే మొగ్గు చూపుతుందని భావించిన వారు ప్రత్యామ్నాయ మార్గాలను అన్వేషించడం మొదలు పెట్టారు. అంతేకాక 'ఎక్స్'​ తాజా నిబంధనలు కూడా ఇందుకు మరో కారణమైంది. మస్క్ రూపొందించిన ఏఐ చాట్​బాట్​ 'గ్రోక్​'కు యూజర్స్ పోస్ట్​ చేసే కంటెంట్​ను శిక్షణ కోసం వాడుకుంటామని ప్రకటించడంపై చాలా మంది వ్యతిరేకించారు.

ఏంటీ బ్లూ స్కై?: ఈ 'బ్లూ స్కై'ను ట్విటర్ మాజీ సీఈవో జాక్ డోర్సీ 2019లో ఇంటర్నల్ ప్రాజెక్ట్​గా ప్రారంభించారు. మొదట ఇన్విటేషన్‌ ఆధారంగా తీసుకొచ్చారు. ఆ తర్వాత దీన్ని ఈ ఏడాది పూర్తి స్థాయిలో అందుబాటులోకి తెచ్చారు. సెప్టెంబర్‌ వరకు దీనికి 10 మిలియన్‌ యూజర్లు మాత్రమే ఉండేవారు. అయితే అమెరికా అధ్యక్ష ఎన్నికల తర్వాత దీనికి ఒక్కసారిగా క్రేజ్‌ పెరిగిపోయింది. ప్రస్తుతం 19 మిలియన్‌ యూజర్లతో టాప్ ట్రెండింగ్‌లో కొనసాగుతోంది.

దీని స్పెషాలిటీ ఏంటో తెలుసా?: 'బ్లూ స్కై' ఇతర ప్లాట్​ఫారమ్​లకు కాస్త విభిన్నంగా ఉంటుంది. ఇది వినియోగదారుల డేటాను కంపెనీ సర్వర్​లో స్టోర్​ చెయ్యదు. యూజర్లు కావాలంటే స్వయంగా తమ సర్వర్​ను వాడుకునే అవకాశాన్ని కల్పిస్తుంది. అంతేకాక యూజర్లే తమ ఫీడ్​ను పూర్తిగా కస్టమైజ్ చేసుకునే సదుపాయం ఇందులో ఉంది. ఈ 'బ్లూ స్కై'లో పోస్ట్​ల ప్రాధాన్యం యూజర్ నిర్ణయంతో ఉంటుంది. దాని అల్గారిథమ్‌ పొలిటికల్‌ పోస్టులకు అంతగా ప్రాముఖ్యం ఇవ్వకపోవడం 'బ్లూ స్కై'కి కలిసొచ్చింది. దీంతో అధిక సంఖ్యలో అమెరికన్లు ఎక్స్​ను వీడి 'బ్లూ స్కై' పై మొగ్గు చూపుతున్నారు.