మీ పాత ఫోన్​, ల్యాప్​టాప్​ అమ్మేస్తున్నారా? ముందుగా ఈ 10 పనులు చేయండి!

Things To Do Before Selling Phone Or Laptop In Telugu : మనం పాత ఫోన్లను, ల్యాప్​టాప్​లను అమ్మేస్తూ ఉంటాం. దాని వల్ల మనకు కొంత మేరకు డబ్బులు వస్తాయి. కానీ అంతకంటే ఎక్కువ సమస్యలు వచ్చే ప్రమాదం కూడా ఉంటుంది. అందుకే ఈ ఆర్టికల్​లో ఫోన్స్​, ల్యాప్​టాప్స్, స్మార్ట్ టీవీలను అమ్మేసే ముందు చేయాల్సిన 10 కీలకమైన పనులు గురించి తెలుసుకుందాం.

Things To Do Before Selling Phone Or Laptop : నేటి టెక్నాలజీ యుగంలో ఎప్పటికపుడు కొత్తగా మార్కెట్లోకి వచ్చిన ఫోన్లు, ల్యాప్​టాప్​లను సొంతం చేసుకోవాలనుకుంటున్నారు యువత. అలా కొనేటప్పుడు పాత డివైజ్​లను అమ్మేయడం, పాడైన వాటిని పారేయడం చేస్తూ ఉంటారు. మన పాత మొబైల్స్, కంప్యూటర్లలో చాలా సమాచారం ఉంటుంది. ఆ డాటా మొత్తాన్ని క్లీన్ చేయకుండా అమ్మేస్తే, మన సమాచారం ఇతరుల చేతుల్లోకి వెళ్లి, మనం చిక్కుల్లో పడే ప్రమాదం ఉంది. అందుకే ఈ ఆర్టికల్​లో పాత ఫోన్లు, ల్యాప్​టాప్​లు, స్మార్ట్ టీవీలు, ట్యాబ్​లు అమ్మేసే ముందు చేయాల్సిన 10 కీలకమైన పనులు గురించి తెలుసుకుందాం.

1. డేటా బ్యాక్-అప్
   మీరు మీ మొబైల్, కంప్యూటర్​లను అమ్మేసే ముందు అందులోని ఫోటోలు, వీడియోలు, ఫైల్స్​ సహా ముఖ్యమైన డేటా మొత్తాన్ని హార్డ్ డ్రైవ్, హార్డ్ డిస్క్​ల్లో సేవ్ చేసుకోవాలి. అలాగే క్లౌడ్ సర్వీస్​ల్లోకి కూడా ఈ డేటాను అప్​లోడ్ చేసుకోవాలి. దీని వల్ల మీ విలువైన డేటా భద్రంగా ఉంటుంది.
2. రిమూవ్​ కనెక్టెడ్​ అకౌంట్స్​
   మొబైల్, కంప్యూటర్లలో మన గూగుల్ అకౌంట్​తో లాగిన్​ అయ్యుంటాము. ఆ అకౌంట్లలో మన ఫోటోలు, ఫోన్ నంబర్లు, బ్యాంకు ఖాతా వివరాలు, పాస్​వర్డ్​లు, ఇలా చాలా సున్నితమైన సమాచారం అంతా సేవ్ అయ్యుంటుంది. అందుకే పాత డివైజ్​లు అమ్మేసే ముందు, వాటిలోని అన్ని అకౌంట్ల నుంచి కచ్చితంగా లాగ్​-అవుట్​ కావాలి. అంతేకాదు, సదరు డివైజ్​ల్లోని డేటా మొత్తాన్ని తొలగించాలి. లేకుంటే, ఇతరుల చేతుల్లోకి మీ విలువైన సమాచారం మొత్తం వెళ్లిపోయే ప్రమాదం ఉంది.
3. ఎన్​క్రిప్షన్​
   చాలా మంది కంప్యూటర్​లోని ఫైల్స్ డిలీట్ చేస్తారు. హార్డ్​ డ్రైవ్​ని ఫార్మాట్ చేస్తారు. దీనితో ఇతరులు ఎవ్వరూ తమ డేటాను చూడలేరు అని అనుకుంటారు. కానీ ఇది పొరపాటు. లేటెస్ట్ సాఫ్ట్​వేర్స్ ఉపయోగించి, ఈ డేటాను తిరిగి రప్పించవచ్చు. అందుకే డేటా-వైపింగ్ సాఫ్ట్​వేర్​ను ఉపయోగించి, మీ డివైజ్​లోని డేటా మొత్తాన్ని తొలగించండి. లేదా డివైజ్​లోని డేటాను మరెవరూ యాక్సెస్​ చేయలేని విధంగా దానిని ఎన్​క్రిప్ట్ చేయండి. ఒకవేళ మీరు వాడేది నెట్‌వర్క్ అటాచ్డ్ స్టోరేజ్ (NAS) డివైజ్​ అయితే, డేటా డిలీట్ చేయడమే కాకుండా, RAID కాన్ఫిగరేషన్‌ను కూడా పూర్తిగా తొలగించాలి. ఇలా చేయడం ద్వారా మీ డేటాను ఇతరులు రికవర్ చేయలేరు.
4. ఫ్యాక్టరీ రీసెట్
   మీ డివైజ్​లో ఫ్యాక్టరీ రీసెట్ చేసే ముందు దానికి లింక్ చేసి ఉన్న అకౌంట్లన్నిటినీ తీసివేయండి. ఫ్యాక్టరీ రీసెట్ చేయడం ద్వారా మీ డివైజ్​లోని సమాచారం మొత్తం డిలీట్ అయిపోతుంది. డివైస్ సెట్టింగ్స్ కూడా రీసెట్ అవుతాయి. మీరు కొత్తగా కొన్నపుడు ఉన్న స్థితికి మీ డివైజ్​ చేరుతుంది.
5. రిమూవ్​ హార్డ్ డిస్క్
   హార్డ్​ డిస్క్​ల్లోనే మన డేటా అంతా సేవ్ అయ్యి ఉంటుంది. కనుక మీ కంప్యూటర్​లోని హార్డ్​ డిస్క్​ లేదా హార్డ్ డ్రైవ్​లను తీసేయండి. ఇలా చేయడం వల్ల మీ డేటా ఇతరుల చేతుల్లోకి వెళ్లకుండా సురక్షితంగా ఉంటుంది. ఒకవేళ మీరు పాత డివైజ్​ను పడేయాలనుకుంటే, వాటిని ధ్వంసం చేయడమే మంచిది. కాకపోతే లిథియం-అయాన్ బ్యాటరీలు ఉండే స్మార్ట్​ఫోన్లు, ట్యాబ్​లు, ల్యాప్​టాప్​ల విషయంలో చాలా జాగ్రత్తగా ఉండాలి. ఎందుకంటే, లిథియం-అయాన్ బ్యాటరీలను ధ్వంసం చేసేటప్పుడు అగ్నిప్రమాదం జరిగే అవకాశాలు ఉంటాయి. అలాగే వీటిని ధ్వంసం చేస్తే హానికర వాయువులు వెలువడతాయి. అందుకే ఇలాంటి వాటిని నిపుణుల సమక్షంలో ధ్వంసం చేయాల్సి ఉంటుంది.
6. హార్డ్ డిస్క్ డిస్ట్రక్షన్​​
   మీ డివైజ్​లో ఉన్న అత్యంత గోప్యమైన సమాచారం ఎవరికీ తెలియకుండా ఉండాలంటే, హార్డ్ డిస్క్​ను ధ్వంసం చేయడమే ఉత్తమం. వాస్తవానికి ప్రొఫెషనల్ డ్రైవ్ డిస్ట్రక్షన్ సర్వీసులు కూడా ఉంటాయి. వాళ్లకు మీ డివైజ్​ను ఇస్తే, వాళ్లే చాలా జాగ్రత్తగా, ఎలాంటి ప్రమాదాలు ఏర్పడకుండా మీ హార్డ్ డిస్క్​ను ధ్వంసం చేస్తారు.
7. చెక్ హిడెన్ డేటా
   స్మార్ట్​ డివైజ్​లు మనకు తెలియకుండానే డేటాను స్టోర్ చేసుకుంటాయి. కనుక ఇలాంటి హిడెన్ డేటాను మనం తొలగించాల్సి ఉంటుంది.
   నెట్​వర్క్​ రూటర్లు, ప్రింటర్లు, టీవీలు, కెమెరాలు, స్మార్ట్ ఫ్రిడ్జ్​లు డేటాను స్టోర్ చేసుకునే అవకాశం ఉంది. కనుక ఇలాంటి పరికరాల్లోని డేటాను పూర్తిగా డిలీట్​ చేయాలి.
8. వేర్వేరుగా పడేయాలి
   మీరు పాత డివైజ్​లను పారేయాలనుకుంటే, ముందుగా అందులోని ర్యామ్​, మెమోరీ కార్డు, హార్డ్ డిస్క్​, ఎస్​డీ కార్డు లాంటి వాటిని విడివిడిగా పడేయాలి. ఇలా చేయడం వల్ల ఇతరులు మన డివైజ్​లోని పరికరాలను సేకరించలేరు. వాటిని అసెంబుల్​ చేసి, డేటాను యాక్సెస్ చేయలేరు.
9. రిమూవ్ సీరియల్ నంబర్స్​
   మీ డివైజ్​లను పారేసేముందు దానిపై ఉంటే సీరియల్ నంబర్లను తొలగించండి. ఎందుకంటే, వీటిని ఉపయోగించి కొందరు వ్యక్తులు వారెంటీ క్లెయిమ్ చేసుకొంటుంటారు. ఇలాంటి మోసాలను అరికట్టాలంటే, కచ్చితంగా మొబైల్​పై ఉండే సీరియల్ నంబర్లను తొలగించాలి.
10. అవసరమైన వారికి ఇవ్వచ్చు
    మీ పాత డివైజ్​లో లైనెక్స్ అనే సాఫ్ట్​వేర్​ ఇన్​స్టాల్​ చేసి, దాని లైఫ్​స్పాన్ పెంచి ఉపయోగించుకోవచ్చు. లేదా రీసైక్లింగ్ కేంద్రాలకు వాటిని ఇవ్వవచ్చు. దీని వల్ల పర్యావరణానికి హానికలిగించే ఈ-వేస్టేజ్​ తగ్గుతుంది. లేదా పాఠశాలలు లేదా HAM రేడియో క్లబ్‌లను సంప్రదించి వారికి ఈ డివైజ్​లను ఇవ్వండి. వారు వీటిని సద్వినియోగం చేస్తారు.