Quick Share QR Code Feature Android : ఆండ్రాయిడ్ వినియోగదారులు ఇకపై ఒక్క క్లిక్తో ఫైల్స్ను సులభంగా షేర్ చేసుకొవచ్చు! ఇదివరకే ఉన్న క్విక్ షేర్ టూల్లో సరికొత్త యూఆర్ కోడ్ ఫీచర్ను తీసుకొస్తోంది గూగుల్. గతేడాది మేలో ఈ ఫీచర్ను టెస్ట్ చేసిన కంపెనీ, త్వరలో ఆండ్రాయిడ్ యూజర్లందరికీ అందుబాటులోకి తీసుకురానుంది. ఈ ఫీచర్ ఉపయోగించి ఆండ్రాయిడ్ యూజర్లు ఒక్క క్లిక్తో క్యూఆర్ కోడ్ను స్కాన్ చేసి ఫైల్స్ షేర్ చేసుకోవచ్చు.
యాపిల్ ఫోన్లలో ఉండే 'ఎయిర్డ్రాప్'లా, ఆండ్రాయిడ్ డివైజ్ల్లో ఫైల్స్ షేర్ చేసుకోవడానికి క్విక్ షేర్ ఉపయోగపడుతుంది. ఈ టూల్లోనే ఇప్పుడు సరికొత్త ఫీచర్ను తీసుకొచ్చింది గూగుల్. ఇంతకుముందు యూజర్లు ఫొటోలు, ఫైల్స్ షేర్ చేసుకునేందుకు క్విక్ షేర్లో యాప్లో కాంటాక్టులు లేదా నియర్బై షేర్ ఆప్షన్ను ఆన్ చేయాల్సి వచ్చేది. అప్పుడు రిసీవర్ డివైజ్ పేరు సెండర్ ఫోన్లో కనిపిస్తేనే ఫైల్స్ షేర్ అయ్యేవి. కానీ ఇప్పుడు ఇందులో కొత్తగా క్యూఆర్ కోడ్ ఫీచర్ను జోడించారు.
ఎలా పని చేస్తుంది?
క్విక్ షేర్ టూల్లో 'సెండ్ టు నియర్బై డివైజెస్' పేన్లో క్యూర్ కోడ్ ఆప్షన్ ఇచ్చారు. దానిపైన క్లిక్ చేస్తే ఒక క్యూఆర్ కోడ్ వస్తుంది. దాని పక్కన నంబర్, యూజర్ ఏ రకం ఫైల్స్ పంపించాలనుకుంటున్నారనే వివరాలు ఉంటాయి. అనంతరం ఫైల్స్ రిసీవ్ చేసుకునే యూజర్ ఆ క్యూ ఆర్ కోడ్ను స్కాన్ చేసి క్విక్ షేర్ లింక్పై క్లిక్ చేయాల్సి ఉంటుంది. ఆ తర్వాత ఒరిజినల్ ఫైల్స్ ట్రాన్స్ఫర్ అవుతాయి.
ఈ కొత్త ఫీచర్ వల్ల కాంటాక్ట్ల కోసం సెర్చ్ చేయడం, నియర్బై డివైస్ పేరింగ్ సమస్య తీరిపోతుంది. సమయం కూడా ఆదా అవుతుంది. అంతేకాకుండా ఒకటి లేదా అంతకంటే ఎక్కువ ఆండ్రాయిడ్ డివైజ్లు క్యూఆర్ కోడ్ను స్కాన్ చేయొచ్చు. దీంతో ఒకేసారి మల్టిపుల్ డివైజ్లకు ఒరిజినల్ ఫైల్స్ పంపించొచ్చు. అయితే గూగుల్ ఇప్పుడిప్పుడే ఈ ఫీచర్ను అందరికీ అందుబాటులోకి తీసుకొస్తోంది. కనుక ఈ ఫీచర్ను క్విక్ షేర్ లేటెస్ట్ వెర్షన్(వెర్షన్ 24.49.33) ఉన్నవాళ్లే ఉపయోగించుకోగలుగుతారు.
