AP Leaders Ready to Change Party: గత సార్వత్రిక ఎన్నికల్లో ఒక్క అవకాశం అంటూ జగన్మోహన్ రెడ్డి ఓటర్లను అడిగినట్టే ఇప్పుడు, ఆ పార్టీ నేతలు ఓటర్లను ఒక్క ఛాన్స్ అంటూ ఓట్లు అభ్యర్థిస్తున్నారు. అంతవరకూ బానే ఉందికానీ, ఓటర్ల చెవిలో వారి చెప్పే మాటలు వైఎస్సార్సీపీ కార్యకర్తలకు విస్తుగొలిపిస్తున్నాయి. వివిధ నియోజకవర్గాల్లో కొందరు నేతలు ఇదే ఫార్ములా అనుసరిస్తున్నారు. "నేను మీ వాడినే, ఒక్క అవకాశం ఇచ్చి గెలిపిస్తే తెలుగుదేశంలో చేరిపోతా", నియోజకవర్గంలో తాను, రాష్ట్రంలో తమ పార్టీ గెలుస్తుందనే నమ్మకం సన్నగిల్లుతోందని భావిస్తున్న పలువురు వైఎస్సార్సీపీ అభ్యర్థులు చెప్తున్న మాయమాటలివి.
ఈ మాట తీరు కేవలం ఏ ఒక్క నియోజకవర్గానికో పరిమితం కాలేదు. ఒకరిని చూసి మరొకరన్నట్లుగా ఎన్నికల సమయం దగ్గరపడుతున్న కొద్ధీ ఇదే మాటను తెలుగుదేశం కోర్ ఓటర్ల వద్ద నిర్లజ్జగా చెప్పేస్తున్నారు. ఉమ్మడి పశ్చిమగోదావరి జిల్లాల్లో తెలుగుదేశం పార్టీకి గట్టి పట్టున్న ఓ నియోజకవర్గం నుంచి గత ఎన్నికల్లో అనూహ్యంగా గెలిచి తొలిసారి ఎమ్మెల్యే అయిన వైఎస్సార్సీపీ నేత ఈసారి తిరిగి పదవిని నిలబెట్టుకునేందుకు ఓటర్లను ఇదే పనిగా ప్రాధేయపడుతున్నాడట.
సదురు నియోజకవర్గంలో మాస్ లీడర్గా, రాష్ట్రస్థాయి గుర్తింపు పొందిన తెలుగుదేశం అభ్యర్థిపై వైఎస్సార్సీపీ ప్రభుత్వం అదేపనిగా కేసులు పెట్టి వేధించటం వంటి పరిణామాలు నియోజకవర్గ శ్రేణుల్లో కసిని పెంచాయి. నియోజకవర్గంలో అధికార పెత్తనం తండ్రికి అప్పచెప్పటంతో ఆయనపై అనేక అవినీతి ఆరోపణలు వెల్లువెత్తాయి. తండ్రి చాటు బిడ్డగా, రాజకీయం చేసే నేతగా పేరున్న ఈ అభ్యర్థి తెలుగుదేశం నేతల మద్దతుదారుల ఇళ్లకు వెళ్లి కలుస్తున్నారు.
తాను కూడా తెలుగుదేశం పార్టీ అభిమానినేనని, కాకపోతే ఆ పార్టీ టిక్కెట్ రాకపోవటంతో వైఎస్సార్సీపీ నుంచి వచ్చిన అవకాశాన్ని సద్వినియోగం చేసుకుని ఎమ్మెల్యే అయ్యానని చెప్పుకుంటున్నాడట. ఈ ఎన్నికల్లో తెలుగుదేశం గెలుపు ఖాయమనే భావన సర్వత్రా వినిపిస్తున్నందున, మరొక్క అవకాశం ఇచ్చి తనను గెలిపిస్తే, ఫలితాలు రాగానే పసుపు తీర్థం పుచ్చుకుంటానంటూ నమ్మించే ప్రయత్నం చేస్తున్నాడు. అంత కష్టపడి వేరే పార్టీలో గెలిచి తెలుగుదేశం పార్టీలో చేరటం ఎందుకు, మా అభ్యర్థినే గెలిపించుకుంటామని తెలుగుదేశం నేతలు తెగేసి చెప్పేస్తుండటంతో ఆ నేతకు నిరాశే మిగులుతోంది.
నమ్మించే యత్నం చేస్తున్నా ఫలితం దక్కట్లేదట: అదే పశ్చిమ గోదావరి జిల్లాలో ఉన్న మరో ఎస్సీ నియోజకవర్గం మహిళా అభ్యర్థిదీ ఇదే పరిస్థితి. మంత్రివర్గంలో కీలక శాఖ నిర్వర్తించిన ఈ నాయకురాలు, 2009-14మధ్య ఎమ్మెల్యేగా చేశారు. గత ఎన్నికల్లో వైఎస్సార్సీపీ తరఫున పోటీ చేసి గెలుపొందగా, మంత్రివర్గ విస్తరణలో చోటు కల్పించటంతో పాటు కీలక శాఖను ఆమెకు అప్పగించారు.
తాజా ఎన్నికల్లో పనితీరు బాలేదంటూ ప్రాతినిధ్యం వహిస్తున్న నియోజకవర్గం నుంచి మరో స్థానానికి మార్చటంతో ఆమె తీవ్ర నిరాశకు లోనయ్యారు. కొత్త స్థానంలో నిలదొక్కుకోలేక, క్యాడర్ను కలుపుకోలేక తంటాలు పడుతున్న ఆ మంత్రి, ఇక ఎన్నికలు దగ్గరపడుతుండటంతో తెలుగుదేశం సానుభూతిపరుల్ని ప్రసన్నం చేసుకునే ప్రయత్నాలు ముమ్మరం చేశారు. గతంలో తెలుగుదేశం పార్టీ వీడి తప్పు చేశాననీ, ఈ ఒక్కసారి గెలిపిస్తే తాను మళ్లీ పార్టీలోనే చేరిపోతానని నమ్మించే యత్నం చేస్తున్నా ఫలితం దక్కట్లేదట.
'హే కృష్ణా' చరిత్ర పునరావృతమేనా? - వారు అసెంబ్లీలో అడుగుపెట్టలేరా! - Tension in ministers
తెగ తపన పడిపోతున్నారు: ఉమ్మడి కృష్ణా జిల్లాలో గెలుపుపై ఆశలు పూర్తిగా సన్నగిల్లిన ఇద్దరు నేతలు తెలుగుదేశం పార్టీతో తమకున్న అనుబంధాన్ని ఆ పార్టీ సానుభూతిపరుల వద్ద గుర్తుచేసుకునేందుకు తెగ తపన పడిపోతున్నారు. రాజకీయ చైతన్యం కలిగిన ఓ నియోజకవర్గం నుంచి వరుసగా 2సార్లు తెలుగుదేశం పార్టీ నుంచి గెలుపొందిన ఓ ఎమ్మెల్యే తర్వాత వైఎస్సార్సీపీలో చేరారు. సదురు నేతకు పార్టీ గతంలో విజయవాడ ఎంపీగా పోటీచేసే అవకాశమూ కల్పించింది. తాజా ఎన్నికల్లో ప్రతికూల పరిస్థితుల్ని బేరీజు వేసిన ఆ అభ్యర్థి ఈ ఒక్కసారి తనను గెలిపిస్తే మళ్లీ అధికారంలోకి వచ్చే తెలుగుదేశానికే వచ్చేస్తానంటూ ప్రాధేయపడుతున్నాడు.
అసెంబ్లీలో చంద్రబాబు కన్నీటికి కారకుడైన నువ్వు ఆ ఒక్క తప్పూ చేయకుండా ఉంటే, ఎంతోకొంత ఆలోచించేవాళ్లం అనే సమాధానం కొందరు చెప్తుంటే, గెలిచినా, ఓడినా తెలుగుదేశం పార్టీలోకి ఈసారి ప్రవేశం లేకుండా గట్టిగా పోరాడతామని ఇంకొందరు తేల్చి చెప్పేస్తున్నారట. సదరు నేత నియోజకవర్గానికి ఆనుకుని ఉన్న మరో స్థానం నుంచి పోటీ చేస్తున్న ఓ యువనేత పరిస్థితీ అంతే దారుణంగా ఉంది. జిల్లాలో చక్రం తిప్పిన తన తండ్రికి ఉన్న ఇమేజ్తో ఒక్కసారైనా ప్రజాప్రతినిధిగా గెలవాలని తపనపడే ఆ యువనేత, ఒక్క అవకాశం అంటూ తట్టని తలుపు లేదు.
ఆధ్యాత్మిక క్షేత్రంలో హోరాహోరీ పోరు- గెలిచేదెవరు తిరుమలేశా? - Tirupati Lok Sabha elections 2024
ముఖం మీదే చెప్పేస్తున్నారట: పార్టీ ఆవిర్భావం నుంచి తమ కుటుంబం తెలుగుదేశంతోనే ఉందనే విషయాన్ని గుర్తు చేస్తూ జగన్ను చూసి కాకుండా తనను చూసి ఒక్క అవకాశం కల్పిస్తే మళ్లీ సొంత గూటికే చేరుతానంటూ ఆ అభ్యర్థి ఓటర్లను విజ్ఞప్తి చేస్తున్నాడు. బాబాయ్, పిన్నీ, అక్కా, బావా, అన్నా, వదినా అంటూ నగరంలోని తెలుగుదేశం సానుభూతిపరుల ఇళ్లకు అదే పనిగా వెళ్తున్నాడు. తెలుగుదేశం పార్టీ మీద అంత అభిమానం ఉంటే, పార్టీ కేంద్ర కార్యాలయంపై జరిగిన దాడిలో ఎందుకు పాల్గొన్నావ్ అంటూ వేసే ప్రశ్నతో ఆ యువనేత ఖంగుతింటున్నాడు. జగన్ మెప్పు కోసం చేసిన చారిత్రక తప్పిదం తిరిగి పార్టీలోకి అన్ని దారులూ మూసేసేలా చేశాయని ముఖం మీదే చెప్పేస్తున్నారట.
ఆ యువనేత కాంగ్రెస్లో ఉండగా ఆ పార్టీ ఓడిపోవటం, తర్వాత తెలుగుదేశం నుంచి పోటీ చేస్తే గత ఎన్నికల్లో పార్టీ ఓటమి చెందటం వంటి పరిణామాలను ఇంకొందరు గుర్తు చేస్తున్నారట. గెలిచే పార్టీని వదిలి ఎప్పుడూ ఓడిపోయే పార్టీ నుంచి పోటీ చేసే సెంటిమెంట్ ఉన్న ఆ నేత మళ్లీ తెలుగుదేశంలోకి రాకూడదనే కోరుకుంటున్నారట.
అనకాపల్లి బెల్లం రుచి చూడబోయేది ఎవరు - ఎంపీ బరిలో పోటాపోటీ - anakapalli lok sabha seat
తరచూ పార్టీలు మారటం ఆనవాయితీ: నెల్లూరు జిల్లాకు చెందిన మరో నేతకు తరచూ పార్టీలు మారటం ఆనవాయితీ. అధికారంలో ఉన్న పార్టీలో ఉండటం, వివిధ కాంట్రాక్ట్ పనులు చేయటం, ఎన్నికల సమయంలో ఓటర్ల నాడి తెలుసుకోవటం, ప్రభుత్వం నుంచి బిల్లులు మంజూరు కాగానే గెలిచే పార్టీలోకి మారిపోవటం ఆ సీనియర్ నేతకు అలవాటు. గత తెలుగుదేశం ప్రభుత్వ హయాంలో ఇలానే పెద్దమొత్తంలో ప్రభుత్వం నుంచి బిల్లులు మంజూరు కాగానే ఎన్నికల ప్రచార రథం దిగి వెంటనే వైఎస్సార్సీపీలో చేరిపోవటం అందరినీ విస్మయానికి గురిచేసింది.
ఈసారి తెలుగుదేశంలో అలానే చేరేందుకు యత్నించిన సదురు నేత జిమ్మిక్కులకు వైఎస్సార్సీపీ ప్రభుత్వం బ్రేకులు వేసింది. బిల్లులు మంజూరు చేస్తే ఎట్టి పరిస్థితుల్లోనూ తెలుగుదేశంలోకి వెళ్లిపోతాడనే ఉద్దేశంతో కొన్ని బిల్లుల్ని పెండింగ్లో పెట్టింది. వైఎస్సార్సీపీ నుంచి బలవంతంగా పోటీ చేస్తున్న తనును ఈసారి ఎన్నికల్లో గెలిపిస్తే మళ్లీ తెలుగుదేశంలోకే వచ్చేస్తానంటూ ఓటర్లను నమ్మించే యత్నం చేస్తున్నాడట. ఓటర్లు మాత్రం ప్రస్తుతం తెలుగుదేశం నుంచి పోటీ చేస్తున్న అభ్యర్థికి వైఎస్సార్సీపీలో జరిగిన అన్యాయాన్ని గుర్తు చేస్తూ ఆయనవైపే తాము కూడా అని తేల్చి చెప్పేస్తున్నారట.
