How to Make Cauliflower Fry Recipe : పోషకాలు పుష్కలంగా ఉండే కూరగాయల్లో క్యాలీఫ్లవర్ కూడా ఒకటి. ఆరోగ్యానికి ఎంతో మేలు చేసే దీనిని కొందరు తినడానికి అంతగా ఇష్టపడరు. మీ ఇంట్లో కూడా క్యాలీఫ్లవర్ కర్రీ తినడానికి ముఖం తిప్పుకుంటున్నారా ? అయితే, ఒక్కసారి ఈ స్టోరీలో చెప్పిన విధంగా "క్యాలీఫ్లవర్ ఫ్రై" ట్రై చేయండి. ఇష్టపడని వారు కూడా తింటారు. ఈ క్యాలీఫ్లవర్ వేపుడు అన్నం, చపాతీల్లో ఎంతో అద్భుతంగా ఉంటుంది. మరి ఇక లేట్ చేయకుండా సింపుల్గా ఎంతో టేస్టీగా క్యాలీఫ్లవర్ ఫ్రై చేయడానికి కావాల్సిన పదార్థాలు.. తయారీ విధానం ఏంటో మీరు చూడండి..
కావాల్సిన పదార్థాలు..
- క్యాలీఫ్లవర్-400 గ్రాములు
- ఉల్లిపాయ-1
- పచ్చిమిర్చి-3
- పసుపు-పావు టీస్పూన్
- నూనె
- ఉప్పు-రుచికి సరిపడా
- కారంపొడి-ఒకటిన్నర టీస్పూన్లు
- జీలకర్ర-అరటీస్పూన్
- ధనియాలు-టీస్పూన్
- వెల్లుల్లి రెబ్బలు-6
- నువ్వులు-2 టేబుల్స్పూన్లు
- కరివేపాకు-1
తయారీ విధానం :
- ముందుగా క్యాలీఫ్లవర్ శుభ్రం చేసుకుని కాస్త పెద్ద ముక్కలుగా కట్ చేసుకోవాలి. అలాగే ఉల్లిపాయ, పచ్చిమిర్చి సన్నగా కట్ చేయాలి.
- ఇప్పుడు స్టౌపై ఒక గిన్నె పెట్టండి. ఇందులో 3 గ్లాసుల నీరు, కొద్దిగా ఉప్పు, పసుపు వేసి బాగా మరిగించండి.
- నీరు బాగా మరుగుతున్నప్పుడు స్టౌ ఆఫ్ చేసి.. క్యాలీఫ్లవర్ ముక్కలు వేయండి.
- వీటిని 10 నిమిషాలు అలా వదిలేసి.. ఒక ప్లేట్లోకి తీసుకోండి.
- అలాగే మిక్సీ గిన్నెలోకి కారం, జీలకర్ర, ధనియాలు, వెల్లుల్లి రెబ్బలు, నువ్వులు వేసి మెత్తగా గ్రైండ్ చేసుకోండి.
- ఇప్పుడు స్టౌపై పాన్ పెట్టి ఆయిల్ వేయండి. నూనె వేడయ్యాక సగం ఉడికించున్న క్యాలీఫ్లవర్ ముక్కలు వేయండి. క్యాలీ ఫ్లవర్ ముక్కలను మధ్యమధ్యలో కలుపుతూ.. దోరగా అయ్యేంత వరకు ఫ్రై చేసుకోండి.
- తర్వాత వాటిని ఒక ప్లేట్లోకి తీసుకోండి.
- అదే నూనె ఆవాలు, జీలకర్ర, పచ్చి శనగపప్పు, మినప్పప్పు వేసి దోరగా వేయించుకోండి. తాలింపు వేగిన తర్వాత పచ్చిమిర్చి, ఉల్లిపాయలు వేసి ఫ్రై చేసుకోండి.
- ఉల్లిపాయలు గోల్డెన్ కలర్లో ఫ్రై అయిన తర్వాత కరివేపాకు వేసి కలపండి.
- ఆపై ఆయిల్లో ఫ్రై చేసుకున్న క్యాలీఫ్లవర్ ముక్కలు, కొద్దిగా పసుపు, ఉప్పు వేసి కలపండి.
- 2 నిమిషాల తర్వాత ఇందులో గ్రైండ్ చేసిన కారంపొడి మిశ్రమం వేసి కలపండి.
- ఒక నిమిషం తర్వాత కొద్దిగా కొత్తిమీర తరుగు చల్లి స్టౌ ఆఫ్ చేసుకుంటే సరిపోతుంది. ఎంతో రుచికరమైన క్యాలీఫ్లవర్ వేపుడు మీ ముందుంటుంది.
ఇవి కూడా చదవండి :
మళ్లీ మళ్లీ తినాలనిపించే నార్త్ ఇండియా రెసిపీ - "దహీ ఆలూ కర్రీ"ని ఇలా ప్రిపేర్ చేయండి!
అప్పటికప్పుడు చేసుకునే "ఇన్స్టంట్ పల్లీ చట్నీ" - అన్ని టిఫెన్స్లోకి సూపర్ కాంబో!
