Women Pushing An RTC Bus In Warangal : మహాలక్ష్మి పథకంలో భాగంగా రాష్ట్రంలోని మహిళలకు ఆర్టీసీ బస్సుల్లో ప్రభుత్వం ఉచిత బస్సు సౌకర్యం కల్పిస్తుంది. దీంతో ఆర్టీసీ బస్సుల్లో ప్రయాణించే మహిళా ప్రయాణికుల సంఖ్య గణనీయంగా పెరిగింది. మహిళా ప్రయాణికులతో ఆర్టీసీ బస్సులన్నీ కిక్కిరిసిపోతున్నాయి. దీంతో మగవాళ్లు సీట్లు లేక నిలబడాల్సి వస్తుంది. కానీ బస్సుల్లో ఎక్కిన మహిళలకు కూడా కొన్ని కొన్నిసార్లు పలు తిప్పలు తప్పడం లేదు. ఆర్టీసీ బస్సుల్లో ఉచితంగా ప్రయాణం చేయడమే కాదు, అప్పుడప్పుడు మొరాయించిన బస్సులనూ తొయ్యాల్సిన అవసరం ఆ బస్సులో ప్రయాణించే మహిళకు ఉంటుందని వరంగల్ జిల్లాలో చోటుచేసుకున్న ఘటన రుజువు చేసింది.
వివరాల్లోకి వెళ్తే : వరంగల్-నల్గొండ ప్రధాన దారిలో మహబూబాబాద్ నుంచి వరంగల్ వస్తున్న పల్లె వెలుగు బస్సు శనివారం తీగరాజుపల్లి సమీపంలో మొరాయించింది. దీంతో డ్రైవర్ బస్సును తోయాల్సిందిగా ప్రయాణికులను కోరారు. బస్సులో మగవాళ్లు ఎక్కువ మంది లేరు. కొంత మంది ఉన్నా, తమకు సీట్లే ఇవ్వట్లేదు, తాము ఎందుకు నెట్టాలి అనుకున్నారో ఏమో కానీ బస్సులో ఉన్న మహిళలే దిగి బస్సును తోసారు.
బస్సును తోసినా ప్రయోజనం లేకపోవడంతో బస్సును అక్కడే నిలిపి వేసిన డ్రైవర్, చివరకు ప్రయాణికులను మరో బస్సు ఎక్కించి పంపించారు. ఇటీవల కాలంలో బస్సులు నగరంలో ఎక్కడ పడితే అక్కడే మొరాయిస్తున్నాయని, వాటికి పూర్తి స్థాయి మరమ్మతులు చేయించేలా అధికారులు చర్యలు తీసుకోవాలని ప్రజలు కోరుతున్నారు. ఇందుకు సంబంధించిన వీడియో సోషల్ మీడియాలో వైరల్గా మారగా, ఫ్రీగా బస్సు జర్నీ చేసినప్పుడు, అప్పుడప్పుడు ఇలాంటి 'ఫ్రీ' తిప్పలు తప్పవు మరి అంటూ కామెంట్లు పెడుతున్నారు.
ఫ్లై ఓవర్పై డివైడర్ను ఢీకొట్టిన ఆర్టీసీ బస్సు - త్రుటిలో తప్పిన పెను ప్రమాదం
ప్రయాణికులతో వెళ్తున్న బస్సును సడెన్గా నిలిపివేసిన డ్రైవర్ - ఏమైందంటే?
