యువతిపై ఆకతాయి చేష్టలు - నిలదీసినందుకు తండ్రి గొంతు కోశాడు - Two Men assaulted women

Two men assaulted women in Hyderabad : ఓ యువతిపై ఇద్దరు ఆగంతకులు వేధింపులకు పాల్పడగా ఈ విషయంపై నిలదీయడానికి వెళ్లిన ఆమె తల్లిదండ్రుపై సైతం దాడికి దిగారు. ఈ క్రమంలో ఓ యువకుడు ఏకంగా కూరగాయల కత్తితో యువతి తండ్రి గొంతు కోశాడు. ఆపై అడ్డువచ్చిన తల్లిపై కూడా కత్తితో దాడి చేశాడు.

Two Men assaulted women in Hyderabad : హైదరాబాద్ నగర్ శివారు నార్సింగి పోలీస్ స్టేషన్ పరిధిలో ఇద్దరు ఆకతాయిలు యువతిపై వేధింపులకు పాల్పడ్డారు. మణికొండ నెమలి నగర్ కాలనీలో కిరాణా దుకాణానికి వెళ్లిన విద్యార్థిని పట్ల అసభ్యకరంగా ప్రవర్తించారు. హోలీ పండుగ రోజు దొరకలేదంటూ సురేశ్​ అనే యువకుడు విద్యార్థిని ఒంటిపై నీళ్లు పోశాడు. ఈ క్రమంలో యువతి అతడి నుంచి తప్పించుకొని ఏడుస్తూ ఇంటికి వెళ్లింది. ఈ విషయాన్ని ఇంట్లో చెప్పగా నిలదీయడానికి వెళ్లిన యువతి తల్లిదండ్రులపై సైతం కూరగాయల కత్తితో సురేశ్​, అతని తమ్ముడు ప్రవీణ్​ దాడి చేశారు.

సురేశ్​ తమ్ముడు ప్రవీణ్ కత్తితో యువతి తండ్రి గొంతు కోశాడు. అడ్డువచ్చిన యువతి తల్లిపైన కూడా కత్తితో దాడికి దిగాడు. దీంతో బాధితులు నార్సింగి పోలీస్​ స్టేషన్​లో ఫిర్యాదు చేయగా పోలీసులు కేసు నమోదు చేశారు. నిందితులపై 354డీ, 354 ఐపీసీ సెక్షన్లతో పాటు నిర్భయ చట్టం కింద కేసు నమోదు చేసి ప్రవీణ్, సురేశ్​ను అరెస్ట్ చేశారు. అనంతరం నిందితులను రిమాండ్​కు తరలించారు.