Tollywood Celebrities Meet CM Revanth Reddy : ఇకపై బెనిఫిట్ షోలు ఉండవని సీఎం రేవంత్ రెడ్డి సినీ ప్రముఖులకు తేల్చి చెప్పారు. అసెంబ్లీలో ఇచ్చిన మాటకు కట్టుబడి ఉంటామని తెలిపారు. శాంతిభద్రతల విషయంలో రాజీపడే ప్రసక్తే లేదన్నారు. ప్రభుత్వం ఇండస్ట్రీతోనే ఉంటుందన్నారు. అభిమానుల్ని కంట్రోల్ చేసుకోవాల్సిన బాధ్యత సెలబ్రిటీలదేనని అన్నారు. తెలంగాణ అభివృద్ధిలో పరిశ్రమ సామాజిక బాధ్యతతో వ్యవహరించాలని సూచించారు. మాదకద్రవ్యాల నియంత్రణపై అవగాహన, మహిళా భద్రతపై ప్రచారంలో సినీ ప్రముఖులు చొరవ చూపాలన్నారు.
ఆలయ పర్యటకం, ఎకో టూరిజంను ప్రచారం చేయాలని ఆదేశించారు. ఇన్వెస్ట్మెంట్ల విషయంలోనూ ఇండస్ట్రీ సహకరించాలని కోరారు. ఇకపై బౌన్సర్లపై సీరియస్గా ఉంటామని హెచ్చరించారు. హైదరాబాద్లోని బంజారాహిల్స్లోని కమాండ్ కంట్రోల్ కేంద్రంగా ఈ సమావేశం జరిగింది. ఈ భేటీలో ఉపముఖ్యమంత్రి భట్టి విక్రమార్క, మంత్రి కోమటిరెడ్డి వెంకట్ రెడ్డి పాల్గొన్నారు. ఎఫ్డీసీ ఛైర్మన్ దిల్ రాజు ఆధ్వర్యంలో సుమారు 50 మంది సినీ ప్రముఖులు సీఎంతో సమావేశమయ్యారు.
సినీ పరిశ్రమ సమస్యలపై మంత్రివర్గ ఉపసంఘం : సినీ పరిశ్రమలో సమస్యల పరిష్కారానికి మంత్రివర్గ ఉపసంఘం ఏర్పాటుకు తెలంగాణ ప్రభుత్వం నిర్ణయం తీసుకుంది. టికెట్ ధరలు, బెనిఫిట్ షోలపై చర్చించి నిర్ణయించాలని సీఎం రేవంత్ రెడ్డి సూచించారు. అలాగే సినీ పరిశ్రమ సమస్యలపై చర్చించి నిర్ణయించాలన్నారు. సినీ పరిశ్రమ తరఫున సీఎంకు తెలుగు చలనచిత్ర వాణిజ్య మండలి వినతి పత్రం అందించింది.
మీడియాతో మాట్లాడిన ఎఫ్డీసీ ఛైర్మన్ దిల్ రాజు : హైదరాబాద్ను సినీ పరిశ్రమకు అంతర్జాతీయ హబ్గా చేసేందుకు చర్యలు తీసుకుంటామని ఎఫ్డీసీ ఛైర్మన్ దిల్ రాజు తెలిపారు. తెలంగాణ ప్రభుత్వం, సినీ పరిశ్రమకు మధ్య గ్యాప్ ఉందనే అపోహలున్నాయన్నారు. సినీ పరిశ్రమ అంశాలను తెలంగాణ ప్రభుత్వం దృష్టికి తెచ్చామని చెప్పారు. తెలుగు సినీ పరిశ్రమను ప్రపంచవ్యాప్తంగా చేయడమే తమ లక్ష్యమని స్పష్టం చేశారు. తెలుగు సినీ పరిశ్రమ అంశాలను మరోసారి భేటీలో చర్చిస్తామన్నారు. టికెట్ ధరలు, బెనిఫిట్ షోలు అనేవి చిన్న విషయాలని దిల్ రాజు పేర్కొన్నారు. ఎఫ్డీసీ ఆధ్వర్యంలో సీఎంతో భేటీ జరిగిందన్నారు.
తెలుగు సినిమాలకు జాతీయ స్థాయిలో స్పందన వస్తోందని ఎఫ్డీసీ ఛైర్మన్ దిల్ రాజు తెలిపారు. తెలుగు సినిమాను ప్రపంచస్థాయికి తీసుకెళ్లాలని రేవంత్ రెడ్డి చెప్పారని వివరించారు. సినీ పరిశ్రమ, ప్రభుత్వం కలిసి పని చేయాలని రేవంత్ రెడ్డి చెప్పారన్నారు. హైదరాబాద్లో హాలీవుడ్ చిత్రీకరణలు జరిగేందుకు సలహాలు కోరారన్నారు. చిత్రీకరణలకు ప్రభుత్వం తరఫున చేయాల్సిన ఏర్పాట్ల గురించి అడిగారని దిల్ రాజు చెప్పారు. ఎఫ్డీసీలో చర్చించి తెలంగాణ ప్రభుత్వానికి సూచనలు ఇస్తామని దిల్ రాజు వెల్లడించారు.
సీఎంతో మాట్లాడిన సినీ ప్రముఖులు :
హైదరాబాద్ ప్రపంచ సినిమా రాజధాని కావాలి : ప్రభుత్వం మూలధన పెట్టుబడులు కల్పిస్తేనే మన సినీ పరిశ్రమ ప్రపంచ స్థాయికి ఎదిగిందని సీఎంతో సినీ హీరో నాగార్జున తెలిపారు. హైదరాబాద్ ప్రపంచ సినిమా రాజధాని కావాలనేది మా కోరిక అని చెప్పారు. యూనివర్సల్ లెవల్లో స్టూడియో సెటప్లు ఉండాలన్నారు. సీఎంతో దర్శకుడు త్రివిక్రమ్ మాట్లాడుతూ.. మర్రి చిన్నారెడ్డి, అక్కినేని వల్లే పరిశ్రమ హైదరాబాద్కు వచ్చిందని గుర్తు చేశారు.
అంతర్జాతీయ ఫిల్మ్ ఫెస్టివల్ జరగాలి : అందరూ సీఎంలు సినీ పరిశ్రమను బాగానే చూసుకున్నారని దిగ్గజ దర్శకుడు రాఘవేంద్రరావు తెలిపారు. ప్రస్తుత ప్రభుత్వం సినీ పరిశ్రమను బాగా చూసుకుంటోందన్నారు. హైదరాబాద్లో అంతర్జాతీయ ఫిల్మ్ ఫెస్టివల్ నిర్వహించాలని కోరుతున్నామని రాఘవేంద్రరావు సీఎం రేవంత్ రెడ్డికి సూచించారు. ఎఫ్డీసీ ఛైర్మన్గా దిల్ రాజును నిర్మించడంపై సినీ పరిశ్రమ హర్షం వ్యక్తం చేస్తోందని సీఎంతో తెలిపారు.
సంధ్య థియేటర్ ఘటన మమ్మల్ని బాధించింది : ఎన్నికల ఫలితాల మాదిరిగానే సినిమా రిలీజ్ ఫస్ట్ డే ఉంటుందని సీనియర్ నటుడు మురళీమోహన్ అన్నారు. సంధ్య థియేటర్ ఘటన మమ్మల్ని బాధించిందన్నారు. సినిమా రిలీజ్లో పోటీ వల్లే ప్రమోషన్ కీలకంగా మారిందని తెలిపారు. ప్రపంచవ్యాప్తంగా రిలీజ్ ఉండటం వల్ల ప్రమోషన్ విస్త్రతంగా చేస్తున్నామని సీఎంతో మురళీమోహన్ వివరించారు.
చిన్న విషయాలను పట్టించుకోవద్దు : నేను చిన్నప్పటి నుంచి పరిశ్రమను చూస్తున్నానని, హైదరాబాద్ను మరో స్థాయికి తీసుకెళ్లాలని నిర్మాత శ్యాంప్రసాద్ రెడ్డి కోరారు. చిన్న చిన్న విషయాలను పట్టించుకోవద్దని సీఎంతో నిర్మాత శ్యాంప్రసాద్ రెడ్డి తెలిపారు.
ప్రభుత్వంపై మాకు పూర్తి నమ్మకం ఉంది : ప్రభుత్వంపై మాకు పూర్తిస్థాయిలో నమ్మకం ఉందని నిర్మాత దగ్గుబాటి సురేశ్ బాబు తెలిపారు. ప్రభుత్వం సాయంతోనే ఆ రోజుల్లో సినీ పరిశ్రమ చెన్నై నుంచి హైదరాబాద్కు వచ్చిందని గుర్తు చేశారు. నెట్ఫ్లిక్స్, అమెజాన్ సహా అన్ని ఏజెన్సీలకు హైదరాబాద్నే కేరాఫ్ అడ్రస్గా ఉండాలని సూచించారు. హైదరాబాద్ను ఇంటర్నేషనల్ ఫిల్మ్ డెస్టినేషన్ చేయాలనేది మా కల అని సీఎంతో నిర్మాత దగ్గుబాటి సురేశ్ బాబు తెలిపారు.
భేటీలో పాల్గొన్న సినీ ప్రముఖులు : అల్లు అరవింద్, సురేశ్బాబు, మైత్రి రవి, నవీన్, నాగవంశీ, సి. కల్యాణ్, గోపీ ఆచంట, శ్యామ్ ప్రసాద్ రెడ్డి, సుధాకర్ రెడ్డి, నాగార్జున, వెంకటేశ్, నితిన్, కిరణ్ అబ్బవరం, సిద్ధూ జొన్నలగడ్డ, త్రివిక్రమ్, కొరటాల శివ, వంశీ పైడితల్లి, అనిల్ రావిపూడి, బోయపాటి శ్రీను, వీర శంకర్, హరీశ్ శంకర్, ప్రశాంత్ వర్మ, సాయి రాజేశ్, వశిష్ఠ, బీవీఎస్ ప్రసాద్, కె.ఎల్. నారాయణ, రాఘవేంద్రరావు, మురళీమోహన్, స్రవంతి రవి కిశోర్, యూవీ వంశీ, రామ్ పోతినేని, కల్యాణ్ రామ్, శివ బాలాజీ, అడవి శేషు, వరుణ్ తేజ్, సాయి ధరణ్ తేజ్, బలగం వేణు, వి. విజయేంద్ర ప్రసాద్, పవర్ బాబీ, వేణు శ్రీరామ్, డీవీవీ దానయ్య, చినబాబు, తదితరులు సీఎంతో చర్చిస్తున్నట్లు సమాచారం.
ఇకపై బెనిఫిట్ షోలు ఉండవు - టికెట్ రేట్లు పెంపునకు అనుమతి ఉండదు! : మంత్రి కోమటిరెడ్డి
సందేశాత్మక, దేశభక్తి చిత్రాలకే టికెట్ రేట్ల పెంపునకు అనుమతి: కోమటిరెడ్డి
