రూ.9 వేల కోట్ల పైనే వరద నష్టం - కేంద్ర బృందానికి రాష్ట్ర ప్రభుత్వం నివేదిక - TG Govt Report on flood damages

Central Team Visit Telangana Flood Areas : తెలంగాణకు వరదల వల్ల రూ.9 వేల కోట్లపైనే నష్టం వాటిల్లిందని రాష్ట్ర ప్రభుత్వం కేంద్ర బృందానికి నివేదిక సమర్పించింది. ఈ నివేదికలో రాష్ట్రానికి ఉదారంగా సాయం చేయాలని విన్నవించింది. బుధవారం కేంద్ర బృందం వరద ప్రభావిత ప్రాంతాలను పరిశీలించి, రైతులతో మాట్లాడిన సంగతి తెలిసిందే.

TG Govt Submit Report on Flood Damage : తెలంగాణలో పది రోజుల క్రితం కురిసిన భారీ వర్షాల కారణంగా జన జీవనం అస్తవ్యస్తం అయింది. వరదల వల్ల ఏర్పడిన నష్టాన్ని పరిశీలించడానికి దిల్లీ నుంచి కేంద్ర బృందం వచ్చింది. వరదల వల్ల నష్టపోయిన జిల్లాల్లో పర్యటించింది. ఈ బృందానికి రాష్ట్ర ప్రభుత్వం భారీ వర్షాల కారణంగా రూ.9 వేల కోట్లకు పైనే నష్టం వాటిల్లిందని నివేదిక అందించింది. బాధితులకు పూర్తి స్థాయిలో సాయం చేయాలని విన్నవించింది.

నివేదికలో పొందుపరిచిన అంశాలు :

• భారీ వర్షాల వల్ల వచ్చిన వరదల దాటికి సూర్యాపేట, నల్గొండ, వరంగల్​, మహబూబాబాద్​, ములుగు, ఖమ్మం, నాగర్​ కర్నూల్​, భద్రాద్రి కొత్తగూడెం జిల్లాల్లో మొత్తం 8 రంగాలు తీవ్ర ప్రభావానికి గురయ్యాయని పేర్కొంది.
• ఉమ్మడి ఖమ్మం, నల్గొండ, వరంగల్​ జిల్లాల్లోని పట్టణాల్లో కాలనీలు, బస్తీలు, లోతట్టు ప్రాంతాలు మునిగి ప్రజా జీవనం అస్తవ్యస్తమైంది. మొదటిగా ప్రాథమిక నష్టం రూ.5,438 కోట్లుగా అంచనా వేయగా, అది దాదాపు రెట్టింపైంది.
• ఇప్పటి వరకు భారీ వర్షాలు, వరదలకు 35 మంది చనిపోయారు. 28,869 ఇళ్లు కూలగా, 17,916 మంది నిరాశ్రయులు అయ్యారు.
• మొత్తం 75,097 పశువులు భారీ వర్షాల వల్ల వచ్చిన వరదలకు కొట్టుకుపోయి చనిపోయాయి.

సచివాలయంలో ఫొటో ఎగ్జిబిషన్​ సందర్శన : వరద నష్టాన్ని పరిశీలించడానికి కేంద్ర హోంశాఖ సహాయ కార్యదర్శి కర్నల్​ కేపీ సింగ్​ నేతృత్వంలో ఆరుగురు సభ్యుల కేంద్ర బృందం బుధవారం రాష్ట్రానికి వచ్చింది. ముందుగా సచివాలయంలో ఏర్పాటు చేసిన వరద నష్టంపై ఫొటో ఎగ్జిబిషన్​ను తిలకించగా, ఆ తర్వాత వివిధ శాఖల ఉన్నతాధికారులు, సీఎస్​తో సమావేశమయ్యారు. ఆ కేంద్ర బృందానికి రాష్ట్ర విపత్తు నివారణ శాఖ ప్రత్యేక ప్రధాన కార్యదర్శి అర్వింద్​కుమార్​తో పాటు మిగిలిన శాఖల ఉన్నతాధికారులు నష్ట వివరాలను పవర్​ పాయింట్​ ప్రజెంటేషన్​ ద్వారా వివరించారు.

అతి తక్కువ సమయంలో చర్యలు తీసుకున్నాం : అతి తక్కువ సమయంలో వేగంగా చర్యలు తీసుకోవడంతోనే ప్రాణ నష్టం తగ్గింది. ముఖ్యంగా వాతావరణ శాఖకు స్పెషల్​ థ్యాంక్స్​. సీఎం, ఉపముఖ్యమంత్రి, మంత్రులు ఎప్పటికప్పుడు సమీక్షలు చేసి వరద ప్రభావాన్ని, సహాయక చర్యలను పర్యవేక్షించారు. ముఖ్యంగా వరద ప్రభావిత ప్రాంతాల్లో సహాయక చర్యలు వేగంగా చేయడానికి అవసరమైన నిధులను ఉదారంగా అందించండి. రాష్ట్రంలో అత్యవసర పరిస్థితుల్లో సహాయక చర్యల్లో పాల్గొనేందుకు ఎన్​డీఆర్​ఎఫ్​తో సమానంగా రాష్ట్రం ఏర్పాటు చేస్తున్న ప్రత్యేక బృందాలకు శిక్షణ, ఇతర సదుపాయాలు కల్పించడానికి ఎన్​డీఎంఏ ద్వారా సాయం అందించాలి. అని సీఎస్​ శాంతి కుమారి అన్నారు.

332 హెక్టార్ల విస్తీర్ణంలోని చెట్లు ఎలా కూలాయి : కేంద్ర బృందానికి పవర్​ పాయింట్​ ప్రజంటేషన్​ ద్వారా వరద ప్రభావంపై వివరిస్తున్న సందర్భంలో రాష్ట్ర విపత్తు నివారణ శాఖ ప్రత్యేక ప్రధాన కార్యదర్శి అర్వింద్​ కుమార్​కు ఓ ప్రశ్న ఎదురైంది. ఏటూరు నాగారం అడవిలో 332 హెక్టార్ల విస్తీర్ణంలో చెట్లు కూలాయని ప్రస్తావించారు. అలాగే అక్కడ జరిగిన పర్యావరణ విపత్తును వివరించారు. దీనిపై కేంద్రబృందం స్పందిస్తూ ఆ చెట్లు ఎలా కూలాయని, చెట్లు కూలడానికి మూలకారణం తెలుసుకునేందుకు సమగ్ర అధ్యయనం చేయాలని రాష్ట్ర అధికారులకు సూచించారు.