సైబర్​ నేరాల ఫిర్యాదుకు కొత్త పోర్టల్​ - ఇకనుంచి ఏ నిమిషంలోనైనా కంప్లైంట్ చేయొచ్చు

తెలంగాణలో సైబర్​ నేరాల ఫిర్యాదులు ఇక వేగవంతం - సైబర్​బాట్​ను పరిచయం చేయనున్న తెలంగాణ సైబర్​ సెక్యూరిటీ బ్యూరో

Cyber Bot : సైబర్​ నేరాలు రోజురోజుకీ పెరుగుతున్న నేపథ్యంలో ఫిర్యాదుల స్వీకరణకు తెలంగాణ సైబర్​ సెక్యూరిటీ బ్యూరో(TGCSB) చాట్​బాట్​ వ్యవస్థను అందుబాటులోకి తేనుంది. ఇకనుంచి బాధితులు నేరుగా చాట్​బాట్​ వ్యవస్థ ఇచ్చే సూచనలకు అనుగుణంగా వివరాలను నమోదు చేస్తే ఫిర్యాదులు నమోదు అవుతాయి. ఇప్పటికే ఇలాంటి తరహా వ్యవస్థను పంజాబ్​, గుజరాత్​లోని సూరత్​, అండమాన్​ నికోబార్​ తదితర పోలీస్​ విభాగాలు వినియోగిస్తున్నాయి. ఈ సైబర్​బాట్​ పేరుతో తీర్చిదిద్దిన చాట్​బాట్​ను టీజీసీఎస్​బీ ప్రయోగాత్మకంగా పరిశీలిస్తోంది.

ప్రస్తుతం సైబర్​ నేరానికి పాల్పడిన బాధితులు 1930కు ఫోన్​ చేయడమో, నేషనల్​ సైబర్​క్రైమ్​ రిపోర్టింగ్​ పోర్టల్​లో లాగిన్​ అయి ఫిర్యాదులు చేస్తున్నారు. 1930 నంబర్​కు తెలంగాణ నుంచి బాధితులు ఎవరైనా ఫోన్​ చేస్తే వెంటనే టీజీసీఎస్​బీ కాల్​సెంటర్​కు కాల్​ వెళుతుంది. ప్రస్తుతం ఈ కాల్​ సెంటర్​లో 20 మంది సిబ్బంది విధులు నిర్వహిస్తున్నారు. వీరంతా మూడు షిఫ్టుల్లో పని చేస్తున్నారు. ఈరోజుల్లో సైబర్​ నేరాలు పెరగడంతో పలువురు బాధితులు నిమిషాల తరబడి కాల్​వెయిటింగ్​లో ఉండాల్సిన పరిస్థితి వస్తోంది.

సైబర్​ బాట్ (ETV Bharat)

ఇలా వెయిటింగ్​ చేయించకుండా బాధితులకు లింక్​ పంపి, దానిలో వివరాలను నమోదు చేసి ఫిర్యాదు స్వీకరించే ప్రక్రియను సైబర్​ పోలీసులు అందుబాటులోకి తీసుకొచ్చారు.కానీ తాజాగా చాట్​బాట్​ ప్రయోగంపై టీజీసీఎస్​బీ ప్రత్యేకంగా దృష్టి సారించింది. ఈక్రమంలో 24 గంటలపాటు ఏ క్షణమైనా బాధితులు నేరుగా ఫిర్యాదు చేసేందుకు అవకాశం కల్పించనున్నారు. ఇందుకు వాట్సప్​ నంబర్​నూ కేటాయించనున్నట్లు సైబర్​ పోలీసులు వర్గాలు వెల్లడించాయి.

గోల్డెన్​ అవర్​తో ఎంతో ఉపయోగం : సాధారణంగా బాధితుల నుంచి సొమ్ము కాజేసే క్రమంలో సైబర్​ నేరస్థులు ఆ సొమ్మును తొలుత ఏదైనా పేమెంట్​ వ్యాలెట్​లోకి పంపిస్తారు. లేదా మరిన్ని ఖాతాలకు బదిలీ చేస్తారు. ఇలా బదిలీ చేసిన సొమ్మును ఏటీఎంల నుంచి డ్రా చేసుకుంటారు. ఇలా బాధితులు సొమ్ము పోగొట్టుకున్న తొలి గంటలోపే ఫిర్యాదు చేస్తో మొత్తం సొమ్ము రికవరీ చేసుకునే అవకాశం ఎక్కువగా ఉంది. దీన్నే గోల్డెన్​ అవర్​ అంటారు. బాధితుడు ఫిర్యాదు చేసిన వెంటనే ఖాతా నుంచి ఎక్కడికి నగదు బదిలీ అవుతుందో గుర్తించి, అక్కడినుంచి మరో ఖాతాకు బదిలీ కాకుండా సైబర్​ పోలీసులు నిలిపివేస్తారు. ఇలా ఆ సొమ్మును వెనక్కి తెప్పించి న్యాయ సలహా ప్రక్రియ అనంతరం బాధితుడికి అందిస్తారు.

ఫిర్యాదు చేసే సమయంలో ఈ సమాచారం దగ్గర పెట్టుకోండి :

• ఘటన ఎలా జరిగింది, లావాదేవీల వివరాలు
• బ్యాంక్​, మర్చంట్​, వ్యాలెట్​ వివరాలు
• ట్రాన్సాక్షన్​ ఐడీ నంబర్​, పోగొట్టుకున్న మొత్తం
• అనుమానిత యూఆర్​ఎల్​ లేదా సామాజిక మాధ్యమం వివరాలు
• అనుమానిత లావాదేవీల సాఫ్ట్​కాపీని అందించాలి.