Tenth Class Exam Paper Pattern in Telangana : తెలంగాణ రాష్ట్రంలో టెన్త్ క్లాస్ పరీక్షల ప్రశ్నపత్రాల స్వరూపంపై స్పష్టత లేకపోవడంతో ఉపాధ్యాయులు, విద్యార్థుల్లో అయోమయం నెలకొంది. కొత్త విధానం ఏంటన్నది తేలితేనే దానికి అనుగుణంగా విద్యార్థులను సన్నద్ధం చేయవచ్చని ప్రధానోపాధ్యాయులు చెబుతున్నారు. పాఠశాల స్థాయిలో నిర్వహించే ఎగ్జామ్స్ను కూడా అదే పద్ధతిలో నిర్వహించాల్సి ఉంటుందని, అందుకే ప్రభుత్వం త్వరగా స్పష్టత ఇవ్వాలని కోరుతున్నారు. మరోవైపు రాష్ట్ర విద్యా పరిశోధన, శిక్షణ సంస్థ (ఎస్‌సీఈఆర్‌టీ) సైతం ప్రభుత్వానికి ప్రతిపాదనలు పంపించడం గమనార్హం.
రాష్ట్రంలో 2021-22 విద్యా సంవత్సరం వరకు హిందీకి తప్ప మిగిలిన ఐదు సబ్జెక్టులైన తెలుగు, ఇంగ్లిష్, మ్యాథ్స్, సైన్స్, సోషల్కు రెండు పేపర్లు ఉండేవి. అంటే మొత్తం 11 పేపర్లు. దీని వల్ల పరీక్షల నిర్వహణ ఆలస్యమవుతుందని, విద్యార్థులు సైతం ఒత్తిడికి గురువుతున్నారని భావించిన రాష్ట్ర సర్కార్, రెండు పేపర్ల విధానాన్ని రద్దు చేసింది. ఆ స్థానంలో ఒక్కో సబ్జెక్టుకు ఒక పేపరు, అంటే మొత్తం ఆరు పేపర్ల విధానాన్ని అమల్లోకి తీసుకొచ్చింది. మ్యాథ్స్, సైన్స్, సోషల్‌లో ప్రశ్నల సంఖ్యను, ఛాయిస్‌ విధానాన్ని మార్చింది. అయితే ఈ మార్పు 2022-23, 2023-24 విద్యా సంవత్సరాలకు మాత్రమే వర్తిస్తుందని 2023 జనవరి 11న విద్యాశాఖ జీవో జారీ చేసింది. అంటే గత ఏడాదితో ప్రశ్నల సంఖ్య, ఆ ఛాయిస్‌ విధానం ముగిసిపోయింది.
599/600 - టెన్త్ ఫలితాల్లో సత్తా చాటిన మనస్వీ - AP SSC Toppers Inspiring Stories
స్పష్టత కోసం ఎదురుచూస్తున్న హెచ్‌ఎంలు : ప్రస్తుత విద్యా సంవత్సరం నుంచి ఈ విధానాన్ని మార్చాలా? కొనసాగించాలా? అన్నదానిపై ప్రభుత్వం ఉత్తర్వులు జారీ చేయాల్సి ఉంది. అంటే ప్రశ్నపత్రంలో ఏ విభాగంలో ఎన్ని ప్రశ్నలు ఇస్తారు? ఎన్నింటికి జవాబులు రాయాలన్న దానిపై నిర్ణయం తీసుకోవాలి. ప్రస్తుత విద్యా సంవత్సరం 2024-25లో ప్రశ్నాపత్రం విధానంపై నిర్ణయం తీసుకోవాలని రాష్ట్ర విద్యా పరిశోధన, శిక్షణ సంస్థ (ఎస్‌సీఈఆర్‌టీ) అధికారులు ప్రభుత్వానికి సుమారు నెల రోజులు క్రితమే ప్రతిపాదనలు ఇచ్చినట్లు సమాచారం. దానిపై ఇంకా నిర్ణయం వెలువడలేదు.
దీంతో రాష్ట్రవ్యాప్తంగా హెచ్‌ఎంలు ప్రశ్నపత్రం స్వరూపం తెలియక, విద్యార్థులను పరీక్షలకు ఎలా సన్నద్ధం చేయించాలని అయోమయంలో ఉన్నారు. ఈ విధానం టెన్త్ క్లాస్తో పాటు తొమ్మిదో తరగతికి కూడా వర్తిస్తుంది. ప్రభుత్వం స్పష్టత ఇస్తేనే సమ్మెటివ్‌ అసెస్‌మెంట్‌-1 పరీక్షలకు ఆ ప్రకారం సన్నద్ధం చేస్తామని హైదరాబాద్కు చెందిన హెచ్ఎం ఒకరు తెలిపారు. వచ్చే మార్చిలో జరిగే పదో తరగతి వార్షిక పరీక్షలకు దాదాపు 5.15 లక్షల మంది హాజరవుతారు. పాఠశాలలు పునః ప్రారంభమై దాదాపు రెండున్నర నెలలు అయినందున, విద్యార్థులు సైతం టీచర్లను క్వశ్చన్ పేపర్ల విధానం ఏంటని ప్రశ్నిస్తున్నారు.
చదువులు చాలించేస్తున్నారు!- పదో తరగతిలోపే బడి మానేస్తున్న విద్యార్థులు - DROPOUT RATE IN AP
