రామోజీరావుకు టీడీపీ వినూత్న నివాళి - 'ఎక్స్​'లో స్పెషల్ వీడియో

రామోజీ గ్రూపు సంస్థల వ్యవస్థాపక ఛైర్మన్ రామోజీరావు జయంతి సందర్భంగా టీడీపీ ఘన నివాళులు

TDP on Ramoji Rao Birth Anniversary: రామోజీ గ్రూపు సంస్థల వ్యవస్థాపక ఛైర్మన్ రామోజీరావు జయంతి సందర్భంగా తెలుగుదేశం పార్టీ (TDP) ఘనంగా నివాళులు అర్పించింది. తెలుగు సినీ, పత్రికా రంగానికి రామోజీరావు చేసిన సేవలను గుర్తు చేస్తూ ప్రత్యేకంగా వీడియో రూపొందించి సామాజిక మాధ్యమం ‘ఎక్స్‌’లో పోస్ట్‌ చేసింది. తెలుగు వెలుగు, నిత్య స్ఫూర్తి ప్రదాత, సమాజహిత వ్యాపారవేత్త అని కొనియాడుతూ రామోజీరావుకు టీడీపీ నివాళులు అర్పించింది.

తెలుగు వెలుగు
నిత్య స్పూర్తి ప్రదాత
సమాజ హిత వ్యాపారవేత్త
ఈనాడు సంస్థల వ్యవస్థాపక చైర్మన్, మార్గదర్శి రామోజీరావు గారి జయంతి సందర్భంగా తెలుగుదేశం పార్టీ నివాళులర్పిస్తోంది.#RamojiRao pic.twitter.com/NpwGXQfKMC

— Telugu Desam Party (@JaiTDP) November 16, 2024

1936 నవంబర్‌ 16వ తేదీన కృష్ణా జిల్లా పెదపారుపూడిలో చెరుకూరి వెంకటసుబ్బారావు, సుబ్బమ్మ దంపతులకు రామోజీరావు జన్మించారు. అక్కలు రాజ్యలక్ష్మి, రంగనాయకమ్మ తర్వాత రామోజీరావు జన్మించారు. కుటుంబసభ్యులు రామోజీకి ఆయన తాతయ్య రామయ్య పేరు పెట్టారు. స్కూల్​లో మాస్టారుకు తన పేరు రామోజీరావు అని చెప్పి, తన పేరును తానే పెట్టుకున్నారు. రామోజీరావు చిన్నప్పటి నుంచే విలక్షణ, సృజనాత్మకత ఉన్న వ్యక్తి. 1974 ఆగస్టు 10వ తేదీన విశాఖ సాగర తీరంలో ‘ఈనాడు’ దినపత్రికను ప్రారంభించి తెలుగునాట సంచలన సృష్టించారు.

ప్రతి రంగంలోనూ చెరగని ముద్ర: అడుగుపెట్టిన ప్రతి రంగంలోనూ రామోజీరావు చెరగని ముద్ర వేశారు. 1962లో మార్గదర్శి చిట్‌ఫండ్స్‌ను ప్రారంభించారు. దేశంలోనే అగ్రశ్రేణి చిట్‌ఫండ్స్‌ సంస్థగా మార్గదర్శి చిట్ ఫండ్స్ నిలిచింది. 60 ఏళ్లలో లక్షలాదిమంది క్లయింట్‌లకు నిబద్ధతతో సేవలు అందించారు. మార్గదర్శి సంస్థ ద్వారా వేల మందికి ఉద్యోగ, ఉపాధి అవకాశాలను కల్పించారు.

నలుగురు నడిచిన బాట కాకుండా కొత్త దారులు సృష్టించడం రామోజీ రావు నైజం. లక్ష్య సాధనకు దశాబ్దాలపాటు నిర్విరామంగా పరిశ్రమించిన యోధుడు ఆయన. రైతుబిడ్డగా మొదలైన రామోజీరావు వ్యాపారవేత్తగా రాణించారు. చివరి క్షణం వరకూ ప్రజా శ్రేయస్సు కోసమే పరితపించారు రామోజీరావు.

ఈనాడు గ్రూప్‌ సంస్థల ఛైర్మన్‌ చెరుకూరి రామోజీరావు జూన్ 8వ తేదీన కన్నుమూశారు. జూన్ 5వ తేదీన శ్వాస తీసుకోవడంలో ఇబ్బందులు ఎదురవడంతో హైదరాబాద్‌లోని ఓ ఆసుపత్రిలో చేర్చారు. అక్కడ చికిత్స పొందుతూ 8వ తేదీన తెల్లవారుజామున 4.50 గంటలకు తుదిశ్వాస విడిచారు. నేడు రామోజీ గ్రూప్‌ సంస్థల వ్యవస్థాపకుడు, పద్మ విభూషణ్ రామోజీరావు జయంతి సందర్భంగా ప్రముఖులు ఘనంగా నివాళులు అర్పించారు.