SP take Action on Police for ZPTC Husband Dance in Station : జయశంకర్ భూపాలపల్లి జిల్లాలోని మహాదేవపూర్ పోలీస్ స్టేషన్లో ఓ సినిమా పాటకు స్టెప్పులు వేసిన జడ్పీటీసీ భర్త శ్రీనివాస్ వైరల్ వీడియోపై ఉన్నతాధికారులు స్పందించారు. ఈ మేరకు ఠాణా పోలీసులపై ఎస్పీ కిరణ్ ఖరే చర్యలు చేపట్టారు. ఎస్సై కె.ప్రసాద్ను వీఆర్కు అటాచ్‌ చేస్తూ ఉత్తర్వులు జారీ చేయగా హెడ్ కానిస్టేబుల్ ఎస్.శ్రీనివాస్ను సస్పెండ్ చేశారు. ఇవాళ జిల్లాలోని మహాదేవపూర్ పోలీస్ స్టేషన్లో స్థానిక జడ్పీటీసీ భర్త గుడాల శ్రీనివాస్ డ్యాన్స్ చేయడంతో తీవ్ర కలకలం రేగింది.
రాష్ట్ర వ్యాప్తంగా- చర్చనీయంశం : ఈ ఘటన రాష్ట్ర వ్యాప్తంగా రాజకీయ దుమారంగా మారింది. పోలీస్ స్టేషన్లో ఓ రాజకీయ నాయకుడు ఇలా వ్యవహరించడంపై తీవ్రమైన విమర్శలు వెల్లువెత్తాయి. ఆయన డ్యాన్స్ చేసిన వీడియో సామాజిక మాధ్యమాల్లో విసృత్తంగా ప్రచారం అయ్యింది. నెటిజన్లతో పాటు పలువురు ఈ ఘటనపై తీవ్రంగా ఖండిస్తూ పోస్టులు పెట్టారు. నిత్యం ప్రజలు తమ బాధలను చెప్పుకోడానికి పోలీస్ స్టేషన్‌కు వెళ్తుంటే, జడ్పీటీసీ భర్త శ్రీనివాస్ మాత్రం డాన్స్‌ చేయడానికి వెళ్లాడంటూ పలువురు విమర్శించారు. కేసులతో హడావుడిగా ఉండే పోలీస్ స్టేషన్ డ్యాన్స్ క్లబ్గా మారిందంటూ నెటిజన్లు సైతం కామెంట్లు చేశారు.
ఈ వ్యవహారం రాష్ట్ర వ్యాప్తంగా చర్చనీయంశంగా మారడంతో దీనిపై జడ్పీటీసీ భర్త శ్రీనివాస్ మాట్లాడారు. ఆరోగ్యకరంగా ఉండానికి మార్నింగ్ వాక్లో భాగంగా అనారోగ్య సమస్యలు పరిష్కారం, ఒత్తిడి వాతావరణం, శారీరక శ్రమ, ప్రశాంతంగా ఉండాలని తెలియజేయడానికే పోలీస్ స్టేషన్లో డ్యాన్స్ చేసినట్లు జడ్పీటీసీ భర్త శ్రీనివాస్ తెలిపారు. పోలీస్ సిబ్బందిని ఉత్తేజ పరచడానికి, ఆరోగ్యంగా ఉండాలనే ఉద్దేశంతో డ్యాన్స్ చేశానని వివరించారు. కొంత మంది వక్రీకరించి దురుద్దేశంతో ఇలా ప్రచారం చేస్తున్నట్లు చెప్పారు.
'ఆరోగ్యంపై అవగాహన కల్పించడానికి, ఒత్తిడిని తగ్గించుకోవాలని డ్యాన్స్ చేసి అధికారులకు వివరించా. కాని తప్పుడుగా అర్థం చేసుకుని ప్రచారం చేస్తున్నారు.'- శ్రీనివాస్, జడ్పీటీసీ భర్త
ZPTC Husband Dance in Police Station : ఈ ఘటన రాష్ట్రవ్యాప్తంగా సంచలనంగా మారడంతో స్థానిక జిల్లా ఎస్పీ కిరణ్ ఖరే చర్యలు తీసుకున్నారు. మహాదేవపూర్ ఎస్సై కె.ప్రసాద్ను వీఆర్కు అటాచ్డ్ చేశారు. స్టేషన్ ఇన్ఛార్జిగా ఉండి, విధుల నిర్వహణలో అలసత్వం, నిర్లక్ష్యంగా వ్యవహరించారని హెడ్ కానిస్టేబుల్ సోయం శ్రీనివాస్ను సస్పెండ్ చేస్తూ ఉత్తర్వులు జారీ చేశారు. ప్రజలలో పోలీస్ శాఖ ప్రతిష్ఠను పెంచే విధంగా పనితీరు ఉండాలని, విధుల పట్ల నిర్లక్ష్యం వహిస్తే చర్యలు తప్పవని ఎస్పీ కిరణ్ ఖరే ఓ ప్రకటనలో తెలిపారు.
