రోడ్డు పక్కన కూరగాయలు అమ్మే వారిపైకి దూసుకెళ్లిన లారీ - నలుగురు దుర్మరణం

లారీ బీభత్సం - చేవెళ్ల రోడ్డు ప్రమాదంలో నలుగురు మృతి - ఐదుగురికి తీవ్ర గాయాలు - రోడ్డు పక్కన కూరగాయలు అమ్ముకునేవారిపైకి దూసుకెళ్లిన లారీ

Chevella Road Accident Update : రంగారెడ్డి జిల్లా చేవెళ్ల మండలం ఆలూరు స్టేజ్​ దగ్గర రోడ్డు పక్కన స్థానికులు కూరగాయలు విక్రయిస్తుంటారు. ఎప్పటిలాగే సోమవారం సాయంత్రం అంగడి సాగుతోంది. కూరగాయల వ్యాపారులు, కొనుగోలుదారులతో ఆప్రాంతం రద్దీగా ఉంది. ఈ సమయంలో హైదరాబాద్​ నుంచి వికారాబాద్​ వైపు వెళ్తున్న లారీ, ఆలూరు స్టేజి వద్ద నిలిపి ఉన్న ఆర్టీసీ బస్సును వేగంగా దాటేందుకు యత్నించింది. అదే సమయంలో ఎదురుగా ఓ కారు రావడంతో దానిని తప్పించే క్రమంలో లారీ డ్రైవర్​ అమీర్​ వాహనాన్ని పూర్తిగా కుడివైపునకు తిప్పాడు.

దీంతో వాహనం పూర్తిగా అదుపు తప్పి ఒక్కసారిగా రోడ్డు పక్కనే కూరగాయలు అమ్ముతున్న వారి మీదకు దూసుకెళ్లింది. ఒకరి తరవాత ఒకరిని తొక్కుకుంటూ వెళ్లి సమీపంలో ఉన్న ఓ చెట్టును ఢీకొని ఆగిపోయింది. అక్కడ ఉన్నవారు గమనించే లోపే జరగరాని ఘోరం జరిగిపోయింది. ప్రమాదంతో క్షతగాత్రులు సహాయం కోసం ఆర్తనాదాలు పెట్టారు. ఈ ప్రమాదంలో చేవెళ్ల మండలం ఆలూరు గ్రామానికి చెందిన నక్కలపల్లి రాములు, దామరగిద్ద కృష్ణ, నాంచేరి గ్రామానికి చెందిన శ్యామల సుజాత అక్కడికక్కడే దుర్మరణం పాలయ్యారు. టోలిచౌకీకి చెందిన జమీల్​ చేవెళ్ల ఆసుపత్రిలో చికిత్స పొందుతూ మరణించాడు. మరో ఐదుగురికి తీవ్ర గాయాలు అయ్యాయి. వీరిలో జమీల్​ అనే యువకుడు కూరగాయలు కొనేందుకు వచ్చి మృతి చెందాడని పోలీసులు తెలిపారు.

సీఎం రేవంత్​ దిగ్భ్రాంతి : ప్రమాదంలో గాయపడిన వారిని పట్నం మహేందర్​ రెడ్డి బోధనాసుపత్రికి తరలించారు. ఈ దుర్ఘటనకు కారణమైన లారీ డ్రైవర్​ తీవ్రంగా గాయపడ్డాడు. ప్రమాదంలో లారీ క్యాబిన్​ ధ్వంసమై అందులో చిక్కుకున్నాడు. అతన్ని బయటకు తీయడానికి దాదాపు గంటకు పైగా శ్రమించాల్సి వచ్చింది. అనంతరం 108 వాహనంలో అతడిని నగరంలోని ఉస్మానియా ఆసుపత్రికి తరలించారు. ఈ దుర్ఘటనపై సీఎం రేవంత్​ రెడ్డి తీవ్ర దిగ్భ్రాంతిని వ్యక్తం చేశారు. క్షతగాత్రులకు మెరుగైన వైద్యం అందించాలని అధికారులను ఆదేశించారు. ప్రమాద స్థలాన్ని మాజీ మంత్రి సబితా ఇంద్రారెడ్డి పరిశీలించారు. ఘటనకు ప్రభుత్వమే పూర్తి బాధ్యత వహించాలని డిమాండ్​ చేశారు.

యమలోక ద్వారంగా ఈ ప్రాంత రోడ్ : హైదరాబాద్​ - బీజాపూర్​ రోడ్​ ప్రమాదాలకు అడ్డాగా మారిందంటూ స్థానికులు ఆగ్రహం వ్యక్తం చేశారు. వందల ప్రాణాలు గాల్లో కలుస్తున్నా రోడ్డు విస్తరణకు నోచుకోవడం లేదన్నారు. మన్నెగూడ నుంచి అప్పకోడెల వరకు 290 గుంతలు, 66 మూల మలుపులు, 19 డేంజరస్ స్పాట్లు ఉన్నట్లు గుర్తించారు. ఈ రహదారిపై 2022లో 172 ప్రమాదాలు జరగ్గా 47 మంది మృతి చెందారు. 2023లో 101 ప్రమాదాలు జరగ్గా 55 మంది చనిపోయారు. 2024లో ఇప్పటివరకు 109 ప్రమాదాలు జరగ్గా 39 మంది దుర్మరణం చెందారు.

మృతుల కుటుంబాలకు రూ.5 లక్షలు పరిహారం : మృతుల కుటుంబాలకు రూ.5 లక్షల చొప్పున ప్రభుత్వం పరిహారం ప్రకటించినట్లు ఎమ్మెల్సీ పట్నం మహేందర్​ రెడ్డి తెలిపారు. చేవెళ్ల ఎమ్మెల్యేతో కలిసి ఆయన క్షతగాత్రులను పరామర్శించారు. ఘటన గురించి ముఖ్యమంత్రి దృష్టికి తీసుకెళ్లి మరింత పరిహారం అందించే ప్రయత్నం చేస్తానని హామీ ఇచ్చారు. అధికారులతో మాట్లాడి ఈ జాతీయ రహదారి విస్తరణ పనులను త్వరలోనే ప్రారంభిస్తామని తెలిపారు.

లారీ డ్రైవర్​ నిర్లక్ష్యమే కారణం : లారీ డ్రైవర్​ నిర్లక్ష్యం వల్లే ఈ ప్రమాదం జరిగినట్లు పోలీసులు ప్రాథమికంగా గుర్తించారు. మితిమీరిన వేగంతో వెళ్తున్న లారీ ఎదురుగా వస్తున్న వాహనాన్ని తప్పించబోయే క్రమంలోనే ఈ దారుణం జరిగినట్లు భావిస్తున్నారు. కాసేపట్లో ఇంటికి వెళ్లి తమ వారితో సంతోషంగా గడపాల్సిన వారు తిరిగిరాని లోకాలకు వెళ్లడంతో బాధిత కుటుంబసభ్యులు కన్నీరుమున్నీరుగా విలపిస్తున్నారు. బాధిత కుటుంబాలను ప్రభుత్వం అన్ని విధాలుగా ఆదుకోవాలని విజ్ఞప్తి చేస్తున్నారు.