నత్తనడకన రోడ్డు విస్తరణ పనులు - ట్రాఫిక్​తో ఇబ్బంది పడుతున్న ప్రజలు

Road Problems in Nalgonda : నిత్యం వేలాది వాహనాల రాకపోకలతో రద్దీగా ఉండే మిర్యాలగూడలోని రహదారులు ఇరుకుగా మారాయి. ట్రాఫిక్‌జామ్‌తో రోజూ ఇబ్బంది పడుతున్నామని వాహనదారులు, స్థానికులు వాపోతున్నారు. పారిశ్రామికంగా, వాణిజ్యపరంగా మిర్యాలగూడ వేగంగా విస్తరిస్తున్నా రోడ్ల విస్తరణ జరగకపోవడంపై అసంతృప్తి వ్యక్తంచేస్తున్నారు.

Road Problems in Nalgonda : నల్గొండ జిల్లా మిర్యాలగూడ పారిశ్రామిక, వాణిజ్య కేంద్రంగా పేరొందింది. వివిధ గ్రామాల నుంచి పనుల నిమిత్తం వేల సంఖ్యలో ప్రజలు రాకపోకలు సాగిస్తుంటారు. రహదారులు ఇరుకుగా ఉండడం వల్ల ట్రాఫిక్‌జామ్‌ ఏర్పడి వాహనదారులు తీవ్ర ఇబ్బందులు పడుతున్నారు. మిర్యాలగూడ రాజీవ్ చౌక్ నుంచి హనుమాన్ పేట ఫ్లైఓవర్ వరకు రాజీవ్ చౌక్ నుంచి ఈదలగూడ వరకు రోడ్డు విస్తరణ జరగాల్సి ఉండగా వివిధ కారణాలతో పూర్తి కాలేదు.

People Facing Problems With Damaged Roads : ఇదే క్రమంలో కోదాడ-జడ్చర్ల హైవే నిర్మాణ పనులు జరుగుతుండగా జడ్చర్ల హైవేని పట్టణం మధ్య నుంచి వెళ్లే విధంగా అధికారులు ప్రణాళికలు సిద్ధం చేశారు. విస్తరణలో భాగంగా స్థలం కోల్పోయిన వారికి పరిహారం, రోడ్డు నిర్మాణానికి కావలసిన నిధులు విడుదలయ్యాయి. అసెంబ్లీ ఎన్నికలతో పనులు నిలిచిపోయాయి. ఎన్నికలు పూర్తైన పనులు మెుదలు పెట్టలేదు.

"మిర్యాలగూడలో రహదారులు ఇరుకుగా ఉండడం వల్ల ట్రాఫిక్‌జామ్‌ ఏర్పడుతుంది. ఇక్కడ రోడ్డు చిన్నదిగా ఉండటం వల్ల రోడ్డు ప్రమాదాలు జరుగుతున్నాయి. జడ్చర్ల, ఖమ్మం హైవేపై గల వాహనాలు మిర్యాలగూడ పట్టణం నుంచి వెళ్తుండటంతో వాహనాల రద్దీతో ఇబ్బందిగా ఉంది. మిర్యాలగూడలో మాత్రమే రోడ్డు విస్తరణ పనులు ఆగిపోయాయి. సాయంత్రం వచ్చే పాఠశాల, కళాశాల వాహనాలతో ట్రాఫిక్ జామ్‌ పెరిగి నానా అవస్థలు పడుతున్నాము. ఇప్పటికైనా అధికారులు పట్టించుకొని రోడ్లు విస్తరిన పనులు చేయాలి." -స్థానికులు

Drivers Struggling With Damaged Roads In Nalgonda : మిర్యాలగూడలోని సాగర్ రోడ్డులోనే అన్ని వ్యాపార, కార్యకలాపాలు జరుగుతుంటాయి. ఇక్కడే అనేక ప్రభుత్వ కార్యాలయాలు ఉన్నాయి. సాగర్‌రోడ్డు, ఖమ్మం రోడ్లు మణిహారంగా ఉన్నాయి. ఎప్పటినుంచో ఈ రోడ్ల విస్తరణ జరగాల్సి ఉన్నప్పటికీ వివిధ కారణాలతో వాయిదా పడుతూ వచ్చింది. రోడ్డు వెడల్పు చేయక ట్రాఫిక్‌జామ్‌తో ప్రజలు అవస్థలు పడుతున్నారు. తరచూ రోడ్డు ప్రమాదాలు చోటు చేసుకుంటున్నాయని స్థానికులు అంటున్నారు.

రాజీవ్ చౌక్ నుంచి పోలీస్ స్టేషన్‌కి వెళ్లే రహదారి అక్కడ నుంచి ఆర్టీసీ బస్టాండ్ వరకు రోడ్డు ఇరుకుగా ఉంది. ఫుట్‌పాత్‌లు లేకపోవడంతో రోడ్లపై నడిచే వారికి ప్రమాదాలు జరుగుతున్నాయి. అసలే ఇరుకైన రోడ్లు దానికి తోడు చిరు వ్యాపారులు తోపుడుబండ్లను రోడ్లపైనే ఉంచి కార్యకలాపాలు కొనసాగిస్తున్నారు. ఉదయం, సాయంత్రం వచ్చే పాఠశాల, కళాశాల వాహనాలతో ట్రాఫిక్ జామ్‌ పెరిగి నానా అవస్థలు పడుతున్నారు. ప్రజాప్రతినిధులు, అధికారులు దృష్టి సారించి రోడ్లు విస్తరించాలని మిర్యాలగూడ వాసులు కోరుతున్నారు.