Railway Budget Allocation in Telangana 2024 : కేంద్ర ప్రభుత్వం ప్రవేశపెట్టిన బడ్జెట్‌లో రైల్వే శాఖకు చేసిన కేటాయింపుల్లో తెలంగాణకు ఊరట కలిగించే అంశాలేమీ లేవు. నూతన రైల్వే లైన్లు, రైల్వే టెర్మినల్‌, డబ్లింగ్, భారీ ప్రాజెక్టులేవీ మంజూరు కాలేదు. ఇప్పటికే నిర్మాణంలో ఉన్నవి, పాత ప్రాజెక్టులకే నిధులు కేటాయించారు. గత సంవత్సరం రాష్ట్రానికి ఇచ్చిన రూ.4,418 కోట్లతో పోలిస్తే ఈసారి దాదాపు 12.8 శాతం పెంచి రూ.5,071 కోట్లు కేటాయించారు. తెలుగు రాష్ట్రాల మధ్య కీలకమైన బీబీనగర్‌-గుంటూరు వయా నల్గొండ, మిర్యాలగూడ రెండో లైనుకు ఐదేళ్ల తర్వాత నిధులు కేటాయించడం కాస్త ఉపశమనమని చెప్పవచ్చు.
మధ్యతరగతికి నిర్మల గుడ్న్యూస్! ఇళ్ల నిర్మాణానికి ప్రాధాన్యం- ఐదేళ్లలో రెండు కోట్ల ఆవాసాలు
ఏ పథకంలో ఇస్తారో? : కీలకమైన సికింద్రాబాద్‌, అమృత్‌ భారత్ స్టేషన్ల పునరాభివృద్ధి పనులను బడ్జెట్‌లో (Union Budget 2024) ప్రస్తావించలేదు. ఇందులో భాగంగా వీటికి నిధులు ఏ పద్దు కింద ఇస్తారో స్పష్టం కావాల్సి ఉంది. ముంబయి మార్గంలో కీలకంగా ఉన్న లింగంపల్లి-వికారాబాద్‌ సెక్షన్‌కు రెండో లైను మంజూరు కాలేదు. సర్వే పూర్తయిన కాజీపేట-హుజూరాబాద్‌-కరీంనగర్‌ ప్రతిపాదిత రైల్వే లైనూ మంజూరు చేయలేదు.
Union Budget 2024-2025 : ఘట్‌కేసర్‌-కాజీపేట వరకు మూడో లైను నిర్మిస్తే విజయవాడ, దిల్లీ వైపు రాకపోకలు సులభమవుతాయి. అయినా ఈ ప్రాజెక్టునూ పట్టించుకోలేదు. మరోవైపు నిర్మాణంలో ఉన్న మూడో లైను ప్రాజెక్టులకు ఈసారి నిధులు తగ్గాయి. హైదరాబాద్‌లో ప్రధాన స్టేషన్లపై ఒత్తిడి తగ్గించేలా నగరం చుట్టూ శంషాబాద్‌, నాగులపల్లి, మేడ్చల్‌ ప్రాంతాల్లో కొత్త టెర్మినళ్ల డిమాండ్‌ను పరిశీలించనే లేదు.
కొత్త రైల్వే లైన్లకు నిధులు :
- మనోహరాబాద్‌-కొత్తపల్లి : గత సంవత్సరం రూ.185 కోట్లు ఇచ్చారు. ఈసారి రూ.350 కోట్లు కేటాయించారు.
- మణుగూరు-రామగుండం : 2013-14లో మంజూరైన ఈ ప్రాజెక్టు నిడివి 200 కిలో మీటర్లు. పనుల జాప్యం వల్ల అంచనా వ్యయం రూ.1,112 కోట్ల నుంచి రూ.2,911 కోట్లకు పెరిగింది. గత సంవత్సరం రూ.10 కోట్లు కేటాయించగా, ఈసారి రూ.5 కోట్లకే పరిమితం చేశారు.
- భద్రాచలం రోడ్‌-సత్తుపల్లి : ఈ రైల్వే లైను నిర్మాణం పూర్తయ్యింది. చిన్నపాటి పనుల కోలం రూ.6.12 కోట్ల కేటాయించారు.
- భద్రాచలం రోడ్‌-కొవ్వూరు : 2012-13లో మంజూరైంది. ఆలస్యంతో అంచనా వ్యయం రూ.1,445 కోట్ల నుంచి రూ.2,154.83 కోట్లకు పెరిగింది. ఇప్పుడు కేటాయించింది రూ.10 లక్షలే.
డబ్లింగ్, థర్డ్‌ లైన్లు :
- బీబీనగర్‌-గుంటూరు : 248 కిలోమీటర్ల పొడవైన లైన్‌ ఇది. తెలుగు రాష్ట్రాల మధ్య రద్దీ దృష్ట్యా రెండోలైను నిర్మిస్తే ఎంతో వెసులుబాటు కలుగుతుంది. 2019-20 లోనే ఇది మంజూరైనా నిధులు రాలేదు. అంచనా వ్యయం రూ.2,480 కోట్ల నుంచి రూ.2,853 కోట్లకు పెరిగింది. గత సంవత్సరం రూ.60 కోట్లు, ఈసారి రూ.200 కోట్లు ఇవ్వడంతో పనులు మొదలవ్వచ్చు.
- కాజీపేట-విజయవాడ మూడో లైను : గతేడాది రూ.337.52 కోట్లు ఇచ్చారు. ఇప్పడు రూ.310 కోట్లే కేటాయించారు.
- కాజీపేట-బల్లార్ష మూడో లైను : ఈసారి కేటాయింపు రూ.300 కోట్లే. గతేడాది రూ.450.86 కోట్లు.
త్వరలోనే మౌలాలి నుంచి సనత్నగర్ వరకు ఎంఎంటీఎస్ సర్వీస్ : అరుణ్ కుమార్
ఇతర ప్రాజెక్టులకు :
- కాజీపేట పీఓహెచ్‌ వర్క్‌షాప్‌ : మొదట వ్యాగన్‌ ఓవర్‌హాలింగ్‌ వర్క్‌షాప్‌ మంజూరు చేశారు. తర్వాత వ్యాగన్ల ఉత్పత్తి, ఆపై వ్యాగన్లు, ఇంజిన్ల ఉత్పత్తితో రైల్‌ మాన్యుఫ్యాక్చరింగ్‌ యూనిట్‌ (ఆర్‌ఎంయూ)గా మార్చారు. ఈ సంవత్సరం రూ.150 కోట్లు కేటాయించారు. గతేడాది రూ.160 కోట్లు ఇచ్చారు. ఇంకా నిర్మాణపనులు ప్రారంభం కావాల్సి ఉంది.
- చర్లపల్లి టెర్మినల్‌ : ఇప్పుడు రూ.46 కోట్లు కేటాయించారు. నిర్మాణపనులు తుది దశకు చేరుకున్నాయి.
దక్షిణ మధ్య రైల్వే జోన్‌కు నిధులు ఇలా : దక్షిణ మధ్య రైల్వే జోన్‌ పరిధిలో తెలంగాణ ( Railway projects Telangana) , ఆంధ్రప్రదేశ్‌ పాటు మహారాష్ట్రలో కొంతభాగం ఉంది. మొత్తంగా ద.మ.రైల్వేకి ఇప్పుడు కేటాయింపులు స్వల్పంగా పెరిగాయి. గత సంవత్సరం రూ.13,786.19 కోట్లు కేటాయించారు. ఈసారి అది రూ.14,232.83 కోట్లకు పెరిగింది.
| క్రమసంఖ్య | దక్షిణ మధ్య రైల్వే జోన్‌కు ముఖ్యమైన కేటాయింపులు | రూ.కోట్లలో |
| 1 | కొత్త లైన్లు | రూ.1184.14 కోట్లు |
| 2 | డబ్లింగ్ | రూ.2905.91 కోట్లు |
| 3 | ప్రయాణికులు సదుపాయాలు | రూ.789.94 కోట్లు |
| 4 | వర్క్‌షాప్‌లు | రూ.535 కోట్లు |
| 5 | సిగ్నలింగ్ టెలికమ్యూనికేషన్స్ ( టీ-కాస్ సహా) | రూ.302 కోట్లు |
| 6 | ట్రక్ రెన్యువల్ | రూ.1530 కోట్లు |
| 7 | ఆర్వోబీ, ఆర్‌యూబీలు | రూ.744.04 కోట్లు |
| 8 | ట్రాఫిక్ ఫెసిలిటీస్ | రూ.172.19 |
వందేభారత్ స్థాయిలో రైలు బోగీలు- పెరగనున్న ఛార్జీలు! జనరల్ కోచ్ల పరిస్థితేంటి?
'అసమానతలు లేని భారత్ మా లక్ష్యం- 2047 నాటికి పేదరికం కనబడదు!'
