పార్టీ మారిన కాంట్రాక్టర్​ - బిల్లులు చెల్లించకుండా ఎమ్మెల్యే పీఏ వేధింపులు - Problem with YCP MLA PA Murali

Problem with YCP MLA Dharmana PA Murali : వైసీపీ నుంచి టీడీపీలోకి చేరాడని గుత్తేదారుడికి వైసీపీ ఎమ్మెల్యే ధర్మాన కృష్ణదాస్ పీఏ బిల్లులు చెల్లించకుండా కక్షసాధింపు చర్యలు పాల్పడిన సంఘటన శ్రీకాకుళం జిల్లాలో చోటు చేసుకుంది. తనకు చెల్లించాల్సిన నిధులను గుత్తేదారు పేరు మార్చి అతని బినామీకి చెల్లించారని అతడు ఆవేదన వ్యక్తం చేశారు. తక్షణమే తనకు రావాల్సిన నిధులను చెల్లించాలని సింహాచలం డిమాండ్‌ చేశాడు.

Problem with YCP MLA Dharmana PA Murali : వైసీపీ నుంచి టీడీపీలో చేరిన గుత్తేదారుడికి రహదారి పనుల నిమిత్తం బిల్లులు చెల్లించకుండా కక్షసాధింపు చర్యలకు పాల్పడుతున్న సంఘటన శ్రీకాకుళం జిల్లాలో చోటు చేసుకుంది. వైసీపీ నుంచి తెలుగుదేశంలో చేరడంతో తనపై వైసీపీ ఎమ్మెల్యే ధర్మాన కృష్ణదాస్‌ పీఏ కక్ష సాధింపు చర్యలకు పాల్పడుతున్నాడని గుత్తేదారు సింహాచలం ఆరోపించారు. శ్రీకాకుళం జిల్లా సారవకోట మండలం దంత నుంచి ఎస్టీ జరాలి వరకు పూర్తి చేసిన రహదారి నిర్మాణ పనులకు చెల్లించాల్సిన నిధులను చెల్లించకుండా ఎమ్మెల్యే పీఏ మురళి ఇబ్బందులకు గురి చేస్తున్నారంటూ అతడు ఆవేదన వ్యక్తం చేశారు. తనకు చెల్లించాల్సిన నిధులను గుత్తేదారు పేరు మార్చి అతని బినామీకి చెల్లించారని మండిపడ్డారు. తక్షణమే తనకు రావాల్సిన నిధులను చెల్లించాలని సింహాచలం డిమాండ్‌ చేశాడు.

అసలు ఏం జరిగిందంటే మండలంలోని దంత నుంచి జరాళి గ్రామం వరకు 2.5 కిలోమీటర్ల రహదారి నిర్మాణానికి రాష్ట్ర ప్రభుత్వం ఐటీడీఏ నిధులు రూ.1.65 కోట్లు మంజూరు చేసిందన్నారు. 2019 డిసెంబరు 30న రోడ్డు నిర్మాణానికి ఉత్తర్వులు జారీ చేయగా రహదారి పనులను అప్పటి వైసీపీ నేత కోన సింహాచలం చేపట్టారు. 2022 ఫిబ్రవరి 25 నాటికి రూ.39.11 లక్షల మేర పనులు పూర్తి చేసినట్లు తెలిపారు. గతేడాది మార్చిలో గుత్తేదారుకు రూ.12 లక్షలకు పైగా చెల్లించారు. ఇటీవల సింహాచలం టీడీపీలో చేరారు. అతను చేసిన పనులకు సంబంధించిన బిల్లులను ఎమ్మెల్యే పీఏ మురళి సమీప బంధువు వెలమల కుమార్ ఖాతాకు రూ.21 లక్షల పైగా జమ చేయడానికి ఇంజినీరింగ్ అధికారులు సహకరించారు. ఈ నెల 12న కుమార్​ను గుత్తేదారుగా ధ్రువీకరించిన అధికారులు గత నెల 20న అతను పనులు చేసినట్లు ఎంబుక్​లో నమోదు చేశారు.

అధికారుల తీరుపై బాధిత గుత్తేదారు ఈ నెల 24న సారవకోట పోలీసు స్టేషన్​లో ఫిర్యాదు చేసినట్లు పేర్కొన్నారు. ఎమ్మెల్యే పీఏ మురళి అనుచరులు తనపై దాడి చేశారని గుత్తేదారు సింహాచలం ఆవేదన వ్యక్తం చేశారు. మురళితో తనకు ప్రాణహని ఉందని సింహచలం తెలిపారు. మరో రెండు పనులు రూ.రెండు కోట్ల వరకు చేయగా వాటినీ రద్దు చేశారని అతడు తెలిపారు. యాదవ సామాజిక వర్గానికి చెందిన తనను వేధిస్తున్నారని ప్రభుత్వం స్పందించకుంటే ఆత్మహత్యే శరణ్యమని అతడు వాపోయారు. అక్రమాలకు పాల్పడిన ఇంజినీర్లపై చర్యలు తీసుకోవా లని ప్రతిపక్ష నేతలు నాయకులు డిమాండ్ చేశారు.