AP New Liquor Policy 2024 : ఆంధ్రప్రదేశ్ స్టేట్ గవర్నమెంట్ తీసుకొచ్చిన మద్యం పాలసీ వ్యాపారుల్లో కిక్కు పెంచింది. లాటరీలో ఒక్క లిక్కర్ షాప్ దక్కినా చాలనే భావనతో మద్యం టెండర్ల దరఖాస్తులకు క్యూ కడుతున్నారు. ఈ అవకాశం దక్కించుకోవడానికి పొలిటకల్ లీడర్ల నుంచి దళారుల వరకు ఎత్తుకుపైఎత్తులు వేస్తూ లాటరీ విధానం కోసం ఎదురు చూస్తున్నారు. ఈ క్రమంలోనే దరఖాస్తు దాఖలుకు 11వ తేదీ వరకు గడువు పెంచుతూ రాష్ట్ర సర్కార్ ఉత్తర్వులు జారీ చేసింది. కాగా అటు వ్యాపార వాంఛ, ఇటు రాజకీయ కాంక్షల మధ్యవర్తులు రాయబారాలు జరుపుతున్న ఘటనలు అనేకం జరుగుతున్నాయి.
వైఎస్ఆర్ కడప జిల్లాలో 139 దుకాణాలకు మంగళవారం రాత్రి వరకు 1,800 దరఖాస్తులు వచ్చాయి. కొన్ని చోట్ల అప్లికేషన్లు వేయనీయకుండా కొందరు నేతలు అడ్డుకుంటున్నారనే ఆరోపణలు వెల్లువెత్తుతున్నాయి. అన్నమయ్య జిల్లాతో పోల్చితే జిల్లాలో అక్రమాలు, అంతర్గతంగా దౌర్జన్యాలు భారీగా జరుగుతున్నాయి. ఈ నెల 14న మద్యం దుకాణాలను లాటరీ ప్రాసెస్లో కేటాయించడానికి ఆబ్కారీశాఖ ఏర్పాట్లు చేస్తోంది. కడపలోని జిల్లా పరిషత్‌ కాన్ఫెరెన్స్ హాల్లో కలెక్టర్‌ శివశంకర్‌ ఆధ్వర్యంలో కార్యక్రమం జరుగుతుంది. దరఖాస్తు చేసుకున్న వారికి ఎంట్రీ పాసులు జారీ చేసి లాటరీ ప్రోగ్రాంకు అనుమతిస్తారు. కడప నగరం, ఇతర పట్టణ ప్రాంతాల్లో దుకాణాలకు వ్యాపారులు పోటీపుడుతున్నారు.
లాటరీలో లిక్కర్ షాప్ దక్కించుకున్నా మాకు వాటా ఇవ్వాల్సిందే! : కడప, పులివెందుల, ప్రొద్దుటూరు, మైదుకూరు, బద్వేలు, జమ్మలమడుగు ప్రాంతాల దుకాణాలకు ఎక్కువ మంది అప్లై చేయడానికి పోటీ పడ్డారు. కొన్నిచోట్ల రాజకీయ నేతల బెదిరింపులతో దరఖాస్తులు తక్కువ సంఖ్యలో నమోదయ్యాయి. లాటరీలో లిక్కర్ షాప్ దక్కించుకున్నా, వ్యాపారం ఎలా చేస్తావో చూస్తామంటూ బెదిరంపులతో కొందరు వెనకడుగు వేశారు. ఆన్‌లైన్‌లో దరఖాస్తు అవకాశం ఉండడంతో కొందరు ధైర్యంగా గోప్యంగా అప్లికేషన్ పూర్తి చేశారు. ఏ దుకాణానికి ఎవరు దాఖలు చేశారనే విషయం తెలుసుకునే విధానం లేకపోవడంతో నేతలు, ఔత్సాహిక వ్యాపారులు ఆసక్తిగా ఇతరుల ద్వారా అప్లికేషన్ల గురించి ఆరా తీస్తున్నారు. శుక్రవారం వరకు మరిన్ని దరఖాస్తులు దాఖలయ్యే అవకాశం లేకపోలేదు.
నయా లిక్కర్ పాలసీతో వ్యాపారుల్లో కిక్కు : అయిదేళ్ల తర్వాత అమల్లోకి వచ్చిన నూతన లిక్కర్ పాలసీ వ్యాపారుల్లో కిక్కు పెంచింది. లాటరీ విధానంలో మద్యం దుకాణం ఒక్కటి తగిలినా చాలు పరపతి పెంచుకోవచ్చనేది చాలా మంది భావన. ఆ అవకాశం దక్కించుకోవడానికి పొలిటికల్ లీడర్ల నుంచి దిగువ స్థాయి దళారుల వరకు ప్రస్తుతం ఎత్తుకు పైఎత్తులు వేస్తున్నారు. సాఫ్ట్‌వేర్‌ రంగంలోని ఎంప్లాయిస్ సైతం దుకాణాల కోసం పోటీపడుతున్నారు. కొందరైతే లిక్కర్ షాప్ ఉండడం స్టేటస్‌గా భావిస్తున్నారు.
పరిమితి లేకపోవడంతో ఒక్కొక్కరు పదుల సంఖ్యలో టెండర్లకు అప్లికేషన్లు దాఖలు చేస్తున్నారు. ఏదేని ఒకటైనా తగలక పోతుందా, అనే ఆలోచనతో పోటీపడుతున్నారు. కడప జిల్లాలో ప్రెజెంట్ మద్యం దుకాణాలపైనే చర్చోపచర్చలు సాగుతున్నాయి. లైసెన్స్‌ ఫీజు 6 దఫాలుగా చెల్లించుకునే వెసులుబాటు ఉండడంతో పోటీ తీవ్రంగా మారింది. రాష్ట్ర సర్కార్ దరఖాస్తుల దాఖలుకు మరో రెండు రోజులు గడువు పెంచడంతో ఎక్కువ సంఖ్యలో దరఖాస్తులు వచ్చే అవకాశాలున్నాయని అధికారులు ఆశాభావం వ్యక్తం చేస్తున్నారు.
మద్యం టెండర్ల ఆశావహులకు గుడ్ న్యూస్ - మరో రెండు రోజులు గడువు పెంపు
