Vajedu SI Suicide Case Latest Update : ఈ నెల 2న ములుగు జిల్లా వాజేడు ఎస్సై రుద్రారపు హరీశ్‌ బలవన్మరణానికి పాల్పడిన విషయం తెలిసిందే. అయితే ఈ కేసులో ఓ మహిళ వేధింపులే ఎస్సై చావుకు ప్రధాన కారణమని గుర్తించి ఆమెను శనివారం పోలీసులు అరెస్టు చేశారు. ఇందుకు సంబంధించిన వివరాలను సీఐ బండారి కుమార్‌ వెల్లడించారు.
సీఐ బండారి కుమార్‌ వివరాల ప్రకారం, 'ఈ నెల 2న ఉదయం వాజేడు మండలం ముల్లెకట్ట వారధి సమీపంలోని ఓ రిసార్టులో ఎస్సై తన సర్వీస్ రివాల్వర్‌తో కాల్చుకుని ఆత్మహత్య చేసుకున్నారు. ఆ సమయంలో అక్కడకు వచ్చిన సూర్యాపేట జిల్లా చిలుకూరు మండలం దుదియతండాకు చెందిన బానోతు అనసూర్య అలియాస్‌ అనూషపై అనుమానం వచ్చి అదుపులోకి తీసుకుని విచారించాం. ఆమె ఓ కళాశాలలో అడ్మిన్‌ స్టాఫ్‌గా విధులు నిర్వహిస్తోంది. ఏడు నెలల క్రితం రాంగ్‌ కాల్‌ ద్వారా ఎస్సైని పరిచయం చేసుకుని, ఆయనను పెళ్లి చేసుకుంటే జీవితంలో స్థిరపడవచ్చని భావించింది.
తరచూ ఎస్సై హరీశ్‌కు ఫోన్‌ చేస్తూ సాన్నిహిత్యం పెంచుకుంది. ఈ క్రమంలోనే పెళ్లి చేసుకోవాలని హరీశ్‌పై ఆమె ఒత్తిడి తెచ్చింది. ఆయన నిరాకరించడంతో తనను శారీరకంగా ఉపయోగించుకుని తిరస్కరిస్తున్నట్లు మీడియా, ఉన్నతాధికారులకు చెబుతానంటూ ఎస్సైని భయాందోళనలకు గురి చేసింది. పెళ్లి చేసుకోకుంటే చచ్చిపొమ్మంటూ ఇబ్బందులు పెట్టడంతో తీవ్ర మనోవేదనకు గురైన హరీశ్‌ ఆత్మహత్యకు పాల్పడ్డారని విచారణలో తేలింద'ని సీఐ వివరించారు. ఈ మేరకు ఆ మహిళపై కేసు నమోదు చేసి రిమాండ్‌కు తరలించామని సీఐ స్పష్టం చేశారు.
అసలేం జరిగిందంటే? : 7 నెలల క్రితం ఎస్సై హరీశ్‌ ఫోన్‌కు ఓ కాల్‌ వచ్చింది. ఆ కాల్‌ చేసిన యువతి ఫలానా వ్యక్తేనా అంటూ పరిచయం మొదలు పెట్టింది. ఆ తర్వాత ఇన్‌స్టాగ్రామ్‌లో రిక్వెస్ట్‌ పంపించగా, అందుకు ఎస్సై హరీశ్‌ కూడా అంగీకరించారు. అప్పటి నుంచి వారిద్దరి మధ్య తరచూ ఇన్‌స్టాగ్రామ్‌ చాటింగ్‌ కొనసాగింది. ఈ క్రమంలోనే యువతి ఎస్సైకి దగ్గరైంది. ఆమె హైదరాబాద్‌లో చదువుకుంటూ వారాంతపు సెలవుల్లో వాజేడుకు వచ్చేది. రెండు రోజులు అక్కడే ఉండి వెళ్లేది. ఈ క్రమంలో వారిద్దరూ పెళ్లి చేసుకోవాలని నిర్ణయించుకున్నారు. ఈ క్రమంలో ఎస్సై ఆమె గురించి ఆరా తీయడం మొదలుపెట్టారు.
సూర్యాపేట జిల్లాకు చెందిన 26 ఏళ్ల యువతిది చిలుకూరు మండలం. ఊళ్లో ఉన్నప్పుడు ముగ్గురు యువకులతో స్నేహం చేసిందని, అందులో ఒకరు పెళ్లికి నిరాకరించడంతో చిలుకూరు పోలీస్‌ స్టేషన్‌లో ఫిర్యాదు చేసిందనే విషయాలు ఎస్సై తెలుసుకున్నారు. ఈ నేపథ్యంలో పెళ్లికి ఎస్సై నిరాకరించాడు. దీంతో ఆమె వేధింపులు ప్రారంభించింది. ఆమె వేధింపులు తాళలేక ఎస్సై ఆత్మహత్య చేసుకున్నారు. ఆ తర్వాత ఆమెను అదుపులోకి తీసుకుని విచారించగా, మొత్తం విషయం బయటకు వచ్చింది.
మన ప్రేమ విషయం మీ పై ఆఫీసర్లకు చెబుతా : యువతి బెదిరింపులతో ఎస్సై సూసైడ్!
vikarabad si dead in accident: పెళ్లైన వారం రోజులకే రోడ్డు ప్రమాదంలో ఎస్సై మృతి
