Madanapalle Sub Collector Fire Accident Case : ఏపీలోని అన్నమయ్య జిల్లా మదనపల్లె సబ్‌కలెక్టర్‌ కార్యాలయంలో రెవెన్యూ దస్త్రాల దహనం కేసులో కొందరు అధికారులపై ప్రభుత్వం సస్పెన్షన్‌ వేటు వేసింది. పూర్వ ఆర్డీవో మురళి, ప్రస్తుత ఆర్డీవో హరిప్రసాద్‌, సీనియర్ అసిస్టెంట్ గౌతమ్‌ను సస్పెండ్ చేసింది. ఈ మేరకు రెవెన్యూశాఖ ప్రత్యేక ప్రధాన కార్యదర్శి ఆర్పీ సిసోదియా ఉత్తర్వులు జారీ చేశారు. ఈ నెల 21వ తేదీన రాత్రి 11.30 గంటల సమయంలో మదనపల్లె సబ్‌కలెక్టర్‌ కార్యాలయంలో అగ్నిప్రమాదం జరిగిన సంగతి తెలిసిందే.
అగ్నిప్రమాదం, యాక్సిడెంట్ కాదని ఇన్సిడెంట్‌గా అనిపిస్తోందని డీజీపీ ద్వారకా తిరుమల రావు అప్పట్లో అనుమానం వ్యక్తం చేశారు. ఆ దిశగా పోలీసుల దర్యాప్తు కొనసాగుతోంది. మాజీ మంత్రి పెద్దిరెడ్డి, రాజంపేట ఎంపీ మిథున్‌రెడ్డి అనుచరులను పోలీసులు దశల వారీగా విచారిస్తున్నారు. ఈ తరుణంలో అధికారులను ప్రభుత్వం సస్పెండ్ చేయడం ప్రాధాన్యత సంతరించుకుంది.
