Munneru Vagu Heavy Flood in Khammam : ఎడతెరిపి లేకుండా కురుస్తున్న భారీ వర్షానికి ఖమ్మం జిల్లాలోని మున్నేరు వాగు అత్యంత ప్రమాదకర స్థాయిలో మహోగ్రంగా ప్రవహిస్తోంది. వరద ఉద్ధృతి ఎక్కువగా ఉండడంతో పలు కాలనీవాసులు వరదలో చిక్కుకున్నారు. రాజీవ్ గృహకల్ప విలంగుల కాలనీని మున్నేరు వరద ముంచెత్తింది. అపార్టుమెంట్లోని ఓ ఇంట్లో చిక్కుకున్న ఐదుగురు బాధితులు సాయం కోసం ఆర్తనాదాలు చేస్తున్నారు. కల్వోడ్డు వెంకటేశ్వరనగర్లోని ఓ ఇంటిని వరద చుట్టుముట్టడంతో ఇంటిపైకి ఎక్కి ఏడుగురు బాధితులు తలదాచుకున్నారు. మోతీనగర్, బొక్కలగడ్డ కాలనీలను వరద ముంచెత్తింది. వందల మంది బాధితులు ఇళ్లపైకి ఎక్కి సాయం కోసం ఎదురుచూస్తున్నారు.
ఏపీ నుంచి రెండు హెలికాప్టర్లు : ప్రకాశ్ నగర్ వద్ద మున్నేరు బ్రిడ్జిపై వరదలో చిక్కిన వారిని రక్షించేందుకు సీఎం రేవంత్ రెడ్డితో మంత్రి తుమ్మల నాగేశ్వరరావు మాట్లాడారు. ఈ క్రమంలో హైదరాబాద్ నుంచి హెలికాప్టర్ వచ్చే అవకాశం లేక ఏపీ సీఎం చంద్రబాబు కార్యాలయం సీఎస్ నీరబ్ కుమార్ ప్రసాద్తో మంత్రి మాట్లాడారు. వెంటనే విశాఖపట్టణం నుంచి రెండు హెలికాప్టర్లు ఖమ్మం బయలుదేరి వెళ్లాయి.
ఎలాంటి ప్రాణ నష్టం లేకుండా మున్నేరు వరదలో చిక్కిన 9 మందిని కాపాడాలని అధికారులకు మంత్రి తుమ్మల ఆదేశాలిచ్చారు. ఖమ్మం నగరంలో వరదల్లో చిక్కుకున్న వారిని ఆదుకోవాలని స్వచ్చంద సంస్థలకు మంత్రి పిలుపునిచ్చారు. అలాగే వారికి తాగునీళ్లు, ఆహారం అందించాలని మంత్రి తుమ్మల విజ్ఞప్తి చేశారు.
పాలేరు వాగు ఉద్ధృతి, దంపతులు గల్లంతు : పాలేరు వాగు వరద ఉద్ధృతిలో ముగ్గురు వ్యక్తులు కొట్టుకుపోయారు. అలాగే కూసుమంచి మండలం నాయకన్గూడెంలో ఓ కుటుంబం గల్లంతు అయింది. నాయకన్గూడెంలో వరదకు యూకుబ్, సైదా, షరీఫ్ కొట్టుకుపోయారు. వాగులో కొట్టుకుపోతున్న బాలుడిని స్థానికులు కాపాడారు. కానీ దంపతులు మాత్రం గల్లంతు అయ్యారు. ఉదయం వారి ఇంటిని వరద చుట్టుముట్టింది. ప్రాణాలు కాపాడుకునేందు గోడ ఎక్కి, బాధితులు సాయం కోసం ఎదురు చూశారు. డ్రోన్ ద్వారా బాధితులకు లైఫ్ జాకెట్లును అధికారులు అందించారు. ఆ తర్వాత దంపతులు కనిపించకుండా పోయారు.
రాకాసి తండాను చుట్టుముట్టిన ఆకేరు వాగు : మరోవైపు ఖమ్మం జిల్లాలోని తిరుమలాయపాలెం మండలం రాకాసితండా జలదిగ్బంధంలో చిక్కుకుంది. మొత్తం రాకాసితండాను ఆకేరు వాగు వరద చుట్టుముట్టింది. ఈ క్రమంలో ఈ తండాకు ఎన్డీఆర్ఎఫ్ బృందాలు చేరుకున్నాయి. తండావాసులను కాపాడేందుకు ఎన్డీఆర్ఎఫ్ బృందాలు ప్రయత్నిస్తున్నాయి. ప్రతికూల వాతావరణం వల్ల హెలికాప్టర్ చర్యలు సాధ్యపడడం లేదు. బోట్ల సహాయంతో తండావాసులను కాపాడేందుకు చర్యలు చేపట్టారు. తండాలో ఇళ్లపై నిల్చున్న 30 మందిని కాపాడేందుకు ఎన్డీఆర్ఎఫ్ బలగాలు ప్రయత్నాలు చేస్తున్నాయి.
