Amaravati Connected with Highways : రాజధాని అమరావతి ట్రంక్ రోడ్లను 16వ నంబర్ జాతీయ రహదారితో మూడు చోట్ల అనుసంధానించేలా నిర్మాణాలు చేస్తున్నట్టు పురపాలక శాఖ మంత్రి పి. నారాయణ వెల్లడించారు. రాజధాని నిర్మాణంతో పాటు రోడ్ల అనుసంధానంపై మంత్రి నారాయణ మాట్లాడారు. రాజధాని ప్రాంతంలో ఈ -11, ఈ -13 రోడ్లు నిర్మించే ప్రాంతాలు, పశ్చిమ బైపాస్ నిర్మాణ పనుల్ని మంత్రి నారాయణ పరిశీలించారు.
వెంకట పాలెం వద్ద కృష్ణా నదిపై నిర్మాణంలో ఉన్న విజయవాడ వెస్ట్ బైపాస్ పనులను మంత్రి పరిశీలించారు. రాజధాని పరిధిలోని రహదారులను అనుసంధానించేందుకు ఇప్పటికే లీ కన్సెల్టెన్సీకి అధ్యయనం చేయాల్సిందిగా సూచించామని మంత్రి వివరించారు. 217 చదరపు కిలోమీటర్ల పరిధిలో తూర్పు నుంచి పశ్చిమానికి 16 రోడ్లు, ఉత్తరం నుంచి దక్షిణానికి 18 ప్రధాన రహదారులు వస్తున్నాయని మంత్రి వివరించారు.
సీడ్ కేపిటల్ నుంచి E11, E13, E15 ట్రంక్ రోడ్లను జాతీయ రహదారికి కలిపేలా డిజైన్లు సిద్ధం చేస్తున్నామని మంత్రి తెలిపారు. ఈ రహదారుల నిర్మాణానికి ఎక్కువగా ఉన్న అటవీ భూములనే తీసుకుంటున్నామని ఈ రోడ్ల నిర్మాణంలో ఇళ్లు కోల్పోతున్న వారు సహకరించాల్సిందిగా మంత్రి అభ్యర్థించారు. స్థానికులకు ఎక్కువ నష్టం లేకుండా చూస్తున్నామని మంత్రి నారాయణ స్పష్టం చేశారు.
"అమరావతి రాజధాని"లో ఆ డిజైన్కే ఎక్కువ మంది ఓటు - ఫిక్స్ చేసిన CRDA
రాబోయే 30 ఏళ్లను దృష్టిలో ఉంచుకుని రాజధాని నిర్మాణం చేస్తున్నామని పురపాలక శాఖ మంత్రి నారాయణ వ్యాఖ్యానించారు. కూటమి ప్రభుత్వం అధికారంలోకి వచ్చాక అమరావతి నిర్మాణానికి ఉన్న ఇబ్బందులను ఒక్కొక్కటిగా తొలగించుకుంటూ వస్తున్నామని ఈటీవీ - ఈటీవీ భారత్కి ఇచ్చిన ఇంటర్వూలో వెల్లడించారు. ప్రపంచ బ్యాంకు, ఏడీబీ, హడ్కో లాంటి సంస్థలు రాజధాని అమరావతి నిర్మాణానికి రుణ సహకారం అందిస్తున్నాయని వివరించారు.
ఇప్పటికే 22 వేల కోట్ల రూపాయల పనులకు ఆమోదం తెలిపామని, తదుపరి సీఆర్డీఏ అథారిటీ సమావేశంలో మరో 20 వేల కోట్ల పనులకు సంబంధించిన అమోదం తీసుకుంటామని మంత్రి వెల్లడించారు. వచ్చే మూడేళ్లలో ఈ పనులన్నీ పూర్తయ్యేలా లక్ష్యాన్ని నిర్దేశించుకున్నట్టు మంత్రి నారాయణ వివరించారు.
అమరావతి నిర్మాణంలో మరో కీలక అడుగు - 8వేల కోట్ల నిధులకు ఏడీబీ ఆమోదం
