'తెలంగాణ తల్లి విగ్రహావిష్కరణకు రండి' - బీఆర్ఎస్​ చీఫ్ కేసీఆర్​కు ప్రభుత్వం ఆహ్వానం

ఎర్రవల్లిలోని ఫామ్‌హౌజ్‌లో కేసీఆర్‌ను కలిసిన మంత్రి పొన్నం - తెలంగాణ తల్లి విగ్రహావిష్కరణకు కేసీఆర్‌ను ఆహ్వానించిన మంత్రి - కేంద్రమంత్రి కిషన్​ రెడ్డిని ఆహ్వానపత్రం అందించిన మంత్రి పొన్నం

Telangana Thalli statue unveiling Ceremony : ఈ నెల 9న సచివాలయం ప్రాంగణంలో తెలంగాణ తల్లి విగ్రహావిష్కరణ చేయనున్న నేపథ్యంలో కాంగ్రెస్ ప్రభుత్వం చకచకా ఏర్పాట్లు చేస్తోంది. విగ్రహావిష్కరణకు రావాలని పలువురు ప్రముఖులకు ఆహ్వానిస్తోంది. ఈ క్రమంలోనే బీఆర్ఎస్​ అధినేత, మాజీ సీఎం కేసీఆర్​ను మంత్రి పొన్నం ప్రభాకర్​ ఆహ్వానించారు. ఎర్రవల్లి ఫామ్​హౌజ్​లో కేసీఆర్​ను కలిసి ఈ నెల 9న జరగనున్న తెలంగాణ తల్లి విగ్రహావిష్కరణ కార్యక్రమానికి హాజరు కావాలని బీఆర్ఎస్​ అధినేత కేసీఆర్​ను కోరారు. ఈ సందర్భంగా కేసీఆర్​కు ఆహ్వనపత్రాన్ని మంత్రి పొన్నం ప్రభాకర్ అందజేశారు.

తెలంగాణ తల్లి విగ్రహావిష్కరణకు కేసీఆర్‌ను ఆహ్వానించిన మంత్రి (ETV Bharat)

కేసీఆర్​కు ఆహ్వానపత్రం అందజేసిన మంత్రి పొన్నం : ఎర్రవల్లి ఫామ్​హౌస్​లో మాజీ సీఎం కేసీఆర్​ను మంత్రి పొన్నం ప్రభాకర్​ కలిశారు. ఆయనతో సుమారు గంట 15 నిమిషాల పాటు భేటీ అయ్యారు. ఈ సందర్భంగా తెలంగాణ తల్లి విగ్రహావిష్కరణ, ప్రజాపాలన వేడుకలకు రావాలని కేసీఆర్​కు పొన్నం ప్రభాకర్​ ఆహ్వానపత్రం అందజేశారు. ఆయనతో పాటు ప్రభుత్వ ప్రోటోకాల్ ప్రజా సంబంధాల సలహాదారు హర్కర వేణుగోపాల్ , ప్రోటోకాల్ డైరెక్టర్ వెంకట్ రావు ఉన్నారు.

'తెలంగాణ తల్లి విగ్రహావిష్కరణ కార్యక్రమం కోసం మాజీ సీఎం కేసీఆర్​ను తెలంగాణ ప్రభుత్వం తరఫున నేను, ప్రోటోకాల్​ అధికారులము కలిశాము. తెలంగాణలో అందరినీ గౌరవించాలి అనేది మా పార్టీ తీసుకున్న నిర్ణయం. లంచ్​ టైంలో వచ్చాము కనుక కేసీఆర్​ లంచ్​ చేయమంటే చేశాము. మా భేటీలో ఎటువంటి రాజకీయ అంశాలు చర్చకు రాలేదు. మేము అందరినీ ఆహ్వానిస్తున్నాం. కేసీఆర్​ వస్తారా? రారా అన్న నిర్ణయం పార్టీలో చర్చించి తీసుకుంటారు' అని మంత్రి పొన్నం ప్రభాకర్​ తెలిపారు.

తెలంగాణ తల్లి విగ్రహావిష్కరణకు కేసీఆర్‌ను ఆహ్వానించిన మంత్రి (ETV Bharat)

కేంద్రమంత్రి కిషన్ రెడ్డిని ఆహ్వానించిన మంత్రి పొన్నం : మరోవైపు కేంద్రమంత్రి కిషన్​ రెడ్డిని కూడా మంత్రి పొన్నం ప్రభాకర్​ కలిశారు. రాజ్​ భవన్​ దిల్​కుశా గెస్ట్​హౌస్​లో కేంద్ర మంత్రి కిషన్​ రెడ్డిని కలిసిన పొన్నం ప్రభాకర్​ ప్రజాపాలన ప్రజా విజయోత్సవాలు కార్యక్రమంలో పాల్గొనాలని విజ్ఞప్తి చేశారు. తెలంగాణ తల్లి విగ్రహ ఆవిష్కరణ కార్యక్రమానికి కూడా రావాలని కిషన్​రెడ్డికి మంత్రి పొన్నం ఆహ్వానపత్రికను అందజేశారు. ఇందుకు సంబంధించిన ఫొటోలను ఎక్స్​ వేదికగా షేర్​ చేశారు.

రాజ్ భవన్ దిల్ కుశా గెస్ట్ హౌస్ లో కేంద్ర మంత్రి కిషన్ రెడ్డిని కలిసి
ప్రజా పాలన ప్రజా విజయోత్సవాలు కార్యక్రమంలో పాల్గొనాలని తెలంగాణ తల్లి విగ్రహ అవిష్కరణకు రావాలని కిషన్ రెడ్డికి ఆహ్వాన పత్రిక అందించడం జరిగింది pic.twitter.com/frnHC35enP

— Ponnam Prabhakar (@Ponnam_INC) December 7, 2024