కరువు అనేది ప్రకృతి రాజకీయ పార్టీలను అనడం సరికాదు : పొన్నం ప్రభాకర్​

Minister Ponnam Prabhakar on Water Problem in Telangana : రాష్ట్రంలో నీటి కరువు కాంగ్రెస్​ వల్లనే అంటూ విమర్శించడం మూర్ఖత్వానికి నిదర్శనమని మంత్రి పొన్నం ప్రభాకర్​ అన్నారు. ప్రకృతికి సంబంధించిన అంశాలను పార్టీలపై వేయడం సరికాదన్నారు.

Minister Ponnam Prabhakar on Water Problem in Telangana : దేశవ్యాప్తంగా వర్షాభావ పరిస్థితులు నెలకొంటే దాన్ని కొందరు కాంగ్రెస్ ప్రభుత్వం తీసుకొచ్చిందని దుష్ప్రచారం చేస్తున్నారని బీసీ సంక్షేమ శాఖ మంత్రి పొన్నం ప్రభాకర్​ విమర్శించారు. సంకుచిత మనస్తత్వంతో ఇలాంటి వ్యాఖ్యాలు చేయడం సరికాదన్నారు. కరీంనగర్ జిల్లాలో పలు అభివృద్ధి కార్యక్రమాల్లో పాల్గొన్న మంత్రి మహిళా వ్యవసాయ డిగ్రీ కళాశాలతో పాటు కొత్తపల్లిలో మెడికల్​ కాలేజీ భననానికి, ఉప్పరి మల్యాలలో సబ్స్​ స్టేషన్​కు శంకుస్థాపన చేశారు. విద్యార్థులు వ్యవసాయ రంగంలో కొత్త మెలకువలు నేర్చుకుని రైతులకు అదనపు ఆదాయం వచ్చే విధంగా శిక్షణ పొందాలని విద్యార్థులకు ఆయన సూచించారు.

Ponnam Comments On BRS : దేశవ్యాప్తంగా తీవ్ర వర్షభావ పరిస్థితులు నెలకొన్నాయని అందువల్ల నీటిని పొదుపుగా వాడుకోవాలని సూచనలు చేసినా ఆ అంశాన్ని కూడా కొంతమంది నాయకలు రాజకీయం చేస్తున్నారని పొన్నం ఆగ్రహం వ్యక్తం చేశారు. కరువు (Water Problem In Telangana) కాంగ్రెస్ వల్లనే వచ్చిందని ముఖ్యమంత్రి స్థాయిలో పని చేసిన నాయకులు కూడా విమర్శించడం మూర్ఖత్వానికి నిదర్శనమని పొన్నం దుయ్యబట్టారు. సెప్టెంబర్​లో వర్షాలు కురవాల్సి ఉండగా కురవలేదని ఆ సమయంలో బీఆర్​ఎస్​ ప్రభుత్వం (BRS Past Ruling) ఉందని దానికి కారణం వారేనని తాము నిందించడం లేదని ఆయన పేర్కొన్నారు. కరువు అనేది ప్రకృతి, వర్షాలు పడకపోవడం వల్ల వస్తుందని అన్నారు. దానికి ఇతరులను విమర్శించడం సరికాదన్నారు.

"ఉప్పర మల్యాల సబ్​ స్టేషన్​కు శంఖుస్థాపన చేశాం. దీని ద్వారా ఈ ప్రాంతంలో మెరుగైన విద్యుత్​ అందుతుంది. గత పది సంవత్సరాలు ఈ పనిలో ఎలాంటి పురోగతి లేదు. అప్పటి కాంగ్రెస్​ హయాంలో మొదలైంది అదే ప్రభుత్వం మళ్లీ వచ్చింది. దీన్ని తొందరగా పూర్తి చేయమని చెప్పాను. కాంగ్రెస్​ కరువు తీసుకువచ్చిందని అన్న వారందరికి చెప్తున్నా ఎందుకంటే సెప్టెంబరులో వర్షాలు పడలేదు. అప్పుడు బీఆర్​ఎస్ అధికారంలో ఉంది. ఇప్పుడు దానికి కూడా వారు బాధ్యులు అంటలేము. కరువు అనేది వర్షాలు పడకపోవడం వల్ల వస్తుంది అది ప్రకృతి ఏదో రాజకీయ పార్టీతో రాదు. అలా అనడం వారి విజ్ఞతకే వదిలేస్తున్న." - పొన్నం ప్రభాకర్​, బీసీ సంక్షేమ శాఖ మంత్రి

నీటి సమస్యను అధిగమించేందుకు అన్ని ప్రయత్నాలు చేస్తున్నామని అయితే డబ్బులు పెట్టి నీటిని కొనుగోలు చేయలేమన్న ఆయన అందుకు బదులుగా పొదుపుగా వాడుకోవాలని ఆయన సూచించారు. ఎవరైన ఎన్నికల వరకు మాత్రమే రాజకీయాలు చేయాలని ఆ తర్వాత ప్రతి అంశాన్ని రాజకీయానికి ఉపయోగించుకోవాలని చూడడం దారుణం అన్నారు.