Amazon Delivers Stone Instead of Laptop : ఒకప్పుడు ఏదైనా వస్తువో లేదా డ్రెస్సో కావాలంటే బయటకు వెళ్లి షాపింగ్ చేసే వాళ్లం. కానీ ఇప్పుడు ట్రెండ్ మారింది. ప్రస్తుతం ఏ చిన్న వస్తువు అయినా మంచి డ్రెస్ కావాలన్నా ఆఖరికి ఇంట్లోని వంట వస్తువులు కూడా ఆన్లైన్లోనే బుక్ చేసుకుంటున్నాం. ఇదంతా అందరికీ తెలిసిందేగా మరి ఇప్పుడెందుకు అని అనుకుంటున్నారా ? అసలు మ్యాటర్ ఏంటంటే ఓ వ్యక్తి అందరిలాగానే ఆన్లైన్లో షాపింగ్ చేశాడు. కానీ ఆయనకు అందరిలా కాకుండా పార్సిల్లో ఖంగు తినేలా ఐటమ్ వచ్చింది. వేల రూపాయలు పెట్టి ఆన్లైన్లో ల్యాప్టాప్ బుక్ చేసుకుంటే పార్సిల్లో ఒక నాపరాయి వచ్చింది. పార్సిల్ను చూసి ఖంగుతిన్న బాధితుడు, ల్యాప్టాప్ బుక్ చేస్తే నాపరాయి వచ్చిందేంటీ బ్రో అంటూ వాపోయాడు.
పార్సిల్ చూసి షాక్ : ప్రస్తుతం ఈ వీడియో సోషల్ మీడియాలో వైరలవుతోంది. దుండిగల్ పోలీస్ స్టేషన్ పరిధిలో ఈ ఘటన చోటుచేసుకుంది. దుండిగల్ గ్రామంలో ఉంటున్న బి. ప్రణయ్ అనే వ్యక్తి ఈనెల 21న అమెజాన్లో ల్యాబ్టాప్ బుక్ చేశాడు. ఇవాళ ఆయన చేసిన ఆర్డర్ డెలివరీ అయింది. ఈ నేపథ్యంలో అమెజాన్ పేరిట వచ్చిన పార్సిల్ను విప్పి చూడగా అందులో ఒక నాపరాయితో పాటు విరిగిపోయిన ల్యాప్టాప్ కీబోర్డు ఉంది. దీంతో బాధితుడు ఒక్కసారిగా నిర్ఘాంతపోయాడు. దీంతో మోసపోయిన అని గ్రహించిన బాధితుడు దుండిగల్ పోలీసులను ఆశ్రయించాడు. తగిన ఆధారాలతో సైబర్ క్రైమ్ పోలీస్ స్టేషన్లో ఫిర్యాదు చేయాలని వారు బాధితుడికి సూచించారు.
పార్సిల్ విషయంలో జాగ్రత్తలు : ఇటీవల కాలంలోనే ఇలాంటి ఘటనలు జరుగుతుండడంతో ఈ కామర్స్ సంస్థలు సైతం జాగ్రత్తలు తీసుకుంటూ ఓపెన్ బాక్స్‌ డెలివరీ ఆప్షన్‌ను తీసుకొచ్చాయి. వినియోగదారులకు డెలివరీ చేస్తున్న సమయంలోనే పార్సిల్లో వచ్చిన ఐటమ్ను మనం చెక్ చేసుకున్నాక డెలివరీ చేసే వ్యక్తి ఫొటో తీసుకుంటున్నారు. దీని వల్ల మనకు ఎలాంటి సమస్య ఉండదు.
ల్యాప్టాప్ బుక్ చేస్తే రాయి వచ్చింది.. పార్సిల్ ఓపెన్ చేసి ఖంగుతిన్న వినియోగదారుడు
