Man Killed Brother-in-Law in Rangareddy : పరామర్శించేందుకు వచ్చిన బామ్మర్దిని బావ హ్యత చేసిన ఘటన రంగారెడ్డి జిల్లాలో చోటుచేసుకుంది. ఈ విషయం తెలుసుకున్న బాధితుని కుటుంబసభ్యులు, గ్రామస్థులు ప్రతీకారంగా బావను అంతమొందించారు. దీంతో ఒకే రోజు రెండు హత్యలు చోటుచేసుకున్నాయి. స్థానికులు తెలిపిన వివరాల ప్రకారం, రంగారెడ్డి జిల్లా మాడుగుల మండలం నాగిళ్ల గ్రామానికి చెందిన యాదయ్య అనే వ్యక్తి 10 సంవత్సరాల క్రితం తన భార్యను గొడ్డలితో నరికి చంపాడు. ఈ కేసులో జైలుకు వెళ్లి గతేడాది విడుదలయ్యాడు.
తాజాగా ఆదివారం నాగిళ్లలో ఓ వివాహం జరగగా, ఆ వివాహ వేడుకలో పాల్గొనేందుకు యాదయ్య భార్య తమ్ముడు యాచారం మండలం మేడిపల్లి గ్రామానికి చెందిన గడ్డం శ్రీను బావను పరామర్శించేందుకు అతని ఇంటికి వచ్చాడు. ఈ క్రమంలో యాదయ్య శ్రీనుపై గొడ్డలితో దాడి చేయడంతో అతను అక్కడికక్కడే మృతి చెందాడు. ఈ విషయం తెలుసుకున్న మృతుడి కుటుంబీకులు, బంధువులు నాగిళ్లకు చేరుకుని యాదయ్యపై దాడి చేశారు. ఈ దాడిలో యాదయ్య కూడా మృతి చెందాడు. ఆదివారం రాత్రి అయ్యేవరకు ఇద్దరి మృతదేహాలను అక్కడే ఉంచారు. విషయం తెలుసుకున్న పోలీసులు, ఘటనా స్థలానికి చేరుకుని మృతదేహాలను శవ పరీక్షల నిమిత్తం స్థానిక ప్రభుత్వాసుపత్రికి తరలించారు. ఈ మేరకు కేసు నమోదు చేసుకుని దర్యాప్తు చేస్తున్నారు.
