Man Arrested For Multiple Marriages Fraud In Eluru Dist : సినిమాల్లో చూపించినట్లుగా నకిలీ కుటుంబ సభ్యులను సృష్టిస్తాడు. ఇస్రోలో (ISRO) ఉద్యోగం చేస్తున్నానని, విల్లాలు, బంగ్లాలు ఉన్నాయని, 100 ఎకరాలకు ఆసామినని అందరిని నమ్మిస్తాడు. తనకు ఇంకా పెళ్లి కాలేదని బుకాయిస్తాడు. ఇలా మాటల గారడీతో ఏకంగా 4 పెళ్లిళ్లు చేసుకున్న నిత్య పెళ్లికొడుకును ఏలూరు జిల్లా పోలీసులు అరెస్టు చేశారు.
వందెకరాల ఆసామినంటూ 4 పెళ్లిళ్లు: అంశం అనీల్‌బాబు అలియాస్‌ కల్యాణ్‌రెడ్డిది తిరుపతి జిల్లా వెంకటగిరి మండలం బంగారుపేట. ప్రస్తుతం తెలంగాణలోని ఖమ్మం జిల్లా మధిరలోని టీచర్స్‌కాలనీలో ఉంటున్నాడు. 9వ తరగతి వరకు చదివాడు. ఓ మ్యాట్రిమోనిలో కల్యాణ్‌రెడ్డిగా రిజిస్టర్‌ చేయించుకున్నాడు. దీని ద్వారా తనను సంప్రదించిన వారికి ఫోన్‌ చేసి, కల్యాణ్రెడ్డి (వరుడు) తండ్రిని మాట్లాడుతున్నానని ఇతరులతో చెప్పించేవాడు. 'మా అబ్బాయి కల్యాణ్రెడ్డి ఇస్రోలో హెచ్ఆర్ ఇన్‌ఛార్జి. నేను, నా భార్య ఇక్కడ ఇంజినీర్లుగా పనిచేస్తున్నాము' అని చెప్పేవారు. మా అబ్బాయి పెళ్లిచూపులకు వస్తాడు అని అమ్మాయి కుటుంబ సభ్యులను నమ్మించేవాడు. కల్యాణ్రెడ్డి పెళ్లి చూపులకు వచ్చినప్పుడు తమ తల్లిదండ్రులకు లీవ్ దొరక్కపోవడంతో రాలేకపోయారని బాధిత కుటుంబ సభ్యులకు చెప్పేవాడు. తాను డబ్బున్న వాడినని అమ్మాయి తరపు వారు నమ్మేలా హైదరాబాద్‌ శివారు చేవెళ్లలో ఓ ఫామ్‌హౌస్, బెంగళూరులో ఓ విల్లా అద్దెకు తీసుకున్నాడు. అవి తనవేనని చెప్పి వారిని నమ్మించాడు. తను ఎప్పుడు ఓ వ్యక్తిని, పెళ్లి చేసే పంతులును వెంటే ఉంచుకునేవాడు.
ప్రియురాళ్ల సిగపట్లు-మంటల్లో కారు! అపార్ట్మెంట్లో రచ్చరచ్చ - Triangle Love Story
ఇలా చిక్కాడు : గత ఏడాది (2023) 5వ పెళ్లి చేసుకునేందుకు అనీల్‌బాబు ప్రణాళిక రచించాడు. ఈ క్రమంలోనే ఏలూరు జిల్లా భీమడోలు మండలం గుండుగొలనుకు చెందిన గుండా లక్ష్మీకుమారిని సంప్రదించాడు. ఆమె 2వ కుమార్తెను పెళ్లి చేసుకుని, 3వ కుమార్తెకు ఇస్రోలో ఉద్యోగం ఇప్పిస్తానని మాట ఇచ్చాడు. దఫదఫాలుగా వారి నుంచి 9.53 లక్షలు రూపాయలు కాజేశాడు. ఈ క్రమంలోనే తన వద్ద పని చేస్తున్న తుంగా శశాంక్ అనే మహిళతో ఇంటర్వ్యూ చేయించి నకిలీ అపాయింట్‌మెంట్‌ ఆర్డర్‌ కూడా ఇప్పించాడు. కొద్ది రోజులు తర్వాత మోసపోయినట్లు గ్రహించిన బాధితురాలు భీమడోలు పోలీసుస్టేషన్‌లో ఫిర్యాదు చేసింది. ఈ విషయంపై భీమడోలు సీఐ విల్సన్‌ దర్యాప్తు ప్రారంభించారు. ఈ నేపథ్యంలోనే సోమవారం (అక్టోబర్ 8న) డీఎస్పీ శ్రావణ్‌కుమార్‌ ఆధ్వర్యంలో గుండుగొలను సమీపంలో నిందితులను అరెస్టు చేశారు. అనీల్‌బాబు గతంలో పెళ్లిళ్లు చేసుకున్న వారిని ఉద్యోగాలు ఇప్పిస్తామని మోసగించారు. వారి నుంచి రూ.1.50 కోట్ల వరకు కాజేసినట్లు ఎస్పీ ప్రతాప్ శివకిశోర్ తెలిపారు. ప్రధాన నిందితుడు అనీల్‌బాబు అలియస్ కల్యాణ్రెడ్డితో పాటు వైఎస్సార్‌ జిల్లా యర్రగుంట్లకు చెందిన తుంగా శశాంక్, కారు డ్రైవరు నంద్యాల జిల్లా బనగానిపల్లి మండలం బత్తులూరుపాడుకు చెందిన పల్లె హేమంత్‌రెడ్డిని అరెస్ట్ చేశారు. వారి ఇరువురి నుంచి 2 లక్షల రూపాయల నగదు, కారు, సెల్‌ఫోన్లు, 13 సిమ్‌లు, నకిలీ అపాయింట్‌మెంట్‌ లెటర్లు, ల్యాప్‌టాప్‌లు, డాక్యుమెంట్లను స్వాధీనం చేసుకున్నారు.
తల్లి ప్రేమకు నిర్వచనంగా నిలుస్తున్న షీబా - పాపకు పునర్జన్మ! - sheeba from Sattenapalle
"అధిక వడ్డీ, తక్కువ ధరకే వస్తువులు"- రూ.2.5 కోట్ల ఘరానా మోసం - Cheater Arrested on police
