ప్యారడైజ్​లో కేటీఆర్​ సందడి - పార్టీ నేతలతో కలిసి బిర్యానీ దావత్

ప్యారడైజ్ రెస్టారెంట్​​లో మాజీమంత్రి కేటీఆర్ సందడి - మాజీమంత్రులు, ఎమ్మెల్యేలు, పార్టీ నేతలతో కలిసి బిర్యానీ తిన్న కేటీఆర్​

KTR Ate biryani with BRS Leaders at Paradise Restaurant: బిర్యానీ అంటే ఎవరికి నచ్చదు చెప్పండి. ఎవరైనా కనీసం నెలల్లో ఒక్కసారైనా తినాలని అనుకుంటారు. ఇంట్లో ఏ చిన్న కార్యక్రమం జరిగినా విందుకు మాత్రం బిర్యానీకే మొగ్గు చూపుతారు. సరదాగా స్నేహితులు కలిసినా బంధువులు ఇంటికి వచ్చినా బిర్యానీ కచ్చితంగా తింటాం. ఇక బయటకు వెళ్తే మాత్రం కచ్చితంగా బిర్యానీ తినాలని అనుకుంటాం.

ఈ నేపథ్యంలో బిర్యానీ అంటే మొదట గుర్తొచ్చేది హైదరాబాద్​. ఇక హైదరాబాద్​లో ఫేమస్​ బిర్యానీ రెస్టారెంట్​ అంటే ముందుండే వాటిలో ఒకటి ప్యారడైజ. కాంగ్రెస్ అగ్రనేత రాహుల్ గాంధీ నుంచి సినిమా తారల వరకూ ఈ బిర్యానీకి అభిమానులే. ఇక హైదరాబాదీల గురించి ప్రత్యేకంగా చెప్పనక్కర లేదు. ఇవాళ ఈ రెస్టారెంట్​కు బీఆర్​ఎస్ వర్కింగ్ ప్రెసిడెంట్ కేటీఆర్​ వచ్చి తమ పార్టీ నేతలతో వచ్చి సందడి చేశారు.

ఇవాళ మాజీ మంత్రులు, ఎమ్మెల్యేలు, బీఆర్​ఎస్​ నేతలతో కేటీఆర్ సికింద్రాబాద్​లో ఓ పార్టీ కార్యక్రమంలో పాల్గొన్నారు. అది ముగిసే సమయానికి లంచ్ టైమ్ అయింది. అప్పుడు ఇంటికి వెళ్లడం ఎందుకు అని పక్కనే ప్యారడైజ్ రెస్టారెంట్​కు ఓసారి వెళదాం అని అనుకున్నారు. అందరు నేతలతో కలిసి కేటీఆర్ ​ప్యారడైజ్​కు వెళ్లారు. కేటీఆర్​ను చూడగానే రెస్టారెంట్​కు వచ్చిన కస్టమర్స్ ఆయనతో ఫోటీలు దిగేందుకు ఉత్సాహం చూపారు. కేటీఆర్ కూడా సెల్ఫీలు దిగి వారితో కాసేపు సరదాగా ముచ్చటించారు.

రెస్టారెంట్​లో సందడి వాతావరణం: హోటల్ సిబ్బంది కూడా కేటీఆర్​తో సెల్ఫీలు దిగేందుకు పోటీపడ్డారు. దీంతో కాసేపు రెస్టారెంట్​లో సందడి వాతావరణం నెలకొంది. అనంతరం నేతలతో కలిసి కేటీఆర్ బిర్యానీ తిన్నారు. చివర్లో బిర్యానీ సూపర్ అంటూ ప్యారడైజ్ మేనేజ్​మెంట్​ను మెచ్చుకున్నారు. అక్కడున్న వారు కేటీఆర్​ సింప్లిసిటీని మెచ్చుకున్నారు. ఇటీవలే నాంపల్లిలోని ఓ టీ స్టాల్​లో బీఆర్​ఎస్​ ఎమ్మెల్యేలతో కలిసి కేటీఆర్​ టీ తాగారు. అక్కడున్న వారు కూడా కేటీఆర్​ను చూసి తీసుకోవడానికి ఎగబడ్డారు. ఈ విందులో కేటీఆర్​తో పాటు మాజీ మంత్రులు తలసాని శ్రీనివాస్ యాదవ్, పద్మారావు గౌడ్, పలువురు బీఆర్​ఎస్ ఎమ్మెల్యేలు, మాజీ ఎమ్మెల్యేలు, పార్టీ​ నేతలు పాల్గొన్నారు.