సిర్పూర్ నియోజకవర్గ అభివృద్ధి కోసమే కాంగ్రెస్​లో చేరాను : కోనేరు కోనప్ప

BRS Ex MLA Konappa Joins Congress : ఎన్నికల వేళ రాజకీయ వలసలు రాజుకుంటున్నాయి. తాజాగా కుమురం భీం అసిఫాబాద్ జిల్లా​ అధ్యక్షుడు సిర్పూర్ మాజీ ఎమ్మెల్యే కోనేరు కోనప్ప కాంగ్రెస్ తీర్థం పుచ్చుకున్నారు. ఎమ్మెల్యేగా ఓడిపోయిన తాను నియోజకవర్గ అభివృద్ధి కోసమే కాంగ్రెస్​లో చేరినట్లు తెలిపారు

BRS Ex MLA Konappa Joins Congress : కుమురం భీం అసిఫాబాద్​ జిల్లా అధ్యక్షుడు సిర్పూర్​ మాజీ ఎమ్మెల్యే కోనేరు కోనప్ప కాంగ్రెస్​లో చేరారు. ఆ జిల్లా ఇంఛార్జి మంత్రి సీతక్క సమక్షంలో కాంగ్రెస్​ కండువా కప్పుకున్నారు. ఈ సందర్భంగా మాట్లాడిన ఆయన తాను మూడు సార్లు ఎమ్మెల్యేగా గెలిచి సిర్పూర్​ నియోజకవర్గ అభివృద్ధికి కృషి చేశానని తెలిపారు. ఇప్పుడు ఎమ్మెల్యేగా ఓటమి పాలై ఏమీ ఆశించకుండా నియోజకవర్గ అభివృద్ధి కోసం, కార్యకర్తలు ,అభిమానులు కోరినందుకు హస్తం​ పార్టీలో చేరారని స్పష్టం చేశారు.

Minister Seethakka on Telangana Development : మరోవైపు మంత్రి సీతక్క మాట్లాడుతూ, రాష్ట్రంలోని మారుమూల గ్రామాల అభివృద్ధి, ప్రజా సంక్షేమం కోసం కాంగ్రెస్​ ప్రభుత్వం వివిధ పథకాలను ప్రవేశ పెట్టిందని తెలిపారు. బీఆర్​ఎస్​, బీజేపీ చీకటి ఒప్పందం చేసుకున్నాయని ఆరోపించారు. ఆయా పార్టీ విధానాలకు విసిగిపోయిన నాయకులు కాంగ్రెస్​ పార్టీ పరిపాలనను గుర్తించి పెద్ద సంఖ్యలో చేరుతున్నారని అన్నారు.

కాంగ్రెస్​ పార్టీ నుంచి వెళ్లినవారు తిరిగి రావాలని అనుకుంటే తప్పకుండా వారిని ఆహ్వానిస్తామని సీతక్క తెలిపారు. పదవులు లేకున్నా ప్రజల ఆకాంక్షలను నెరవేర్చడానికి ప్రయత్నిస్తున్న కాంగ్రెస్​ అగ్రనాయకుల కోసం రాష్ట్రంలో అత్యధికంగా ఎంపీ సీట్లు గెలిచి రాహుల్​ గాంధీని ప్రధాన మంత్రి చేయాలని కార్యకర్తలకు దిశానిర్దేశం చేశారు.

"కేసీఆర్​ కుటుంబపాలనకు రాహుల్​ గాంధీ కుటుంబపాలనకు చాలా వ్యత్యాసం ఉంది. ఒకరు చనిపోతే మరొకరు త్యాగాన్ని మోసుకొస్తూ దేశ సేవ చేస్తున్నారు. పార్టీని కాపాడుతూ ప్రజల ఆకాంక్షను నెరవేర్చడం కోసం తపన పడుతున్నటువంటి కుటుంబం రాహుల్​ గాంధీది అన్నారు. వారి కుటుంబంలో ఏ ఒక్కరికి పదువులు లేకున్నా ప్రజల శ్రేయస్సు కోసం పని చేస్తున్నారు. ఇందిరమ్మ ఇళ్లు, పోడుభూముల చట్టం, విద్యా హక్కు, ఉపాధి హామీ ఇలాంటివన్నీ కాంగ్రెస్​ ప్రభుత్వం తీసుకువచ్చిందని అందరు గుర్తుంచుకోవాలి." - సీతక్క, మంత్రి

ఎలాంటి పదవి కోసం కాంగ్రెస్​లో చేరడం లేదని బీఆర్​ఎస్​ మాజీ ఎమ్మెల్యే కోనేరు కోనప్ప స్పష్టం చేశారు. సిర్పూర్​ నియోజకవర్గంలో ప్రజలు ఎదుర్కొంటున్న సమస్యలన్నింటినీ పరిష్కరించాలని మంత్రి సీతక్కను కోరారు. పేద ప్రజల కోసం సీతక్క చేసిన కష్టాన్ని తాను చూశానని ఆమె శక్తి మేరకు సిర్పూర్​ నియోజకవర్గం అభివృద్ధి చేయాలని విజ్ఞప్తి చేశారు.

"ఏదో ఆశ పడి నేను కాంగ్రెస్​ పార్టీలోకి రాలేదు. సీఎం రేవంత్​రెడ్డితో, సీతక్క ఇతర ముఖ్యనాయకులతో నేను మాట్లాడాను. కానీ నాకు దవి కావాలనీ కోరుకోలేదు. నాకు ఎలాంటి ఇంఛార్జి పదవులు అవసరం లేదు. సిర్పూర్​ నియోజకవర్గం అభివృద్ధి కొరకు ప్రతిఒక్కరు సాయం చేయాలని కోరుతున్నాను." - కోనేరు కోనప్ప, కాంగ్రెస్​ నేత