Young Swimmer karthik : అందరి పిల్లలాగే ఆ యువకుడికీ ఆటలపై అమితమైన ఆసక్తి. దానికి అనుగుణంగానే విభిన్నమైన రోయింగ్, కనోయింగ్ లాంటి క్రీడలు ఎంచుకున్నాడు. అందులోని మెలకువలను వడివడిగా ఒక్కొక్కటి నేర్చుకున్నాడు. కానీ కరోనా ఆ కుర్రాడి ప్రాక్టీస్‌కి అడ్డంకులు సృష్టించింది. ఆ సమయంలో ఖాళీగా ఉండటం ఎందుకని సరదాగా స్విమ్మింగ్ మొదలు పెట్టాడు. క్రమంగా దానినే అభిరుచిగా మలచుకున్నాడు. ఇప్పుడు జాతీయ, అంతర్జాతీయ వేదికలపై పతకాలు సాధిస్తూ ఔరా అనిపిస్తున్నాడు ఆ చిచ్చరపిడుగు. మరి ఆ యువ స్విమ్మర్ గెలుపుకై అతని జీవితం ఎన్ని విధాలుగా మలుపులు తిరిగిందో తెలుసుకుందామా!
ఆటలు అనగానే టక్కున గుర్తుకు వచ్చేవి క్రికెట్‌, కబడ్డీ, ఫుట్‌బాల్‌. ఎందుకంటే చాలామంది వీటినే ప్రొఫెషనల్‌ గేమ్స్‌గా ఎంచుకుంటారు. ఐతే, కాస్త భిన్నంగా ఆలోచించాడీ యువకుడు. మొదట్లో రోయింగ్, కెనోయింగ్‌ క్రీడల్లో ప్రావీణ్యం సంపాదించాడు. కరోనా రాకతో తన దిశ మార్చుకుని స్విమ్మింగ్ వైపు అడుగులేశాడు. అనతికాలంలోనే జాతీయ, అంతర్జాతీయ వేదికలపై స్వర్ణ పతకాలు సాధిస్తునాడు.
కరోనా ప్రాక్టీస్‌కి కళ్లెం వేసింది: ఈ స్విమ్మర్ పేరు భవానీ కార్తీక్. పుట్టి పెరిగింది ఏలూరు జిల్లా జంగారెడ్డి గూడెంలో. ప్రస్తుతం దూరవిద్యలో డిగ్రీ చదువుతున్నాడు. చిన్నప్పటి నుంచి ఆటలంటే అమితమైన ఆసక్తి ఈ యువకుడికి. కానీ అందరిలా కాకుండా భిన్నమైన క్రీడలో రాణించలనేది కార్తిక్‌ తపన. అంతాసాఫీగానే సాగితే అది జీవితం ఎందుకవుతుంది. ఆ సమయానికి కరోనా వచ్చింది. కార్తిక్‌ ప్రాక్టీస్‌కి కళ్లెం వేసింది. ఏమాత్రం నిరుత్సాహ పడని ఈ యువకుడు తన దిశను మార్చుకున్నాడు. స్మిమ్మింగ్‌ని ప్రొఫెషనల్‌ గేమ్‌గా ఎంచుకోవాలని భావించాడు. కొన్ని రోజులు ఎర్రకాలువ జలాశయంలో రాజేష్‌ అనే కోచ్ దగ్గర ఈదడంలో తర్ఫీదు పొందాడు.
అంతే గాక జిల్లా క్రీడా ప్రాధికార సంస్థ తరపున స్మిమ్మింగ్‌ కోచ్ గణేష్ వద్ద ప్రత్యేక శిక్షణ తీసుకున్నాడు కార్తిక్‌. అక్కడే స్విమ్మర్స్‌కి కావాల్సిన నైపుణ్యాలపై అవపోసన పట్టాడు. అప్పటి నుంచి వెనుతిరిగి చూసుకోలేదు. పాల్గొన్న ప్రతీ స్విమ్మింగ్ పోటీల్లో పతకాలు సాధిస్తూ ఔరా అనిపిస్తున్నాడు. సమస్యల కంటే సాధించాలనే తపన ఈ యువకుడిలో బలంగా నాటుకుంది. అందుకే బాల్యం నుంచి కంటి చూపు సమస్యతో బాధపడుతున్నా ఏనాడు అధైర్యపడలేదు. కోచ్‌ల సలహాతో పారా స్విమ్మింగ్‌లోకి అడుగుపెట్టాడు. మొదటిసారి బెంగుళూరు జరిగిన స్విమ్మింగ్ పోటీల్లో 3 విభాగాల్లో స్వర్ణ పతకాలు సాధించి శభాష్‌ అనిపించాడు.
పారాలింపిక్స్‌ పతకాలే పరమావధిగా: జాతీయస్థాయి పోటీల్లో బంగారు పతకాలతో మెరిశాడీ స్విమ్మర్. గతేడాది ఈజిప్ట్‌లో జరిగిన అంతర్జాతీయ పారా స్విమ్మింగ్ పోటీల్లో గోల్డ్, సిల్వర్‌ మెడల్స్‌ సాధించాడు. ఇటీవల గోవాలో జరిగిన జాతీయ పారా స్విమ్మింగ్ పోటీల్లో 3 విభాగాల్లో 3 స్వర్ణ పతకాలు గెలిచాడు. 5 పారా నేషనల్స్, ఒక జూనియర్ నేషనల్స్‌లో 5 జాతీయ రికార్డులు నెలకొల్పాడు. 3 సార్లు వంద మీటర్ల ఫ్లై విభాగంలో రికార్డు సాధించాడు. 100 మీటర్ల బ్రెస్ట్ స్ట్రోక్, 400 మీటర్ల ఫ్రీ స్టైల్ విభాగాల్లో రికార్డు సాధించాడు.
కుమారుడి ఆసక్తిని గుర్తించి హైదరాబాద్‌లోని జియాన్ స్పోర్ట్స్ అకాడమీలో చేర్పించినట్లు కార్తిక్‌ తండ్రి నాగేంద్ర చెబుతున్నారు. అంతర్జాతీయ వేదికలపై మరిన్ని పతకాలు సాధించేవరకు ప్రోత్సహిస్తామని అంటున్నారు. కాగా కార్తిక్‌కి ఆధునిక ప్రమాణాలతో కూడిన శిక్షణ అవసరం ఉందని కోచ్ చెబుతున్నారు. తల్లిదండ్రుల ప్రోత్సాహం, కోచ్ శిక్షణలో అంతర్జాతీయ పతకాలే లక్ష్యంగా సాధన చేస్తున్నాడీ యంగ్‌ స్విమ్మర్. భవిష్యత్తులో పారాఒలింపిక్స్‌ పతకం సాధిస్తానని ధీమా వ్యక్తం చేస్తున్నాడు.
