ఎంపీ అవినాష్‌రెడ్డి హౌస్‌ అరెస్ట్ - వైఎస్సార్ జిల్లాలో ఉద్రిక్తత

ఎంపీ వైఎస్‌ అవినాష్‌రెడ్డి గృహనిర్బంధం - దేవినేని అవినాష్‌ సహా వైఎస్సార్సీపీ కార్యకర్తలు స్టేషన్‌కు తరలింపు

MP YS Avinash Reddy House Arrest : కడప ఎంపీ వైఎస్‌ అవినాష్‌రెడ్డిని పోలీసులు హౌస్‌ అరెస్ట్ చేశారు. అవినాష్‌రెడ్డిని అదుపులోకి తీసుకున్న పోలీసులు పులివెందులలో గృహనిర్బంధం చేశారు. వివరాల్లోకి వెళితే, సాగునీటి సంఘాల ఎన్నికల అంశానికి సంబంధించి వైఎస్సార్ జిల్లా వేముల మండల కేంద్రంలో టీడీపీ, వైఎస్సార్సీపీ శ్రేణులు పోటాపోటీగా మోహరించడంతో తీవ్ర ఉద్రిక్త పరిస్థితి నెలకొంది.

ఎంపీ అవినాష్ రెడ్డి పులివెందుల నుంచి వేముల తహసీల్దార్ కార్యాలయానికి వస్తున్నారనే సమాచారంతో ముందుగానే అక్కడికి స్థానికి టీడీపీ నాయకులు, కార్యకర్తలు చేరుకున్నారు. ఆ సమయంలో సాక్షి ప్రతినిధులు అక్కడికి రావడంతో వారిపై టీడీపీ శ్రేణులు దాడి చేసినట్లు చెబుతున్నారు. దాడి ఘటనపై పోలీసులకు ఫిర్యాదు చేశారు. విషయం తెలుసుకున్న అవినాష్ రెడ్డి నేరుగా వేముల పోలీస్ స్టేషన్ కు వచ్చి దాడి ఘటనపై ఆరా తీశారు.

ఆ సమయానికి అవినాష్ రెడ్డి వెంట వందలమంది వైఎస్సార్సీపీ కార్యకర్తలు పోలీస్ స్టేషన్ వద్దకు చేరుకున్నారు. అక్కడి నుంచి తాహసీల్దార్ కార్యాలయానికి వెళ్లాలని అవినాష్ రెడ్డి ప్రయత్నించడంతో పోలీసులు అడ్డుకున్నారు. సాగునీటి సంఘాల ఎన్నికల్లో పాల్గొనాలంటే వీఆర్వోలు నోడ్యూస్ సర్టిఫికెట్ ఇవ్వడం లేదని అవినాష్ రెడ్డి ఆరోపించారు. ఈ విషయంపై మాట్లాడేందుకు తాహసీల్దార్ కార్యాలయానికి వెళ్లేందుకు యత్నించగా పోలీసులు నిలువరించారు.

కార్యాలయం వద్ద పెద్దసంఖ్యలో టీడీపీ శ్రేణులు ఉండటంతో రెండు వర్గాల మధ్య గొడవ జరుగుతుందని భావించిన పోలీసులు అవినాష్ రెడ్డి వెళ్లకుండా అడ్డుకున్నారు. బలవంతంగా అతన్ని అదుపులోకి తీసుకుని పోలీసు వాహనంలో పులివెందుల తీసుకెళ్లారు. పులివెందులలో గృహనిర్బంధం చేశారు. వేములలో రెండు పార్టీల శ్రేణులను అక్కడ లేకుండా పోలీసులు చెదరగొట్టారు.

మరోవైపు రైతులు సమస్యలు ఎదుర్కొంటున్నారంటూ రాష్ట్రవ్యాప్తంగా వైఎస్సార్సీపీ పోరుబాట పట్టింది. అన్నదాతలకు పెట్టుబడి సాయం, బీమా ఇవ్వాలంటూ ఆ పార్టీ నేతలు, శ్రేణులు కలెక్టరేట్ల ఎదుట నిరసనలు చేపట్టారు. రైతు సమస్యలపై ఎన్టీఆర్ జిల్లా కలెక్టర్‌కు వినతిపత్రం ఇచ్చేందుకు వెళ్తున్న వైఎస్సార్సీపీ నేతలను పోలీసులు అరెస్టు చేశారు. కలెక్టరేట్‌కు సమీపంలో ఇందిరాగాంధీ మున్సిపల్ స్టేడియంలో స్వర్ణాంధ్ర విజన్ -2047 ఆవిష్కరణ సభ జరుగుతుండటంతో అటువైపు వెళ్లేందుకు పోలీసులు అనుమతి నిరాకరించారు. కలెక్టరేట్ వైపు వెళ్లొద్దని పోలీసులు వారించినా వినకుండా ముందుకు దూసుకుపోవడంతో దేవినేని అవినాష్‌ సహా వైఎస్సార్సీపీ కార్యకర్తలను పోలీసులు అరెస్ట్ చేసి స్టేషన్‌కు తరలించారు.