భద్రాద్రి థర్మల్​ ప్లాంటు తెలంగాణ డిస్కంలకు భారమే - కమిషన్​కు నివేదిక ఇచ్చిన జెన్​కో - Bhadradri Thermal Power Plant

Bhadradri Thermal Power Plant : భద్రాద్రి థర్మల్​ ప్లాంటు తెలంగాణ డిస్కంలకు భారమేనని కమిషన్​కు జెన్​కో నివేదిక ఇచ్చింది. ఈ ప్లాంటులో విద్యుదుత్పత్తి వ్యయం భారీగా పెరిగిందని తెలిపింది. యూనిట్​కు రూ.6.03 ఖర్చు అవుతుందని తెలిపింది. కరెంటు ఉత్పత్తిలో నాసిరకం బొగ్గును వాడుతున్నారని కమిషన్​కు పంపిన నివేదికలో జెన్​కో తెలిపింది.

Bhadradri Thermal Power Plant Issue : భద్రాద్రి థర్మల్​ ప్లాంటు నిర్మాణంపై విచారణకు రాష్ట్ర ప్రభుత్వం నియమించిన జస్టిస్​ ఎల్​.నరసింహారెడ్డి కమిషన్​ బొగ్గు వినియోగం, విద్యుదుత్పత్తి వ్యయంపై సమగ్ర వివరాలను సేకరించింది. ఈ ప్లాంటులో విద్యుదుత్పత్తి వ్యయం భారీగా పెరిగిందని తెలిపింది. గత కొన్ని రోజులుగా భద్రాద్రి థర్మల్​ ప్లాంట్​పై కమిషన్​ విచారణను వేగవంతం చేసింది.

జస్టిస్​ ఎల్​. నరసింహారెడ్డి కమిషన్​కు జెన్​కో అందించిన వివరాలు :

• దేశంలోని పలు థర్మల్​ విద్యుత్​ కేంద్రాలతో పోలిస్తే భద్రాద్రిలో బొగ్గు వినియోగం, కరెంటు ఉత్పత్తి వ్యయం అధికంగా ఉంది.
• ప్రస్తుత ఆర్థిక సంవత్సరంలో భద్రాద్రి ప్లాంటులో ఒక యూనిట్​ విద్యుత్​ ఉత్పత్తికి సగటున రూ.6.03 ఖర్చు అవుతుంది. కానీ భూపాలపల్లిలోని కాకతీయ థర్మల్​ ప్లాంటులో సగటు ఉత్పత్తి వ్యయం రూ.4.89 మాత్రమే.
• భూపాలపల్లిలో 500,600 మెగావాట్ల చొప్పున రెండు ప్లాంట్లు ఉన్నాయి. వీటిలో గతేడాది 822.44 కోట్ల యూనిట్ల విద్యుత్​ ఉత్పత్తికి 48.14 లక్షల టన్నుల బొగ్గును మండించారు. కానీ భద్రాద్రి ప్లాంటు సామర్థ్యం దాదాపు దానికి సమానంగా 1080 మెగావాట్ల. అయినా 695.39 కోట్ల యూనిట్ల కరెంటు ఉత్పత్తికే 52.30 లక్షల టన్నుల బొగ్గు వినియోగించారు.
• కాకతీయ ప్లాంటు కన్నా 20 మెగావాట్లే తక్కువ సామర్థ్యం ఉన్నా భద్రాద్రిలో విద్యుదుత్పత్తి మాత్రం రూ.127 కోట్ల యూనిట్లు తగ్గగా, బొగ్గు మాత్రం 4.16లక్షల టన్నులు అదనంగా వినియోగించారు. భద్రాద్రి ప్లాంటులో ఒక యూనిట్​ విద్యుదుత్పత్తికి సగటున 750 గ్రాముల బొగ్గును మండించాలి. కానీ కాకతీయ ప్లాంటులో 590 గ్రాములే సరిపోతుంది.
• తెలంగాణలోని అన్ని థర్మల్​ విద్యుత్​ కేంద్రాల్లో మండించే మొత్తం బొగ్గు లెక్కను తీసుకున్నా సగటున 640 గ్రాముల బొగ్గును మండిస్తుంటే భద్రాద్రిలో అంతకన్నా 110 గ్రాములు ఎక్కువగా వినియోగించాల్సి వస్తోంది. దీని వల్లే అక్కడ ఉత్పత్తి వ్యయం యూనిట్​కు రూ.6.03కి చేరింది. ఇంతకన్నా తక్కువ ధరకే భారత ఇంధన ఎక్స్ఛేంజి(ఐఈఎక్స్​)లో కరెంటు లభిస్తోంది.
• భద్రాద్రి ప్లాంటులో విద్యుత్​ ఉత్పత్తి వ్యయం అధికంగా ఉండటం వల్ల దాన్ని కొంటున్న తెలంగాణ విద్యుత్​ పంపిణీ సంస్థలపై ఆర్థికభారం భారీగా పడుతోంది.

నాసిరకం బొగ్గుతో మరింత సమస్య : భద్రాద్రి ప్లాంటులో పూర్తిస్థాయిలో విద్యుదుత్పత్తి చేయలేకపోవడానికి కారణం నాణ్యత లేని బొగ్గును సరఫరా చేయడమేనని తెలంగాణ జెన్​కో ఇటీవల సింగరేణి సంస్థకు లేఖ రాసింది. ఈ ప్లాంటు పూర్తి సామర్థ్యం 1080 మెగావాట్లలో కనీసం 85 శాతం ఉత్పత్తి జరిగితే సగటు వ్యయం తగ్గి, రాష్ట్రానికి నిరంతర విద్యుత్​ సరఫరా సాధ్యమవుతుందని తెలిపారు. అయితే బొగ్గు నాణ్యత లేనందున ఉత్పత్తి 70 శాతం వరకు మాత్రమే ఉంటుందని తెలిపింది.