డిగ్రీ ఇంటర్న్‌షిప్‌లలో అక్రమార్కుల వసూళ్లు

కంపెనీలకు అనుమతులిచ్చేందుకు రూ.లక్షల్లో మామూళ్లు- ఉన్నత విద్యామండలి వైస్‌ ఛైర్మన్‌ అటెండర్, మరో ఉద్యోగి తొలగింపు

Irregularities in Selecting Companies for Internships in Degree And Engineering : డిగ్రీ, ఇంజినీరింగ్‌లలో ప్రవేశపెట్టిన ఇంటర్న్‌షిప్‌లకు కంపెనీలను ఎంపిక చేయడంలో కొందరు సిబ్బంది అక్రమాలకు తెర తీశారు. విద్యార్థులకు ఉచితంగా అందించాల్సిన ఇంటర్న్‌షిప్‌ను గత ప్రభుత్వ హయాంలో దాన్నో వ్యాపారంగా మార్చేశారు. ఆన్‌లైన్‌లో చేసే ఇంటర్న్‌షిప్‌కు సుమారు 300 వరకు సంస్థలు దరఖాస్తు చేసుకోగా వాటికి అనుమతులిచ్చేందుకు భారీగా వసూళ్లకు పాల్పడ్డారు. ఒక్కో అనుమతికి రూ.లక్ష నుంచి రూ.5 లక్షల వరకు తీసుకున్నట్లు ఆరోపణలు వ్యక్తమవుతున్నాయి.

ఓ కంపెనీకి అనుమతి నిమిత్తం రూ.5 లక్షలకు ఒప్పందం కుదుర్చుకొని, కొంత మొత్తం తీసుకోవడంపై ఉన్నత విద్యామండలికి ఫిర్యాదు వచ్చింది. దానిపై విచారణ చేయించగా వాస్తవమని తేలడంతో చర్యలకు ఉపక్రమించారు. ఈ వ్యవహారంలో ఉన్నత విద్యామండలి వైస్‌ ఛైర్మన్‌ వద్ద పనిచేసే అటెండర్, ఉన్నత విద్య ప్రాజెక్టుల కోసం పని చేస్తున్న ఓ ప్రైవేటు సంస్థ ఉద్యోగిని తొలగించారు. ఈ అక్రమంలో వీరిద్దరే ఉన్నారా ఇంకా ఎవరైనా ఉన్నారా? అనే కోణంలో విచారణ సాగుతోంది.

గత ప్రభుత్వ నిర్ణయంతో : డిగ్రీ, బీటెక్‌లలో 10 నెలల ఇంటర్న్‌షిప్‌ను గత ప్రభుత్వంలో ప్రవేశపెట్టారు. మూడేళ్ల డిగ్రీలో మొదటి ఏడాది పూర్తయ్యే సమయంలో కమ్యూనిటీ ప్రాజెక్టు, రెండో ఏడాది చివరిలో రెండు నెలలు ఇంటర్న్‌షిప్, మూడో ఏడాదిలో ఒక సెమిస్టర్‌ ఇంటర్న్‌షిప్‌గా పెట్టారు. వీటికి సంబంధించి నేరుగా కంపెనీల్లో పని చేసే అవకాశం లేనందున ఎక్కువమంది విద్యార్థులు ఆన్‌లైన్‌లోనే చేస్తున్నారు. ఇంటర్న్‌షిప్‌ తప్పనిసరి చేయడంతో అది పూర్తయితేనే డిగ్రీ సర్టిఫికెట్‌ వస్తుంది.

దీన్ని ఆసరాగా చేసుకొని కంపెనీలు విద్యార్థుల నుంచి డబ్బు వసూళ్లకు పాల్పడుతున్నాయి. ఏటా రెండు, ఆరు నెలల ఇంటర్న్‌షిప్‌లకు కంపెనీలు ఉన్నత విద్యామండలి వెబ్‌సైట్‌లో రిజిస్ట్రేషన్‌ చేసుకోవాలి. ఈ ఏడాదికి సంబంధించి ఈ రిజిస్ట్రేషన్‌ ఈ నెల 22తో ముగిసింది. దాదాపు 300 దరఖాస్తులు వచ్చాయి. వాటిని పరిశీలించి, అనుమతులు ఇవ్వాల్సి ఉంది. ఈ ప్రక్రియను ఓ ప్రైవేటు సంస్థకు చెందిన సిబ్బందితోపాటు ఉన్నత విద్యామండలి అధికారులు పరిశీలిస్తున్నారు. ఈ ప్రక్రియలో కొందరు వసూళ్లకు తెర తీశారు.

కంపెనీలకు ఆదాయ వనరు

• ఉన్నత విద్యామండలి తరఫున రిజిస్ట్రేషన్‌ అయిన సంస్థలు కళాశాలలతో కలిసి విద్యార్థులకు ఇంటర్న్‌షిప్‌లను నిర్వహిస్తాయి. ఇందుకు ఒక్కో విద్యార్థి నుంచి కోర్సు ఆధారంగా రూ.500 నుంచి రూ.3,500 వరకు వసూలు చేస్తున్నాయి.
• కంపెనీలకు ఇదో ఆదాయ వనరుగా మారింది. దీంతో ఉన్నత విద్యామండలిలో పని చేసేవారు వాటికి అనుమతులు ఇచ్చేందుకు అక్రమాలకు పాల్పడుతున్నారు.
• ఓ సంస్థకు ఏకంగా 2,500 మంది విద్యార్థులు ఇంటర్న్‌షిప్‌కు ఉన్నారు. గత ప్రభుత్వంలో ఉన్నత విద్యామండలిలో పని చేసిన వ్యక్తి ఆ కంపెనీకి వత్తాసు పలకడంతో భారీగా వ్యాపారం చేస్తోంది.
• ఉన్నత విద్యామండలి అనుమతి లభించిన తరువాత ఆయా కంపెనీలు ఏకంగా ప్రకటనలు తయారు చేసి, కళాశాలలకు పంపుతున్నాయి. ఆయా సంస్థలు విద్యార్థుల నుంచి డబ్బు వసూలు చేయడం తప్ప, వారికి నేర్పుతున్నది ఏమీ లేదనే విమర్శలున్నాయి.

డబ్బు కొట్టు ధ్రువపత్రం పట్టు

• డిగ్రీలో కన్వీనర్, యాజమాన్య కోటాలు కలిపి ఏటా 2 లక్షల మంది వరకు ప్రవేశాలు పొందుతున్నారు. బీటెక్‌లో లక్ష మందికిపైగా చేరుతున్నారు. వీరందరూ డిగ్రీ పట్టా పొందేందుకు తప్పనిసరిగా ఇంటర్న్‌షిప్‌ చేయాల్సిందే.
• ఫీజు కడితే చాలు కొన్ని కంపెనీలు ధ్రువపత్రాలు ఇచ్చేస్తున్నాయి. వాటిని సమర్పించి డిగ్రీలు పొందుతున్నారు. నేరుగా ఇంటర్న్‌షిప్‌ చేసేందుకు కంపెనీలు లేకపోవడంతో ఆన్‌లైన్‌లోనే ఎక్కువగా చేస్తున్నారు. దీంతో డబ్బు చెల్లించి, సర్టిఫికెట్లు పొందుతున్నారు.
• కర్నూలుకు చెందిన ఓ డిగ్రీ కళాశాలలో ప్రముఖ కంపెనీలు శిక్షణ ఇచ్చి, ఉద్యోగాలు సైతం ఇస్తున్నాయి. ఆ సంస్థలకు గుర్తింపు ఇవ్వాలని ఆ కళాశాల యాజమాన్యం కోరగా ఉన్నత విద్యామండలి గతంలో తిరస్కరించింది. మామూళ్లు ఇవ్వకపోవడంతోనే అనుమతులు ఇవ్వలేదన్న ఆరోపణలున్నాయి.