Few Care Tips for Children and Elders in Winter Season : గత నాలుగైదు రోజులుగా రాష్ట్రంలో చలి బాగా పెరిగింది. రాత్రి వేళల్లో ఉష్ణోగ్రత 20 డిగ్రీలకన్నా దిగువకు పడిపోతోంది. ముఖ్యంగా నల్లమల అటవీ ప్రాంతం ఎక్కువగా వ్యాపించి ఉండడంతో నాగర్కర్నూల్ జిల్లాలో మరింత చలి పంజా విసురుతోంది. ఈ నేపథ్యంలో పలు జాగ్రత్తలు తీసుకోవాల్సిన అవసరముంది. చలి కాలంలో అనేక వ్యాధులు వచ్చే అవకాశాలున్నాయి. మంచు విపరీతంగా ఉండటం వల్ల మనిషి రక్త నాళాలు, కండరాలు కుచించుకుపోయి పలు రకాల వ్యాధులకు గురవుతుంటారు. ఈ సమయంలో ప్రతి ఏడాది ఆసుపత్రుల్లో వచ్చే రోగుల సంఖ్య క్రమంగా పెరుగుతుండుటమే దీనికి నిదర్శనం.
నిత్యం వివిధ రకాల అనారోగ్య సమస్యలతో ఆసుపత్రులకు వచ్చే రోగుల సంఖ్య గత రెండ్రోజుల నుంచి మరో 300 మేరకు పెరిగింది. శీతాకాలంలో ప్రారంభంలోనే గాలిలో వచ్చే మార్పులకు జ్వరం, జలుబు, తలనొప్పి, దగ్గు, శ్వాస కోశ సమస్యలు ఉత్పన్నమవుతున్నాయి. ఈ చలి కాలం జనవరి వరకు ఉంటుంది. ముఖ్యంగా నవంబరులో ప్రభావం ఎక్కువగా ఉండే అవకాశముంది. ఎక్కువగా చిన్నపిల్లలు, వృద్ధుల్లో శ్వాస తీసుకోవడం ఇబ్బందికరంగా మారుతుంది. శీతాకాలంలో ఎక్కువగా జలుబు అయి ముక్కు కారుతుంటుంది.
దీంతో చెవి దగ్గర గడ్డలా వాపు వచ్చే అవకాశాలు సైతం ఉన్నాయి. దీని వల్ల శ్వాస తీసుకోవడం సమస్యగా మారుతుంది. కండరాలు బిగుసుకుపోవడంతో మోచేయి, మోకాలు, ఇతర జాయింట్లలో నొప్పులు వస్తుంటాయి. రక్తనాళాలు కుచించుకుపోతే గుండెకు బ్లడ్ సర్క్యూలేషన్లో ఇబ్బందులు ఏర్పడుతాయి. ఇది చాలా ప్రమాదకరం. శ్వాస నాళిక కండరాలు బిగుసుకు పోతాయి. దీంతో గాలి పీల్చడంలో ఇబ్బంది ఉంటుంది. ఆస్తమా ఉన్న వారు తగ్గిన జాగ్రత్తలు తీసుకోవాలి. మరీ ఇబ్బందిగా ఉంటే కచ్చితంగా వైద్యులను సంప్రదించాలి.
'చలి కాలంలో చల్లటి పదార్థాలు కాకుండా వేడి ఆహారపదార్థాలను, వేడి నీళ్లను మాత్రమే తీసుకోవాలి. చర్మసంబంధమై వ్యాధులు నుంచి దూరంగా ఉండేందుకు మాయిశ్చరైజర్‌ వాడాలి. ఏదైనా అనారోగ్య సమస్యగా కన్పిస్తే వెంటనే వైద్యులను సంప్రదించాలి'-డా.సంపత్‌కుమార్‌ సింగ్, మహబూబ్‌నగర్‌ ప్రభుత్వ జనరల్‌ ఆసుపత్రి సూపరింటెండెంట్
ఈ జాగ్రత్తలు తప్పనిసరి
- చలికాలంలో కూల్గా ఉండే పదార్థాలకు దూరంగా ఉండాలి. వేడివేడిగా ఉన్న ఆహారాన్ని తీసుకోవాలి. శరీరం వెచ్చగా ఉండేలా చూసుకోవాలి.
- ఐస్‌క్రీం, చల్లగా ఉన్న నీళ్లను, జూస్‌ను తాగడం వల్ల జలుబు, శ్వాసకోశ సమస్యలు వస్తుంటాయి. వాటికి దూరంగా ఉండాలి.
- శరీరానికి వేడినిచ్చే జొన్నలు, ఆకుకూరలు, సజ్జలు వంటి ఆహారంగా తీసుకోవాలి. గోరు వెచ్చని నీటిని మాత్రమే తాగాలి.
- రాత్రి వేళలో బయటకు వెళ్లకుండా ఉండాలి. అత్యవసరం అయితే తప్పనిసరిగా చలి నుంచి శరీరాన్ని రక్షించే ఉన్ని దుస్తులు ధరించాలి. చెవుల్లోకి చల్లని గాలి వెళ్లకుండా రక్షణ కలిగించే దుస్తులు వేసుకోవాలి.
- చిన్న పిల్లలను బయటకు వెళ్లనీయకుండా కుటుంబ సభ్యులే పలు జాగ్రత్తలు తీసుకోవాలి.
- చలికాలంలో గాలిలో తేమ ఎక్కువగా ఉంటుంది. దీని వల్ల ఇంట్లో వైరస్‌లు ఎక్కువగా వచ్చే అవకాశాలున్నాయి. అందుకు ఇంట్లో, ఇంటి పరిసరాలను ప్రతిరోజు శుభ్రం చేసుకోవాలి.
- తరచూ చేతులను సబ్బుతో కడుక్కోవాలి. జలుబు, దగ్గు ఉన్న వారు తప్పనిసరిగా చేతిరుమాలు వెంట పెట్టుకుని అడ్డుపెట్టుకోవాలి.
పగబడుతోన్న పొగ మంచు - అప్రమత్తంగా లేకపోతే గాల్లోకి ప్రాణాలు!
తెలంగాణను వణికిస్తున్న చలి పులి - ఇది ట్రైలర్ మాత్రమే - అసలు సినిమా ముందుంది!
