కూకట్‌పల్లి నల్ల చెరువులోని ఆక్రమణలపై హైడ్రా పంజా -​ 16 నిర్మాణాలు నేలమట్టం - HYDRA DEMOLITIONS IN HYDERABAD

Hydra Demolitions In Hyderabad : హైదరాబాద్​లో హైడ్రా మరోసారి తన పంజా విసిరింది. కూకట్​పల్లిలోని నల్లచెరువును ఆక్రమించి చేపట్టిన నిర్మాణాలను నేలమట్టం చేసింది. ఎకరంపైగా ప్రభుత్వ స్థలాన్ని స్వాధీనం చేసుకుంది. తీవ్ర భావోద్వేగాల మధ్య జరిగిన ఈ కూల్చివేతల్లో హైడ్రా ఎక్కడా వెనుకంజ వేయకుండా తన పని పూర్తి చేసింది. బాధితులు అధికారులు, సిబ్బందిని ప్రాధేయపడుతూ కాళ్లమీద పడినా ఆ నిర్మాణాలను కూల్చివేసేదాక అక్కడి నుంచి కదల్లేదు. అయితే ఈ కూల్చివేతల్లో ఆక్రమణదారులు బాగానే ఉన్నా వారి వద్ద నుంచి భూమిని లీజుకు తీసుకొని వ్యాపారం చేస్తున్న సామాన్యులు కోట్లలో నష్టపోవాల్సి వచ్చింది.

Hydra Demolitions At Kukatpally : కూకట్​పల్లి నల్లచెరువులో ఆక్రమణలపై హైడ్రా విరుచుకుపడింది. 6 గంటల్లో 16 అక్రమ నిర్మాణాలను నేలమట్టం చేసింది. చెరువు విస్తీర్ణంలో కబ్జాకు గురైన ఏడు ఎకరాల స్థలంలో ఆక్రమదారుల చెర నుంచి ఎకరానికిపైగా ప్రభుత్వ స్థలాన్ని విడిపించింది. 27 ఎకరాల విస్తీర్ణంలో ఉన్న నల్లచెరువు క్రమంగా ఎఫ్ టీఎల్, బఫర్ జోన్​లోని ఏడు ఎకరాలు అన్యక్రాంతమైనట్లు హైడ్రాకు ఫిర్యాదులు అందాయి. రెండు రోజుల కిందట నల్ల చెరువు ప్రాంతంలో నీటిపారుదల, రెవెన్యూ శాఖల అధికారులతో హైడ్రా డ్రోన్ సర్వే నిర్వహించింది. శాటిలైట్ మ్యాప్​లు, సర్వే నివేదికలను సరిపోల్చుతూ ఎఫ్​టీఎల్, బఫర్ జోన్​లోని అక్రమ నిర్మాణాలను గుర్తించారు.

ఆరు గంటల హైడ్రా ఆపరేషన్ : బఫర్ జోన్​లోని 4 ఎకరాల్లో 50కిపైగా పక్కా భవనాలు, అపార్ట్ మెంట్లు, ఎఫ్​టీఎల్​లోని 3 ఎకరాల్లో 25 భవనాలు, 16 వాణిజ్య అవసరాల కోసం షెడ్ల నిర్మించినట్లు తేల్చారు. వాటిలో జనాలు ఉండే వాటిని మినహాయించి ఎఫ్​టీఎల్​లో వ్యాపారం సాగిస్తున్న షెడ్లను కూల్చివేయాలని హైడ్రా నిర్ణయించింది. ఈ మేరకు ఉదయం 6 గంటలకే అక్కడికి చేరుకున్న హైడ్రా బృందాలు స్థానిక పోలీసుల బందోబస్తు మధ్య కూల్చివేతలను మొదలుపెట్టాయి. చెరువు పరిధిలో భారీ షెడ్లు నిర్మించి వ్యాపారం చేస్తున్న వారిని హెచ్చరిస్తూ కూల్చివేతలు సాగించారు. రెండు జేసీబీ సహాయంతో అక్రమంగా నిర్మించిన మొత్తం 16 షెడ్లను మధ్యాహ్నం 12 గంటల కల్లా నేలమట్టం చేశారు.

బతుకుదెరువు కోసం వచ్చి వ్యాపారాలు : స్థానిక ఎమ్మెల్యే మాధవరం కృష్ణారావు, స్థానిక కార్పొరేట్ జూపల్లి సత్యనారాయణ నివాసాలకు అతి సమీపంలో ఉన్న నల్లచెరువు భూములు అన్యక్రాంతమవుతున్నా పట్టించుకోలేదనే విమర్శలున్నాయి. సమీపంలో పట్టా భూములున్నప్పటికీ వాటిలో కొందరు అనధికారిక నిర్మాణాలు చేపట్టారని, మరికొందరు చెరువు భూములను కబ్జా చేసి మట్టితో నింపి షెడ్లు వేసి లీజుకు ఇచ్చారు. అందులో పాల వ్యాపారం, క్యాటరింగ్, డిజిటల్ ప్రింటింగ్, ప్లైవుడ్ సహా చిన్న చిన్న వ్యాపారాలు ఏళ్ల తరబడి సాగుతున్నాయి. బతుకుదెరువు కోసం ఇతర ప్రాంతాల నుంచి వచ్చిన వారికి ఆశ చూపి అక్కడి స్థలాన్ని లీజుకు ఇచ్చిన ఆక్రమణదారులు కోట్లలో సొమ్ము చేసుకుంటున్నారు.

అడుగట్టిపోయిన భూగర్భ జలాలు : వ్యాపారం చేసేవారికి తమ షెడ్లు ఎఫ్​టీఎల్​లో ఉన్నాయనే విషయం తెలియకుండా గోప్యంగా ఉంచారు. ఆ నిర్మాణాల మూలంగా ప్రతి వర్షాకాలంలో చెరువులోకి వెళ్లాల్సిన వరద నీరంతా ఎక్కడికక్కడే నిలిచిపోతుంది. చెరువు నిండకుండా అడ్డుకట్టలు వేయడం, తూములు తొలగించడంతో ఆ ప్రాంతంలో భూగర్భ జలాలు కూడా అడుగట్టిపోయే పరిస్థితి వచ్చింది. అలాగే వరద నీరు వెళ్లే కాలువ కూడా కుంచించుకుపోవడంతో చెరువు ఎగువన ఉన్న వెంకట్రావునగర్, శేషాద్రినగర్​లతోపాటు చెరువు కింద ఉన్న సాయిబాబా కాలనీ, కేరళబస్తీ, దేవినగర్, గాయత్రినగర్ ప్రాంతాల ప్రజలు నిత్యం ఇబ్బందులు ఎదుర్కొంటున్నారు. ఈ విషయం హైడ్రా దృష్టికి రావడంతో రంగంలోకి దిగిన సిబ్బంది చెరువులోని ఆక్రమణలను కూల్చివేశారు.

సమాచారాన్ని గోప్యంగా ఉంచిన లీజుదారులు: నల్లచెరువులో ఆక్రమ నిర్మాణాలపై హైడ్రా ముందస్తుగా నెల రోజుల కిందటే యజమానులకు సమాచారం ఇచ్చినట్లు తెలుస్తోంది. కానీ వారు గోప్యంగా ఉంచడంతో లీజుదారులు తీవ్రంగా నష్టపోయారు. ఒక్కోక్కరికి కోట్లలోనే నష్టం వాట్లిలింది. కూల్చివేతల సమయంలో లీజుదారులంతా హైడ్రా సిబ్బందిని గడువు ఇవ్వాలంటూ ప్రాధేయపడ్డారు. షెడ్లలోని విలువైన సామాగ్రిని తీసుకునేందుకు సమయం ఇవ్వాలని కాళ్లమీద పడినా ఫలితం లేకుండా పోయింది. వాళ్లకు అప్పటికప్పుడు నచ్చజెప్పే ప్రయత్నం చేసిన హైడ్రా సిబ్బంది, పోలీసులు ఆ తర్వాత నిర్మోహమాటంగా కూల్చివేతలు కొనసాగించారు.

సమయం అడిగినా ఇవ్వాలే : అయితే ఈ విషయంలో అక్కడుతున్న వ్యాపారులంతా తీవ్ర ఆందోళన వ్యక్తం చేశారు. ప్రభుత్వానికి తాము వ్యతిరేకంగా పనిచేయడం లేదని, సవ్యంగా వ్యాపారం చేసుకుంటున్నామని, సమయం ఇస్తే తామే ఖాళీ చేసి వెళ్లిపోయే వాళ్లమని వాపోయారు. తమ కుటుంబాలు రెక్కలు ముక్కలు చేసుకొని సంపాదించిన డబ్బుతో వ్యాపారం మొదలుపెట్టామని, ఇప్పుడు హఠాత్తుగా వచ్చి కూల్చివేయడంతో తమ బతుకులు రోడ్డున పడ్డాయని కన్నీరుమున్నీరుగా విలపించారు.

ఇటీవల మాదాపూర్ సున్నంచెరువులో ఆక్రమణల కూల్చివేతలపై స్థానికుల నుంచి పెద్ద ఎత్తున నిరసనలు వ్యక్తం కావడంతో ముందే అప్రమత్తమైన హైడ్రా నల్లచెరువు వద్ద ఆ పరిస్థితులు తలెత్తకుండా భారీ బందోబస్తు మధ్య కూల్చివేతలు కొనసాగించింది. శేరిలింగంపల్లి, కూకట్​పల్లిలోని ప్రధాన చెరువులపై దృష్టి సారించిన హైడ్రా ఒక్కొక్కటిగా అక్రమ నిర్మాణాలను నేలమట్టం చేస్తూ ప్రభుత్వ భూములను స్వాధీనం చేసుకుంటుంది.