Hyderabad Man Escape Laos Cyber Den : భారత్లో ఎక్కువ మంది యువత విదేశాలు వెళ్లి అక్కడ సంపాదించాలని కలలు కంటారు. కానీ అక్కడకు మధ్యవర్తుల ద్వారా వెళ్లి ఇష్టం లేని పనిలో చేరి నానా అవస్థలు పడుతుంటారు. ముఖ్యంగా సైబర్ మోసాలకు వీరిని ఎంచుకొని వారితోనే ఆన్లైన్ మోసాలకు పాల్పడతారు. ఒకవేళ మాట వినకపోతే ప్రాణాలు పోయేంత పని చేస్తారు. అయితే తాజాగా హైదరాబాద్ బడా బజార్కు చెందిన రాపిడో బైక్ రైడర్ సైబర్ వలలో చిక్కుకున్నాడు. లావోస్ నుంచి ప్రాణాలతో బయటపడి పోలీసులకు ఫిర్యాదు చేశారు. అతని ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.
పోలీసులు తెలిపిన వివరాల ప్రకారం, హైదరాబాద్ బడా బజార్కు చెందిన రాపిడో బైక్ రైడర్ ఇంటికి సమీపంలో ఉండే ఫాజిల్ ఖాన్ లావోస్లో చాట్ ప్రాసెస్ ఉద్యోగం ఉందని గత ఏప్రిల్లో ఆశచూపాడు. ప్రారంభవేతనం నెలకు రూ.35 వేలు వస్తాయిని లావోస్ ఏజెంట్లు అబ్దుల్ సమీ, దావూద్ను పరిచయం చేశాడు. బాధితుడి స్నేహితుడు సైతం లావోస్ వెళ్లేందుకు అంగీకరించడంతో ఇద్దరి నుంచి రూ.30వేల చొప్పున వసూలు చేశారు. మే1న ఇద్దరు సింగపూర్ మీదుగా లావోస్ రాజధాని వియంటియాన్కు చేరుకున్నారు.
వీసా ఆన్ అరైవల్ కోసం ఒక్కొక్కరు 40 అమెరికన్ డాలర్లు చెల్లించారు. అక్కడి నుంచి రైలులో రెండు గంటల ప్రయాణం తర్వాత నాటోయ్ చేరుకున్నారు. అక్కడినుంచి మరో 8 గంటల ప్రయాణం అనంతరం గోల్డన్ ట్రయంగిల్ చేరుకున్నారు. ఇథియోపియన్ ఏజెంట్ వచ్చి వీరి నుంచి పాస్పోర్టులను తీసుకున్నాడు. అక్కడి టాన్వెర్న్ డిస్ట్రిక్ట్ సెజ్లోని ఇంగ్ జిన్ ప్రాపర్టీ అనే కంపెనీలోకి తీసుకెళ్లారు.
హనీ ట్రాప్, క్రిప్టోకరెన్సీ మోసాలే అధికం : అక్కడ కొన్ని పరీక్షలు నిర్వహించిన అనంతరం వీరితో ఒప్పందంపై సంతకాలు తీసుకొని వసతి ఏర్పాటు చేశారు. మరుసటిరోజు ఆసుపత్రికి తీసుకెళ్లి వైద్యపరీక్షలు చేయించి కార్యాలయానికి తీసుకెళ్లి ఐడీకార్డులిచ్చారు. మరసటిరోజు నుంచి పని చేయాలని సూచించారు. హానీట్రాప్, క్రిప్టోకరెన్సీ, పెట్టుబడుల మోసాలకు సంబంధించిన వాటి కోసం మొదటి రోజు వీరికి కొత్త ఐఫోన్ ఇవ్వడంతోపాటు ఇన్స్టాగ్రామ్ ఐడీలు రూపొందించి ఇచ్చారు. రెండువారాల శిక్షణలో భాగంగా తమతో సైబర్ నేరాలను చేయించబోతున్నారని బాధితులు గ్రహించారు.
ఈక్రమంలోనే మూడు నాలుగు రోజుల తర్వాత సమీ, దావూద్ కంపెనీకి రావడంతో తమను భారత్కు తిరిగి పంపించివేయాలని అడిగారు. ఆ మార్గం కోసం ప్రయత్నిస్తామని చెప్పిన వారివురు ఆ తర్వాత కనిపించలేదు. అమెరికా, కెనడా, యూకేల్లో ఉండే ప్రవాస భారతీయులను పెట్టుబడుల మోసాలు, హనీట్రాప్, క్రిప్టోకరెన్సీ దందాల ద్వారా మోసగించేందుకు తమను వినియోగించుకున్నట్లు బాధితులకు అర్థమైంది.
ప్రవాస భారతీయుల ఫేస్బుక్ హ్యాక్ : అలాంటి ప్రవాసభారతీయుల పేస్బుక్ ఖాతాలను హ్యాక్ చేసి వారి వివరాలను బాధిత యువకులకు అప్పగించేవారు. ఆ ఖాతాలకు ఫ్రెండ్ రిక్వెస్ట్ పంపించి వారితో సంబంధాలు పెంచుకొని పెట్టుబడులు రాబట్టే పనిని వీరికి అప్పగించారు. ఎవరైనా పెట్టుబడులు పెట్టేందుకు అంగీకరిస్తే ముఠాలే సొంతంగా తయారుచేసిన యాప్లను వినియోగించుకొని వాటిల్లోకి డబ్బులను బదిలీ చేయించుకునేలా చేయించేవారు. అలా వచ్చిన డబ్బులను ఆల్ ఆర్బిట్రేజ్ అనే ప్లాట్ఫాం ద్వారా క్రిప్టోకరెన్సీని మార్పించేవారని పోలీసులు తెలిపారు.
విద్యుత్ షాక్, 15 అంతస్తుల భవనాలు ఎక్కించడం : ఈ ముఠా సభ్యుల శిక్షలకు తాళలేకి రాజస్థాన్ యువకులు పారిపోయారు. ఒకవేళ మోసాలు చేయకపోయినా నిర్దేశించిన లక్ష్యాలను చేరుకోకపోయినా కఠినంగా శిక్షించేవారని బాధితులు పోలీసులకు వివరించారు. విద్యుత్ షాక్ సైతం ఇచ్చేవారని అలాగే 15 అంతస్తులను భవనాన్ని 7సార్లు ఎక్కించేవారు. కొన్నిసార్లు జరిమానాలు సైతం విధించేవారు. సాయంత్రం 5 గంటలు దాటిన తర్వాత బయటికి వెళ్లనిచ్చేవారుకాదని చెప్పాడు. ఆ శిక్షలకు తాళలేక రాజస్థాన్ నుంచి వచ్చిన ఇద్దరు యువకులు పారిపోయి లావోస్లోని ఇండియన్ ఎంబసీని ఆశ్రయించారు. ఈ ఘటనతో ధైర్యం తెచ్చుకున్న బాధిత యువకులు ఎంబసీకి తమ ఇబ్బందుల గురించి మెయిల్ చేశారు.
ఆధారాలు ధ్వంసం : అక్కడి లేబర్ కార్యాలయం నుంచి యువకులను పంపించివేయాలనే ఆదేశాలు రావడంతో ముఠా సభ్యులు వీరి నుంచి సిమ్ కార్టులను తీసుకొని ధ్వంసం చేశారని బాధితులు పోలీసులకు వివరించారు. బాధితుల ఫోన్లలోని డేటాను ఫార్మాట్ చేసి బయటికి ఈ ముఠా సభ్యులు పంపించారు. తొమ్మిది రోజులు బయట హోటల్లో ఉన్న బాధితులు పాస్పోర్టులు సిద్ధమైన తర్వాత లావోస్లోని ఓ నదిని దాటి థాయ్లాండ్ సరిహద్దులకు చేరుకున్నారు. అక్కడినుంచి బస్సులో 12 గంటలు ప్రయాణం చేసి బ్యాంకాక్ విమానాశ్రయానికి వెళ్లారు. అక్కడినుంచి విమానంలో గత నెల 24న హైదరాబాద్ చేరుకున్నారు. అనంతరం బాధితుడు ఇచ్చిన ఫిర్యాదు మేరకు పాజిలాఖాన్, సమీ, దావూద్ తోపాటు ఇతరులపై కేసు నమోదు చేసి దర్యాప్తు ప్రారంభించిన్నట్లు సమాచారం.
